Ta mira ba tu con este maga hombre na letrato?— Sila kanda Mateo, Marcos, Lucas, Juan, Pedro, Santiago, Judas y Pablo. Todo sila ya vivi na tiempo de Jesus y ya escribi sila acerca con ele. Hay conocé kita mas acerca kanila.

El tres kanila amo maga apostoles quien ya sigui con Jesus enseña acerca con Jehova. Conoce ba tu si quien sila?— Kanda Mateo, Juan y Pedro. Bien conoce gayot  kanda Mateo y Juan con Jesus y cada uno kanila ya escribi un libro acerca na vida de Jesus. Ya escribi si apostol Juan con el un libro que ya llama Revelacion y tres carta que ya llama Primer San Juan, Segundo San Juan y Tercero San Juan. Mientras si apostol Pedro ya escribi dos carta que puede le na Biblia. Ya llama con este Primer Pedro y Segundo Pedro. Na segundo carta de Pedro, ya escribi le acerca el tiempo cuando ya converza si Jehova estaba na cielo y ya habla acerca con Jesus: ‘Este el de mio anak. Ta ama yo con ele y alegre yo na cosa le ta hace.’

El otro maga hombre na letrato ya escribi tambien libro acerca con Jesus. Uno kanila amo si Marcos. Posiblé, talla le cuando ya arresta con Jesus y ya mira el todo cosa ya pasa. El otro uno amo si Lucas. Un doctór le y posiblé ya queda Cristiano despues muri si Jesus.

El otro dos hombre quien ya escribi libro na Biblia amo el maga hermano menor de Jesus. Sabe ba tu diila maga nombre?— Si Santiago y Judas. Del primero, gendeh sila ta creé con Jesus. Ya pensa pa gane sila que ya queda ya le loco. Pero na uliji, ya creé ya sila con Jesus y ya queda maga Cristiano.

El ultimo hombre amo si Pablo. Antes le queda Cristiano, Saul el de suyu nombre. Rabiao le con todo maga Cristiano y ta maltrata kanila. Sabe ba tu si paquemodo le ya queda un Cristiano?— Un dia, mientras ta anda si Pablo para na Damasco, ya oi le que tiene quien tan cuento con ele estaba na cielo. Si Jesus quel! Ya preguntá le con Pablo: ‘Porque tu ta maltrata con aquellos quien ta creé conmigo?’ Despues quel, ya queda buen gente si Pablo y ya queda Cristiano. Ya escribi le 14 libro na Biblia, principia na libro de Roma hasta na Maga Hebreo.

Ta le kita Biblia cada dia, gendeh ba?— Si ta le kita Biblia, hay aprende kita manada cosas acerca con Jesus. Quierre ba tu sabé mas acerca con Jesus?—