LECCION 3
Ya Confia si Rahab con Jehova
Quierre ba tu bira na tiempo de antes? Imagina que talla kita na ciudad de Jerico, na tierra del Canaan. El maga gente na ese lugar gendeh ta creé con Jehova. Alli ta queda el un mujer que el nombre, Rahab.
Cuando bata pa si Rahab, ya puede le oi el istoria si paquemodo ya parti si Moises con el Colorao Mar y ya guiá con el maga Israelita pa-afuera estaba na Egipto. Ya sabé tambien le si paquemodo ya ayudá si Jehova kanila ganá na guerra contra na diila maga contrallo. Ahora, ya oi le noticia que el campo del maga soldao Israelita cerca ya na Jerico!
Ya ayudá si Rahab con el maga espia cay ta confia le con Jehova
Un noche, dos Israelita el pa-escondido ya anda na Jerico. Ta llama kanila maga espia. Ya anda sila na casa de Rahab y ya manda le kanila entra. Durante quel noche, ya sabé el rey de Jerico que talla na ciudad el maga espia y ta esta na casa de Rahab. Poreso, ya manda le cuji kanila. Pero ya esconde si Rahab con el dos espia na techo del de suyu casa y ya habla le con el maga gente del rey: ‘Taqui sila enante pero ya salé ya sila. Si hace ustedes kanila apas, hay alcanza pa ustedes kanila!’ Sabe ba tu si porque ya ayudá si Rahab con el maga espia?— Cay ta creé le con Jehova y sabe le que hay dale si Jehova con el tierra de Canaan na maga Israelita.
Antes ya salé el maga espia na casa de Rahab, ya promete sila que hay salva si Rahab y el de suyu familia si destroza ya con el Jerico. Sabe ba tu si cosa sila ya manda hace con Rahab?— Ya habla sila: ‘Hace bitay afuera na bentana este colorao amarro para todo aquellos adentro na de tuyu casa hay salva.’ Ese gayot el cosa ya hace si Rahab. Sabe ba tu cosa ya pasa acabar quel?—
Ya salva si Jehova con Rahab y con el de suyu familia
Despues el cuanto dia, silencio ya marcha el maga Israelita alreredor del ciudad. Seis dia sila ya marcha, una vez na cada dia. Pero del ika-siete dia, ya marcha sila siete beses y ya grita bien suena. Ya hace tumba si Jehova con el maga pader del ciudad fuera el casa que
tiene colorao amarro. Ta puede ba tu este mira na letrato?— Ya salva si Rahab y el de suyu familia!Cosa tu ya puede aprende con Rahab?— Ya confia si Rahab con Jehova cay manada le maga buen cosas que ya sabé acerca con Ele. Manada tambien tu maga buen cosas ta sabé acerca con Jehova. Hay confia ba tambien tu con ele igual con Rahab?— Claro que si!
LE NA DE TUYU BIBLIA
-
Maga Hebreo 11:31