El Dios ta invita con el todo clase de gente que atraca con ele por medio na rezo. (1 San Juan 5:14) Pero gendeh le ta oi o ta acepta el todo maga rezo. Por ejemplo, gendeh le ta oi con el rezo del un marido quien ta maltrata con su mujer. (1 Pedro 3:7) Nuay tambien le oi con el rezo del maga Israelita cuando ya continua sila hace mal cosas. Pero, el Dios ta acepta el rezo maskin de aquellos quien ya comete serioso pecado, si hay arripinti sila. Claro que un privilegio el rezo.​—Le con el Isaias 1:15; Maga Actividad 3:19.

Mira con el video El Dios Ba Ta Oi con el Todo Maga Rezo?

Parte del diaton adoranza el rezo, poreso con Jehova lang kita debe reza, el diaton Creador. (Mateo 4:10; 6:9) Ciendo imperfecto kita, debe tambien kita reza na nombre de Jesus cay ya muri le para na diaton pecado. (Juan 14:6) No quierre si Jehova que repiti kita maga encabezao o escribido rezo. Ele quierre que estaba na corazon el diaton rezo.​—Le con el Mateo 6:7; Filipo 4:6, 7.

El diaton Creador ta puede oi maskin maga silencio rezo. (1 Samuel 1:12, 13) Ele ta invita kanaton reza maskin cosa hora, igual por ejemplo antes principia el dia, antes de durmi, antes comé, y si ta enfrenta kita maga problema.​—Le con el Mateo 15:36; 1 Pedro 5:7.

Gendeh facil queda amigo del Dios cay ta vivi kita entre na maga gente que nuay creéncia con Dios y na su promesa de paz na tierra. (2 Timoteo 3:1, 4; 2 Pedro 3:3, 13) Poreso  debe kita asocia na igual siervo del Dios quien hay anima kanaton, y sila necesita tambien kanaton.​—Le con el Maga Hebreo 10:24, 25.

El asosacion junto con aquellos quien ta ama con Dios puede ayuda kanaton para queda kita amigo de Jehova. El maga miting del maga Testigo de Jehova ta dale buen oportunidad para anima kanaton el otro.​—Le con el Roma 1:11, 12.

Para queda amigo del Dios necesita tu medita con el cosa tu ya aprende na su Palabra, igual por ejemplo el de suyu maga actividad, consejo y maga promesa. El rezo y meditacion puede ayuda kanaton aprecia el amor y sabeduria de Jehova.​—Le con el Josue 1:8; Salmo 1:1-3.

Hay queda tu amigo del Dios si tu tiene confianza y fe con ele. Pero el fe igual como un siembra que necesita rega. Si paquemodo el siembra ta necesitá agua, tu tambien necesita continua aprende el Biblia para queda fuerte el de tuyu fe.​—Le con el Mateo 4:4; Maga Hebreo 11:1, 6.

Si Jehova ta cuida con aquellos quien ta ama con ele. Puede le protege kanila na maskin cosa que posiblé hace malo con el diila fe y esperanza para obtene vida eterna. (Salmo 91:1, 2, 7-10) Ta manda le kanaton desaleja na clase de vida que peligroso na diaton salud y posiblé causa problema. Si Jehova ta enseña kanaton si paquemodo vivi na mas buen manera.​—Le con el Santiago 1:25; 4:4, 8.