LECCION 8
Porque ta Permiti el Dios con el Maldad y Sufrimiento?
1. Paquemodo ya principia el maldad?
El Dios ya permiti con el maga gente para rula por largo tiempo para dale mira que gendeh sila puede resolva el maga problema del maga gente
El maldad ya principia na tierra cuando si Satanas ya habla el primer imbusterias. Del primero un perfecto angél si Satanas, pero na uliji ya queda le “noay. . .quever na verdad.” (Juan 8:44) Ya cultiva le el deseo que adora tambien con ele, un cosa que con Dios lang debe hace. Si Satanas ya habla imbusterias con el primer mujer, si Eva, y ya convencé que obedece con ele en vez con Dios. Si Adan ya desobedece tambien con Dios. El de suyu decicion ya resultá na sufrimiento y muerte.—Le con el Roma 5:19; 2 Corinto 11:3.
Cuando si Satanas ya sugeri con Eva que desobedece con Dios, ele ya principia ya man rebelde encontrá con el soverania del Dios o su posición como el Bien Alto Dios. Mayoria del maga gente el ya sigui con Satanas y nuay acepta el rulanza del Dios. Poreso, si Satanas ya queda el “principe de este mundo.”—Le con el Juan 14:30; 1 San Juan 5:19.
2. Tiene ba defecto el creacion del Dios?
Perfecto el todo cosa ya hace el Dios. El maga gente y angél que ya crea le tiene el abilidad para obedece con ele. (Deuteronomio 32:4, 5) Ya crea kanaton el Dios con libertad para iscuji si hace ba kita el bueno o malo. Ese libertad ta dale kanaton oportunidad para demonstra el diaton amor con Dios.—Le con el Santiago 1:13-15; 1 San Juan 5:3.
3. Porque el Dios ta permiti el sufrimiento hasta ahora?
Si Jehova ya permiti con el rebelion encontrá na su soverania por limitao tiempo. Porque? Para dale mira que nuay cosa bueno puede lleva el rulanza del gente que independiente con ele. (Eclesiastes 7:29; 8:9) Despues el 6,000 año, el evidencia bien claro. El maga gente quien ya rula nuay puede quita con el guerra, crimen, injusticia, o enfermedad.—Le con el Jeremias 10:23; Roma 9:17.
Gendeh igual na rulanza del gente, el rulanza del Dios ta dale beneficio con todo quien ta somete con este. (Isaias 48:17, 18) Gendeh dura, si Jehova hay destroza con el todo gobierno del gente. Aquellos lang quien somete na rulanza del Dios hay quedá aqui na tierra.—Isaias 11:9; le con el Revelacion 11:15.
Mira con el video Porque Ta Permiti el Dios con el Sufrimiento?
4. Cosa oportunidad kita tiene por causa na paciencia del Dios?
Si Satanas ta habla que ta sirvi lang el maga gente con Jehova cay tiene sila cosa ta puede benificia. Quierre ba tu dale prueba que imbustero le? Puede tu se hace. Por causa na paciencia del Dios, tiene kita el oportunidad para dale mira si kita ba ta iscuji el rulanza del Dios o del gente. El manera del diaton vida ta revela si cosa kita ya iscuji.—Le con el Job 1:8-12; Maga Proverbio 27:11.
5. Paquemodo kita dale mira que ya iscuji ta con el rulanza del Dios?
El diaton decicion ta revela si kita ba quierre el rulanza del Dios
Puede kita dale mira que ya iscuji ta con el rulanza del Dios si kita hay aprende y practica el deverasan adoranza que basé na Biblia. (Juan 4:23) Para puede tambien kita dale mira que no quierre kita con el rulanza de Satanas, necesita kita desaleja na politica y na guerra igual con Jesus.—Le con el Juan 17:14.
Si Satanas ta usa su poder para dale mira que dol aceptablé lang el imoral y maga mal practica. Si hay desaleja kita con ese, posiblé el otro maga amigo y pariente hay gangguia o man contra kanaton. (1 Pedro 4:3, 4) Poreso, necesita kita decidi. Hay man junto ba kita con aquellos quien ta ama con Jehova? Obedece ba kita con su maga amable y justo ley? Si oo, ta dale kita prueba que imbustero si Satanas cuando ya habla le que nuay maskin quien hay obedece con Dios na malisud situacion.—Le con el 1 Corinto 6:9, 10; 15:33.
El amor del Dios na maga gente amo el garantia que hay quita le con el maldad y sufrimiento. Aquellos quien ta demonstra que ta creé sila con este hay vivi hasta para cuando na tierra.—Le con el Juan 3:16.
