LECCION 2
Quien el Dios?
1. Porque kita debe adora con Dios?
El verdadero Dios amo el Creador del todo las cosas. El de suyu vida nuay principio y nunca hay tiene fin. (1 Timoteo 1:17) Con ele estaba el buen noticia que puede le na Biblia. (1 Timoteo 1:11) Ciendo el Dios amo el ya dale kanaton vida, debe con ele lang kita adora.—Le con el Revelacion 4:11.
2. Cosa clase le de Dios y cosa su maga calidad?
El maga gente gendeh puede mira con Dios cay ele un Espiritu. El clase de vida que tiene le mas pa si compara con el maga fisical creatura que ta vivi aqui na tierra. (Juan 1:18; 4:24) Pero, puede siempre kita sabe si cosa el su maga calidad por medio na maga cosas que ele ya crea. Por ejemplo, puede kita mira el amor y sabeduria del Dios na diferénte clase de fruta y flores. El grandor del universo un prueba que ele poderoso.—Le con el Roma 1:20.
Puede pa kita mas conocé con el Dios si le kita con el Biblia. Por ejemplo, este ta habla kanaton si cosa quierre y no quierre el Dios, si paquemodo le ta trata na maga gente y si cosa le ta sinti na cosa ta hace el maga gente.—Le con el Salmo 103:7-10.
3. Tiene ba nombre el Dios?
Si Jesus ya habla: “Tata diamon na cielo, dale gloria con el de Uste Nombre.” (Mateo 6:9) Maskin pa el Dios tiene mucho titulo, uno lang el su nombre. Na cada lengguaje, ta pronuncia con este na diferénte manera. Na Chavacano, ta pronuncia con este “Jehova.” Pero el los demas ta pronuncia con este “Yahweh.”—Le con el Salmo 83:18.
Manada Biblia el nuay mas nombre del Dios cay ya quita y ya cambia con este titulo igual Señor o Dios. Pero cuando ya escribi con el Biblia, maga 7,000 beses puede le con el nombre del Dios. Si Jesus ya manda conocé con el nombre del su Tata na maga gente con quien le ya enseña acerca con Dios.—Le con el Juan 17:26.
Mira con el video Tiene ba Nombre el Dios?
4. Ta ama ba kanaton si Jehova?
Igual con este amable tata, el Dios ta actua para na bien diaton
El sufrimiento ba ahora na entero mundo ta dale mira que si Jehova nuay queber kanaton? Asegun con el otro, ta sufri kita cay el Dios ta pruba kanaton. Pero gendeh se deverasan.—Le con el Santiago 1:13.
El Dios ya dale kanaton el libertad para hace decicion. Gendeh ba tu alegre que tiene tu libertad para decidi sirvi con Dios? (Josue 24:15) Pero mas mucho el quien ya iscuji hace malo, poreso ta continua el sufrimiento. Ese clase de injusticia ta hace triste con Jehova.—Le con el Genesis 6:5, 6.
Si Jehova ta ama kanaton. Ele quierre que vivi kita con alegria. Gendeh mas dura, hay quita le con el sufrimiento y con aquellos quien ta causa con este. Mientras tanto, el Dios tiene buen razon si porque le ta permiti con el sufrimiento. El Leccion 8 hay discuti acerca con ese.—Le con el 2 Pedro 2:9; 3:7, 13.
5. Paquemodo kita queda amigo del Dios?
Si Jehova ta invita kanaton atraca con ele por medio del rezo. Interesao le na cada individuál. (1 San Juan 5:14) Ele preparao perdona. Maskin pa tiene vez tan kamali kita, sabe le que ta pricura kita hace alegre con ele. Poreso, puede gayot kita queda amigo del Dios maskin imperfecto pa kita.—Le con el Salmo 103:12-14; Santiago 4:8.
Ciendo si Jehova el quien ya dale vida kanaton, debe kita ama con ele mas pa con otro. (Marcos 12:30) Puede tu se demonstra si tu hay conocé pa mas con ele y obedece con su maga mandamiento. Si hace tu se, queda tu amigo del Dios.—Le con el 1 Timoteo 2:4; 1 San Juan 5:3.
