LECCION 5
Ya Hace Pirmi si Samuel si Cosa el Bueno
Desde bata pa si Samuel, ta queda y ta trabaja ya le na tabernaculo. Este el lugar donde ta adora el maga gente con Jehova. Sabe ba tu si paquemodo ya guinda alla si Samuel? Aprende kita una acerca con el de suyu nana, si Ana.
Ya dura ya quierre tiene anak si Ana pero gendeh le ta tiene. Poreso, ya reza le con Jehova que dale con ele anak. Ya promete le que si hay tiene le anak hombre, lleva le con este para queda y trabaja na tabernaculo. Ya contesta si Jehova con el de suyu rezo. Y el nombre del de suyu anak amo si Samuel. Igual como cosa ya promete si Ana con Jehova, cuando trez o cuatro año ya si Samuel, ya lleva le con este na tabernaculo para sirvi con Dios.
Si Eli el alto sacerdote na tabernaculo. Ele el quien ta mira con el maga trabajo alla. Alla tambien ta trabaja el de suyu dos anak hombre. Na tabernaculo ta anda para adora con Dios poreso el maga gente alla debe hace pirmi si cosa el bueno. Pero el maga anak de Eli ta hace maga mal cosas y ya mira aquel si Samuel. Ya copiá ba si Samuel con el maga anak de Eli?— Nuay. Pirmi le ta hace si cosa el bueno como cosa con ele ya enseña de suyu mayores.
Cosa gahah debe hace si Eli con el de suyu maga anak?— Debe era le diciplina kanila y no mas ya manda trabaja na casa del Dios. Pero nuay se hace si Eli poreso ya rabia gayot si Jehova con ele y con el de suyu maga anak. Ya decidi si Jehova que castiga kanila.
Ya habla si Samuel con Eli el mensaje de Jehova
Un noche mientras ta durmi si Samuel, ya oi le que tiene quien ta llama con ele: ‘Samuel!’ Ya corre le para con Eli pero ya habla si Eli: ‘Nuay yo llama contigo.’ Ya sucede este tres beses. Poreso, ya habla si Eli con Samuel que si tiene quien hay llama otravez con ele, debe le habla: ‘Pabor converza Jehova cay iyo ta oi.’ Ese el cosa ya hace si Samuel. Ya habla con ele si Jehova: ‘Habla tu con Eli que hay castiga
yo con el de suyu familia por causa na maga mal cosas que ya hace sila.’ Facil gahah se habla con Eli?— Gendeh gayot. Pero maskin pa ya tiene miedo si Samuel, ya hace le el cosa ya manda con ele si Jehova. Ya sucede gayot el cosa ya habla si Jehova. Ya mata con el dos anak de Eli y ya muri tambien le.Un buen ejemplo si Samuel para kanaton. Ya hace le si cosa el bueno maskin pa el otro ta hace maga mal cosas. Quierre ba tu queda igual con Samuel y hace pirmi si cosa el bueno? Si hace tu se, hay queda gayot alegre si Jehova y el de tuyu mayores.