Ya puede ya ba habla contigo secreto?— * Tiene un especial secreto que el Biblia ta habla. Especial este cay estaba este con Dios. Y un secreto cay nusabe el maga gente acerca con este. Maskin el maga angél quierre sabé mas acerca con este. Quierre ba tu sabé si cosa este secreto?—

Cuanto año ya el ya pasa, ya crea el Dios con el primer hombre y mujer, si Adan y Eva. Ya dale kanila el Dios un bonito lugar que ya llama jardin de Eden. Si ya creé si Adan y Eva con Dios, puede era sila hace paraiso con el entero mundo igual con aquel jardin junto con el diila maga anak. Y hay vivi sila na Paraiso hasta para cuando. Pero ta acorda pa ba tu si cosa ya hace si Adan y Eva?—

Si Adan y Eva nuay creé con Dios poreso gendeh mas paraiso el tierra ahora. Pero ya habla el Dios que hay hace le bonito con el entero mundo y todo hay vivi con alegria hasta para cuando. Paquemodo este sucede? Del antes, un secreto pa este poreso nusabe pa el maga gente.

Cuando ya vene si Jesus na tierra, ya enseña le con el maga gente acerca con este secreto. Ya habla le que acerca este na Reino del Dios. Ya enseña reza si Jesus con el maga gente que manda vene con este Reino. Hay hace este un bonito paraiso con el entero mundo.

Quierre ba tu sabé con este secreto?— Aquellos lang quien ta creé con Jehova hay queda na Paraiso. Manada istoria el Biblia acerca na maga hombre y mujer quien ya creé con Jehova. Quierre ba tu conocé kanila?— Hay conocé kita con el cuanto kanila y aprende si paquemodo kita queda igual kanila.