Tiene vez, si ta converza kita con el maga gente acerca con Jehova, ta gangguia y ta rabia sila kanaton. Por causa con ese, baká no quierre mas kita man cuento acerca con Dios. Ya sinti ya ba tu igual ansina?— Tiene istoria na Biblia acerca del un joven quien ta ama con Jehova pero gendeh ya era le converza acerca con Dios. Jeremias el de suyu nombre. Conocé kita con ele.

Joven pa si Jeremias cuando ya manda con ele si Jehova habla con el maga gente que no mas ya hace malo. Gendeh este facil para con Jeremias y ya tiene le miedo. Ya habla le con Jehova: ‘No sabe yo cosa habla. Un bata lang yo.’ Pero ya  contesta si Jehova: ‘No tu tiene miedo. Ayudá yo contigo.’

Poreso, si Jeremias ya habla con el maga gente que hay castiga kanila si continua siempre sila hace malo. Ya creé gahah sila con Jeremias?— Nuay. Ya gangguia y ya rabia pa sila con ele. Quierre pa ganeh el otro mata con ele! Cosa gahah ya sinti si Jeremias?— Ya tiene le miedo y ya habla: ‘Gendeh mas yo converza acerca con Jehova.’ Pero, ya hace ba se ele?— Nuay. Ta ama gayot le con Jehova poreso ya continua le man cuento acerca con Dios. Por causa con ese, nuay con ele deja si Jehova.

Ya buta con Jeremias el maga mal gente na un pozo que bien malodo. Nuay ele comida o agua y ya deja con ele alla para muri. Pero ya ayudá si Jehova con Jeremias poreso ya puede le escapa!

Cosa tu ya puede aprende na istoria de Jeremias?— Ya continua le converza acerca con Jehova maskin pa ya tiene le miedo. Si man cuento tu con el maga gente acerca con Jehova, baká gangguia y rabia sila contigo. Siguro, hay sinti tu huya o tiene miedo kanila. Maskin ansina pa man, continua siempre converza acerca con Jehova. Igual con Jeremias, ayudá tambien contigo si Jehova.