Facil ba pirmi creé con el de tuyu mayores?— Gendeh se facil tiene vez. Sabe ba tu si con quien obediente si Jesus?— Obediente le con Jehova y con el de suyu mayores. El de suyu ejemplo puede ayudá contigo queda obediente con el de tuyu mayores maskin gendeh este facil hace. Hay aprende kita mas acerca con ese.

Antes vene na tierra si Jesus, junto le na cielo con el de suyu Tata, si Jehova. Pero tiene tambien le mayores aqui na tierra. El nombre del tata amo si Jose y el nana, si Maria. Sabe ba tu si paquemodo sila ya queda mayores de Jesus?—

Ya hace si Jehova un milagro para puede engranda si Jesus na bariga de Maria igual con el otro maga bata ya engranda na bariga del diila maga nana. Despues el nueve meses, ya nace si Jesus. Ese el cosa ya pasa poreso si Jose y Maria el ya queda tata’y nana de Jesus aqui na tierra.

Cuando 12 año si Jesus, tiene le cosa ya hace para dale mira que ta ama gayot le con el de suyu Tata, si Jehova. Ya anda le y el de suyu familia na Jerusalem para adora con Jehova. Pero cuando pabolbida ya, nuay mira kanda Jose y Maria con Jesus. Sabe ba tu si onde le ya anda?—

Ya bira dayun kanda Jose y Maria na Jerusalem para busca con Jesus. Malingasa sila cay nuay siempre sila incuntra con ele. Pero despues el tres dia, ya mira sila con ele na templo! Sabe ba tu si porque na templo si Jesus?— Cay puede le aprende alla acerca con el de suyu Tata, si Jehova. Ta ama le con Jehova y quierre le sabé si paquemodo hace alegre con el de suyu Tata. Obediente siempre si Jesus con Jehova maskin cuando soltero ya le. Ya creé siempre le maskin gendeh quel facil hace y necesita le sufri. Obediente ba tambien si Jesus con Jose y Maria?— Si, ya habla el Biblia.

Cosa tu ya puede aprende na ejemplo de Jesus?— Debe tu queda obediente na de tuyu mayores maskin pa tiene vez gendeh este facil. Hay hace ba tu se?—