El Creador mas sabio compara kanaton. Como un amable Tata, ele ta cuida kanaton. Nuay tambien le crea kanaton para vivi independiente con ele. (Jeremias 10:23) Poreso, igual na un bata que ta necesitá el guia del mayores, kita todo ta necesitá el guia del Dios. (Isaias 48:17, 18) El maga principio na Biblia amo el guia estaba con Dios.​—Le con el 2 Timoteo 3:16.

El maga ley y principio de Jehova ta enseña kanaton si pakilaya vivi na buen manera ahora y si paquemodo obtene vida eterna na futuro. Ciendo ele ya crea kanaton, debe lang kita sigui con el de suyu maga guia.​—Le con el Roma 15:4; Revelacion 4:11.

El maga principio na Biblia ta guiá kanaton na mucho situacion, mientras el ley aplicablé na maga espesifico situacion. (Maga Actividad 15:29) Debe kita pensa enbuenamente si paquemodo el un principio puede aplica na un particulár situacion. (Maga Proverbio 2:10-12) Por ejemplo, el Biblia ta enseña que el vida un regalo del Dios. Ese principio puede guiá kanaton para con cuidao kita pirmi na trabajo, na casa y mientras ta viaja kita.​—Le con el Maga Actividad 17:28.

Si Jesus ya menciona dos bien importante principio. El primero ta revela si cosa gayot el proposito del diaton vida​—conocé con Dios, ama y con ele lang sirvi. Debe kita considera con ese primer principio antes hace maga decicion. (Maga Proverbio 3:6) Aquellos quien ta sigui  con ese principio hay queda amigo del Dios, y hay obtene deverasan alegria y vida eterna.​—Le con el Mateo 22:36-38.

El segundo principio puede guiá kanaton para tiene buen relacion con otro. (1 Corinto 13:4-7) Para puede aplica con ese, debe kita imita si paquemodo el Dios ta trata con el maga gente.​—Le con el Mateo 7:12; 22:39, 40.

El maga principio na Biblia ta enseña con el familia si paquemodo queda unido na amor. (Colosa 3:12-14) Para protege tambien con el familia, el Palabra del Dios ta enseña otro principio​—el matrimonio debe queda permanente.​—Le con el Marcos 10:7-9.

Si sigui kita con el cosa ta enseña el Biblia, hay beneficia kita na emocional y materiál manera. Por ejemplo, mas quierre el amo con el maga trabajador quien ta aplica el maga principio del Biblia que debe queda honesto y responsable. (Maga Proverbio 10:4, 26; Maga Hebreo 13:18) El Palabra del Dios ta enseña tambien kanaton queda contento na cosa lang kita necesita y mas dale valor con el diaton relacion con Dios en vez con el maga materiál cosas.​—Le con el Mateo 6:24, 25, 33; 1 Timoteo 6:8-10.

El maga principio na Biblia puede tambien protege con el diaton salud. (Maga Proverbio 14:30; 22:24, 25) Por ejemplo, puede kita desaleja na enfermedad y accidente si kita hay sigui con el ley del Dios que evita con el burracherias. (Roma 13:13) Gendeh ta prohibi kanaton si Jehova toma maga alcoholico tomada, pero gendeh debe por demas. (Salmo 104:15; 1 Corinto 6:10) Puede kita beneficia na maga principio estaba con Dios cay este ta enseña kanaton guarda el diaton accion y pensamiento. (Salmo 119:97-100) El maga verdadero Cristiano ta sigui con el principio del Dios gendeh lang para na bien diila. Ta hace se sila para honra con Jehova.​—Le con el Mateo 5:14-16.