LECCION 4
Ya Hace Le Alegre con el De Suyu Tata y con Jehova
Cosa ta promete si Jefte con Jehova?
Maskin gendeh facil, ya hace el anak de Jefte el cosa ya promete su tata con Jehova
Ta mira ba tu con este bata mujer na letrato?— Anak ele de Jefte. Nuay habla el Biblia si cosa el de suyu nombre pero sabe kita que ya hace le alegre con el de suyu tata y con Jehova. Hay aprende kita ahora acerca con ele y con el de suyu tata, si Jefte.
Un buen gente si Jefte y pirmi le ta enseña con el de suyu anak acerca con Jehova. Mafuerza tambien ele y un buen lider. Poreso, ya iscuji con ele el maga Israelita para queda diila lider na guerra contra con el diila maga contrallo.
Ya reza si Jefte con Jehova que ayudá kanila para ganá. Y ya promete ele que si ganá sila, hay dale le con Jehova el primer persona quien hay salé na de suyu
casa para hace encuentro con ele. Este persona hay queda y trabaja na tabernaculo del Dios na entero vida de suyu. El tabernaculo amo el lugar donde el maga gente de antes ta adora con Dios. Si Jefte el ya ganá na guerra! Sabe ba tu si quien el primer persona que ya salé na casa para hace encuentro con ele?—El mismo anak de Jefte! Solo anak lang le y ahora necesita le queda na tabernaculo. Poreso, bien triste gayot si Jefte. Pero, gendeh ba ya promete le con Jehova? El de suyu anak ya habla: ‘Pang, ya promete tu con Jehova poreso debe tu quel hace.’
Ta visitá el maga amiga del anak de Jefte cada año
Triste tambien el anak de Jefte. Cay si na tabernaculo ya le, no puede le casá y tiene anak. Pero quierre gayot le hace el cosa ya promete de suyu tata y hace alegre con Jehova. Para con ele, mas importante quel contra tiene marido y anak. Poreso, ya anda le na tabernaculo y ya queda alla na entero vida de suyu.
Alegre gahah el de suyu tata y si Jehova na cosa le ya hace?— Siempre! Si ta creé y ta ama tu con Jehova, puede tu queda igual con el anak de Jefte. Puede tambien tu hace bien alegre con el de tuyu tata’y nana y con Jehova.
LE NA DE TUYU BIBLIA
-
Deuteronomio 6:4-6
-
Maga Juez 11:30-40
-
1 Corinto 7:32-34