Ya organiza el Dios como un nacion con el maga descendiente del patriarca si Abraham. Ya llama le con este “Israel.” El Dios ya dale maga ley y ya enseña kanila si paquemodo adora con ele. Ya delega le kanila el de suyu palabra. (Salmo 147:19, 20) Por medio del Israel, todo maga nacion hay ricibi bendicion.​—Le con el Maga Actividad 3:25.

Ya iscuji el Dios con el maga Israelita para queda su maga testigo. El cosa sila ya experiencia de antes ta dale mira si paquemodo hay beneficia el maga gente si obedece sila con el maga ley del Dios. (Deuteronomio 4:6) Poreso, por medio del maga Israelita, el otro maga gente hay conocé con el verdadero Dios.​—Le con el Isaias 43:10, 12.

Nuay dura, ya queda desobediente el nacion del Israel poreso nuay mas acepta kanila si Jehova, y el Cristiano congregacion el ya releva kanila. (Mateo 21:43; 23:37, 38) Encambio con el maga Israelita, el maga verdadero Cristiano ahora amo el ya queda maga testigo de Jehova.​—Le con el Maga Actividad 15:14, 17 New World Translation.

Si Jesus ya organiza con su maga siguidores para predica y hace maga dicipulo na todo nacion. (Mateo 10:7, 11; 24:14; 28:19, 20) Este predicacion cerca ya acaba na este ultimo maga dia. Por primer vez, si Jehova ta ajunta con el millones de gente na todo nacion para na verdadero adoranza. (Revelacion 7:9, 10) Ya organiza con el maga verdadero Cristiano para anima y ayuda con uno y otro. Na entero mundo, igual lang el instruccion que ta ricibi sila estaba na Biblia na diila miting.​—Le con el Maga Hebreo 10:24, 25.

Del año 1870, un diutay grupo del maga estudiante de Biblia el ya descubri otravez con el verdad que ya dura ya escondido. Sabe sila que ya organiza si Jesus con el congregacion del maga Cristiano para predica, poreso ya principia sila predica acerca el Reino del Dios na mucho maga nacion. Del 1931, ya llama kanila maga Testigo de Jehova.​—Le con el Maga Actividad 1:8; 2:1, 4; 5:42.

Del primer siglo, tiene un grupo o cuerpo del maga experienciao anciano quien ta mira con el congregacion na diferente lugar. Aquellos maga anciano ta conocé con Jesus como el Cabeza del congregacion. (Maga Actividad 15:2) El maga Testigo de Jehova ahora ta beneficia tambien na ayuda del maga experienciao anciano quien ta forma con el Cuerpo Gobernante. Sila ta mira con el maga branch office del maga Testigo de Jehova donde ta man transleyt, imprimi y distribui maga publicacion que ta usa para estudia con el Biblia na mas de 600 lengguaje. Por medio de ese, el Cuerpo Gobernante ta puede anima y guiá con el mas de 100,000 congregacion na entero mundo. Maga responsable hombre el quien ta sirvi como maga anciano na cada congregacion. Sila ta cuida enbuenamente con el maga siervo de Jehova.​—Le con el 1 Pedro 5:2, 3.

Ya organiza con el maga Testigo de Jehova para predica con el buen noticia y hace maga dicipulo. Igual con el maga apostoles, ta predica sila na casa en casa. (Maga Actividad 20:20) Ta ofrece tambien sila libre estudio na Biblia para con aquellos quien quierre aprende el verdad. Pero el maga Testigo de Jehova gendeh lang basta un organizacion. Un familia sila que tiene un amable Tata. Man hermano y hermana sila todo que ta ama con uno y otro. (2 Tesalonica 1:3) Sila el bien alegre familia na entero tierra cay ya organiza kanila para hace alegre con Jehova y ayuda con otro.​—Le con el Salmo 33:12; Maga Actividad 20:35.