LECCION 7
Ta Sinti ba Tu que Solo-solo Lang Tu?
Mira tu con este bata na letrato. Gendeh ba solo-solo lang le y dol ta tiene miedo? Ya puede ya ba tu sinti igual ansina?— Todo kita ta sinti ansina tiene vez. Na Biblia, puede kita le acerca na maga amigo y amiga de Jehova quien ya sinti tambien igual ansina. Hay aprende kita acerca na uno kanila, si Elias.
Quierre mata si Jesabel con Elias
Bien largo tiempo antes ya nace si Jesus, ya vivi ya si Elias y ta queda na Israel. Si Ajab, el rey del Israel, gendeh ta adora con el deverasan Dios, si Jehova. Ele y el de suyu mujer, si Jesabel, ta adora con el gendeh deverasan Dios, si Baal. Poreso, mayoria del maga gente na Israel ta adora ya tambien con Baal. Bien mal clase de reyna si Jesabel y quierre le mata con el todo quien ta adora con Jehova, pati con Elias! Sabe ba tu si cosa ya hace si Elias?—
Ya escapa si Elias! Ya anda le na desierto y ya esconde na un cueva. Porque gahah quel ele ya hace?— Cay ya tiene le miedo. Pero gendeh debe tiene miedo si Elias. Porque man? Cay sabe le que si Jehova puede ayudá con ele. Ya dale ya mira si Jehova el de suyu poder con ele del antes. Ya imbia si Jehova fuego estaba na cielo para contesta el rezo de Elias. Poreso, puede gayot ayudá con ele si Jehova!
Paquemodo si Jehova ya ayudá con Elias?
Mientras talla si Elias na cueva, ya preguntá con ele si Jehova: ‘Cosa tu qui ta hace?’ Ya contesta si Elias: ‘Iyo ya lang el ta adora contigo. Solo-solo ya lang yo y ta tiene yo miedo cay mata tambien sila conmigo.’ Pensaba si Elias muerto ya el todo quien ta adora con Jehova. Pero si Jehova ya habla con ele: ‘Gendeh se deverasan. Tiene pa 7,000 quien ta adora conmigo. No tiene miedo. Manada pa yo cosa manda hace contigo!’ Alegre gahah si Elias na cosa ya habla si Jehova?—
Cosa tu ya puede aprende na istoria de Elias?— Gendeh tu debe tiene miedo o sinti que solo-solo lang tu. Tiene tu maga amigo y amiga quien ta ama con Jehova y contigo. Poderoso gayot si Jehova y hay ayudá le contigo pirmi! Alegre ba tu cay pirmi contigo ayudá si Jehova?—
LE NA DE TUYU BIBLIA
-
1 Maga Rey 19:3-18
-
Salmo 145:18
-
1 Pedro 5:9