LECCION 12
Valiente el Subrino de Pablo
Conocé kita ahora con el un jovencito quien ya salva con el vida del de suyu tio. Subrino le de apostol Pablo. No sabe kita el de suyu nombre pero tiene le cosa ya hace que ya dale mira que valiente gayot le. Quierre ba tu sabé si cosa le ya hace?—
Yan preso si Pablo na Jerusalem. Ya arresta con ele cay ta enseña le con otro acerca con Jesus. Rabiao el maga gente con Pablo poreso tiene sila mal plano con ele. Ya habla sila: ‘Hay habla ta con el lider del maga soldao que lleva con Pablo na corte. Despues, esconde kita na camino para si pasa si Pablo, hay mata kita con ele!’
Ya avisa el subrino de Pablo con su tio y con el lider del maga soldao acerca el mal plano
Ya sabé el subrino de Pablo con el diila plano. Cosa gahah le hace? Ya anda le na preso y ya avisa con Pablo. Ya manda dayun con ele si Pablo anda con el lider del maga soldao para habla el mal plano. Facil gahah quel para na subrino de Pablo?— Gendeh, cay un alto oficial quel del maga soldao. Pero bien valiente el subrino de Pablo y ya converza le con aquel lider.
Sabe el lider si cosa le debe hace. Ya llama le cerca 500 maga soldao para protege con Pablo! Ya manda le kanila lleva con Pablo na Cesarea aquel mismo noche. Ya salva ba si Pablo?— Si, nuay con ele puede hace sinti duele el maga mal gente! Nuay gayot porsigui el diila mal plano.
Cosa tu ya puede aprende con este istoria?— Puede tu queda valiente igual con el subrino de Pablo. Gendeh kita debe tiene miedo converza con otro acerca con Jehova. Queda ba tu valiente y continua man cuento acerca con Jehova?— Si hace tu se, puede tambien tu salva el vida del otro.
LE NA DE TUYU BIBLIA
-
Maga Actividad 23:12-24
-
Mateo 24:14; 28:18-20
-
1 Timoteo 4:16