Un jovencito si Timoteo quien alegre ayudá con el maga gente. Ya anda le na manada lugar para ayudá con otro. Por causa con ese, ya queda le bien alegre. Quierre ba tu sabé mas acerca con ele?—

Ya engranda si Timoteo na ciudad de Listra. Bata pa lang le, ya enseña ya con ele acerca con Jehova el de suyu lola, si Loida y su nana, si Eunice. Mientras ta engranda si Timoteo, quierre le ayudá con otro conocé con Jehova.

Joven pa si Timoteo cuando ya convida con ele si Pablo anda na otro maga lugar para enseña acerca con Jehova. Ya conforma si Timoteo y alegre le anda ayudá con otro.

 Ya anda si Pablo junto con Timoteo na Tesalonica, un ciudad na Macedonia. Para llega alla, necesita sila camina bien lejos y munta barco. Cuando ya llega sila alla, ya puede sila ayudá con el mucho maga gente conocé con Jehova. Pero ya rabia kanila el otro y quierre kanila hace sinti duele. Poreso, ya salé sila alla y ya enseña na otro maga lugar.

Despues del cuanto meses, ya manda bira si Pablo con Timoteo na Tesalonica para mira si cosa el situacion del maga hermano alla. Makamiedo gayot bira con aquel ciudad! Pero ya bira siempre si Timoteo cay malingasa le con el maga hermano alla. Tiene le buen noticia cuando ya bira le con Pablo. Enbuenamente gayot el situacion del maga hermano y hermana na Tesalonica!

Ya sirvi si Timoteo junto con Pablo por cuanto año. Asegun con Pablo, si Timoteo el de con todo bueno que puede le imbia para ayudá na maga congregacion. Ta ama gayot si Timoteo con Jehova y con el maga gente.

Ta ama ba tu con el maga gente y quierre ayudá kanila conocé con Jehova?— Si hace tu se, hay queda tu bien alegre igual con Timoteo!