LECCION 2
Quierre si Rebeca Hace Alegre con Jehova
Ta ama si Rebeca con Jehova. El de suyu marido, si Isaac, ta ama tambien con Jehova. Paquemodo yan conocijan si Rebeca y si Isaac? Paquemodo le ya demonstra que quierre le hace alegre con Jehova? Hay sabé ta.
Anak de Abraham y Sara si Isaac. Ta queda sila na Canaan donde el maga gente gendeh ta adora con Jehova. Pero quierre si Abraham que casá de suyu anak na un mujer que ta adora con Jehova. Poreso ya manda le con el de suyu ayudante, posiblé si Eliezer, para busca mujer para con Isaac na un lugar que ta llama Haran. Alla ta queda el cuanto maga pariente de Abraham.
Ya saca agua si Rebeca para na maga camello maskin bien cansao trabajo quel
Si Eliezer y el otro pa maga ayudante de Abraham ya principia el bien largo viaje para na Haran. Ya lleva sila diez camello que ta cargá maga comida y regalo. Paquemodo man puede iscuji mujer si Eliezer para con Isaac? Cuando ya llega si Eliezer y el de suyu maga ubán na Haran, ya descanza sila na un pozo cay sabe le que ta anda alla el maga mujer para saca agua. Ya reza le con Jehova y ya habla: ‘Si pidi yo agua con el un dalaga y hay dale le agua para conmigo y para na de mio maga camello, quierre decir ele el mujer que ya iscuji tu.’
Nuay dura, ya llega na pozo si Rebeca. El Biblia ta habla que bien bonita le. Ya
pidi con ele agua si Eliezer y si Rebeca ya habla: ‘Si, dale yo agua contigo y hay saca tambien yo agua para na de tuyu maga camello.’ El maga camello ta toma bien manada agua poreso si Rebeca necesita man bira-bira na pozo. Ta mira ba tu na letrato si paquemodo de trabajadora si Rebeca?— Bien alegre si Eliezer cay ya contesta si Jehova con el de suyu rezo.Ya dale si Eliezer maga bonito regalo con Rebeca. Ya invita si Rebeca con Eliezer y con el de suyu maga ubán na diila casa. Ya habla si Eliezer si porque ya manda con ele anda alla si Abraham y si paquemodo ya contesta si Jehova con el de suyu rezo. Alegre el familia de Rebeca que casá le con Isaac.
Ya anda na Canaan si Rebeca junto con Eliezer y ya casá con Isaac
Pero hay quierre gahah casá si Rebeca con Isaac?— Sabe si Rebeca que si Jehova el ya manda anda alla con Eliezer. Poreso, cuando ya preguntá con ele el de suyu familia si quierre ba le anda na Canaan y casá con Isaac, ya contesta le: ‘Si, quierre yo anda.’ Aquel mismo hora, ya larga le viaje junto con Eliezer. Cuando ya llega sila na Canaan, ya casá le con Isaac.
Cay ya hace si Rebeca el cosa quierre si Jehova, ya bendici con ele si Jehova. Despues el cuanto maga año, na de suyu familia ya salé si Jesus! Si quierre tu hace alegre con Jehova igual con Rebeca, hay bendici tambien contigo si Jehova.