LECCION 4
Quien si Jesucristo?
1. Onde estaba si Jesus y quien ya crea con ele?
Porque facil atraca con Jesus?—MATEO 11:29; MARCOS 10:13-16.
Si Jesus gendeh igual na otro maga gente cay ele ya vivi na cielo como un espiritu persona antes le ya nace aqui na tierra. (Juan 8:23) Ele el primer creacion del Dios y ya ayuda le na creacion del todo las cosas na mundo. Con ele lang si Jehova directa ya crea, poreso ya llama con ele el “unico” Anak del Dios. (Juan 1:14) El Dios ya usa con Jesus para hace pasa su mensaje na otro, poreso ya llama tambien con ele “el palabra.”—Le con el Maga Proverbio 8:22, 23, 30; Colosa 1:15, 16.
2. Porque ya vene si Jesus aqui na tierra?
El Dios ya imbia con Jesus aqui na tierra. Ya transfiri le el vida de Jesus salé na cielo para na vientre del un virgen Judio, si Maria. Poreso, ele nuay tiene tata de aqui na tierra. (Lucas 1:30-35) Si Jesus ya vene para (1) enseña el verdad acerca con Dios, (2) dale kanaton ejemplo si paquemodo hace el voluntad del Dios maskin pa tiene maga dificultad y (3) entrega su perfecto vida “para rescata” kanaton.—Le con el Mateo 20:28.
3. Porque necesita kita rescate?
El rescate amo el valor que debe paga para libra con el un gente desde na peligro del muerte. (Exodo 21:29, 30) Gendeh parte del originál proposito del Dios que el maga gente queda viejo y muri. Porque se kita sabe? El Dios ya habla con el primer gente, si Adan, cay si ele comete con el cosa ta llama el Biblia “pecado,” ele hay muri. Poreso, si nuay comete pecado si Adan gendeh gayot era le muri. (Genesis 2:16, 17; 5:5) Asegun na Biblia, el muerte “ya entra” na mundo por medio con Adan. Na ese manera, si Adan ya hace pasa na su maga descendiente con el pecado y el pago de este—el muerte. Necesita kita rescate para libra kanaton na castigo de muerte que ya hereda kita con Adan.—Le con el Roma 5:12; 6:23.
Quien puede paga con el rescate para libra kanaton na muerte? Si kita hay muri, el diaton pecado lang kita ta puede paga. Gendeh gayot puede paga el un imperfecto gente con el pecado del otro.—Le con el Salmo 49:7-9.
4. Porque ya muri si Jesus?
Otro si Jesus compara kanaton cay ele perfecto. Poreso, gendeh le debe muri para na su pecado cay ele nuay comete pecado. Ya muri le para na pecado del otro. Por causa na grande amor del Dios para na maga gente, ya imbia le con el de suyu Anak para muri y rescata kanaton. Ta ama tambien kanaton si Jesus, poreso ya obedece le con el de suyu Tata y ya dale su vida para paga con el diaton maga pecado.—Le con el Juan 3:16; Roma 5:18, 19.
Mira con el video Porque Ya Muri si Jesus?
5. Cosa si Jesus ta hace ahora?
Cuando taqui si Jesus na tierra, ya curá le maga enfermo, ya hace resucita maga muerto y ya dale alivio con el maga ta sufri. Ansina tambien ele hay hace na futuro para con todo maga gente quien obediente con Dios. (Mateo 15:30, 31; Juan 5:28) Cuando ya muri si Jesus, el Dios ya hace vivi otravez con ele como un espiritu persona. (1 Pedro 3:18) Despues, ele ya espera na lao derecha del Dios hasta llega el tiempo que si Jehova hay dale con ele el poder para rula como un Rey na entero mundo. (Maga Hebreo 10:12, 13) Ahora, si Jesus ta rula ya como un Rey na cielo y el de suyu maga siguidores ta predica con ese buen noticia na entero mundo.—Le con el Mateo 24:14; Lucas 1:32, 33.
Gendeh dura, si Jesus hay usa su poder como un Rey para termina con el sufrimiento y con aquellos quien ta causa con ese. Todo quien ta creé con Jesus y ta obedece con ele hay vivi na paraiso tierra.—Le con el Lucas 23:42, 43.