1. Cosa rezo kita hay discuti ahora?

MILLONES de gente sabe con el rezo que ta llama Padre Nuestro o el Rezo del Señor. Ya usa si Jesus con este rezo para enseña con el de suyu maga dicipulo si paquemodo reza. Cosa le ya pidi na de suyu rezo? Y porque importante este rezo para kanaton ahora?

2. Cosa el tres importante cosas que ya enseña si Jesus pidi kita na rezo?

² Si Jesus ya habla: “Ansina ustedes reza: Tata diamon na cielo, dale gloria [santifica, NW] con el de Uste Nombre. Manda vene el de Uste Reino. Hace el de Uste voluntad aqui na mundo como alli na cielo.” (Le con el Mateo 6:9-13.) Porque kanaton ya enseña si Jesus que pidi con ese tres cosas na rezo?​—Mira con el Endnote 20.

3. Cosa kita debe sabé acerca na Reino del Dios?

³ Ya aprende kita que Jehova el nombre del Dios. Y ya discuti kita si cosa el voluntad del Dios para na maga gente y para na tierra. Pero cosa quierre decir cuando ya habla si Jesus: “Manda vene el de Uste Reino”? Hay discuti kita si cosa el Reino del Dios, cosa este hace y si paquemodo este santifica con el nombre del Dios.

4. Cosa el Reino del Dios y quien el Rey de este?

⁴ Ya formá si Jehova un gobierno na cielo y ya iscuji le con Jesus para queda el Rey de este. El Biblia ta llama  con este Reino del Dios. Si Jesus amo ‘el Rey del maga rey y el Señor del maga señor.’ (1 Timoteo 6:15) Mas manada cosa bueno puede hace si Jesus y mas poderoso le compara con el maskin quien persona que ta rula ahora.

5. Onde hay rula el gobierno del Dios y para onde?

⁵ Cuarenta dia despues el resureccion de Jesus, ya bira le na cielo. (1 Pedro 3:22) Ya llega el tiempo, ya hace con ele si Jehova el Rey del Reino. El gobierno del Dios hay rula na cielo para aqui na tierra. (Revelacion 11:15) Poreso, ta llama el Biblia con el Reino del Dios como un “Reino na cielo.”​—2 Timoteo 4:18.

6, 7. Porque si Jesus mas bueno pa contra na otro maga rey?

⁶ El Biblia ta habla que si Jesus mas pa que con el otro maga rey na tierra cay ele “el unico quien gendeh ta muri.” (1 Timoteo 6:16) Ta muri el todo maga gente quien ta rula na mundo pero si Jesus gendeh gayot hay muri. Todo maga buen cosas que hay hace si Jesus para kanaton hay esta hasta para cuando.

⁷ El profecia na Biblia ta habla que hay queda un lastimoso y buen Rey si Jesus: “El espiritu de Jehova hay esta con ele, el espiritu de sabeduria y de entendimiento, el espiritu de consejo y de poder, el espiritu de saber y de miedo con Jehova. Hay tiene le alegria na miedo con Jehova. Gendeh le juzga base lang na cosa le ta mira o regaña [o dale consejo] base lang na cosa le ta oi. Hay juzga le con el maga pobre con justicia.” (Isaias 11:2-4) Quierre ba tu que ansina el de tuyu rey?

8. Porque kita puede habla que gendeh solo si Jesus hay rula?

⁸ Ya iscuji el Dios cuanto maga gente para rula junto con Jesus na gobierno na cielo. Por ejemplo, ya habla si  apostol Pablo con Timoteo: “Si ay aguanta kita con fidelidad, ay reina tamen kita junto con Ele.” (2 Timoteo 2:12) Cuanto el rula como rey junto con Jesus?

9. Cuanto hay rula junto con Jesus? Del cuando ya principia iscuji si Jehova kanila?

⁹ Como cosa kita ya aprende na Capitulo 7, ya dale vision con apostol Juan donde ya mira le con Jesus como el Rey na cielo junto con el 144,000. Quien este 144,000? Asegun con Juan, “el Nombre del Carnero [Jesus] y el Nombre del disuyo Tata marcao na diila frente.” Y ya habla pa le: “Sila amo aquellos quien ta sigui con el Carnero maskin donde Le ta anda. Sila amo aquellos con quien ya rescata entre los demas maga gente.” (Le con el Revelacion 14:1, 4.) Este 144,000 amo maga fiel Cristiano con quien ya iscuji el Dios “para goberna con el mundo” junto con Jesus. Hay resucita kanila para na cielo despues del diila muerte. (Revelacion 5:10) Ya principia na tiempo del maga apostoles, ya iscuji si Jehova maga fiel Cristiano para queda parte del 144,000.

10. Porque el iscujida con Jesus y con el 144,000 para rula na maga gente un prueba del amor de Jehova?

¹⁰ Ta ama gayot kanaton si Jehova poreso ya iscuji le maga gente para rula junto con Jesus. Hay queda un buen rey si Jesus cay ta entende le kanaton. Ya experienciá si Jesus vivi como un gente y ya sufri tambien le. Ya habla si Pablo que ta sinti si Jesus si cosa kita ta sinti, ta puede le “sinti el paca-maluya diaton” y ele “ya sufri tentacion na todo maga cosa-cosa igual canaton.” (Maga Hebreo 4:15; 5:8) Y ansina tambien el 144,000. Ya pasa sila tormento por causa na imperfeccion y enfermedad. Poreso, puede kita asigura que si Jesus y el  144,000 hay entende si cosa kita ta sinti y si cosa maga problema kita ta enfrenta.

11. Porque ya enseña si Jesus con el de suyu maga dicipulo reza que hace el voluntad del Dios na cielo?

¹¹ Ya enseña si Jesus con el de suyu maga dicipulo reza que hace el voluntad del Dios na cielo. Porque? Ya aprende kita na Capitulo 3 que yan rebelde si Satanas Diablo contra con Jehova. Despues le man rebelde, ya permiti si Jehova con ele y con el maga gendeh fiel angel que esta na cielo por cuanto tiempo. Poreso, gendeh todo que talla na cielo ta hace el voluntad del Dios. Na Capitulo 10, hay aprende kita mas acerca con Satanas y con el maga demonio.

12. Cosa dos bien importante suceso que puede le na Revelacion 12:10?

¹² Asegun na Biblia, despues hace Rey con Jesus na Reino del Dios hay man guerra le dayun contra con Satanas. (Le con el Revelacion 12:7-10.) Tiene dos bien importante suceso que puede le na versiculo 10. Ya principia rula el Reino del Dios donde si Jesus el Rey y ya buta con Satanas estaba na cielo para na tierra. Como cosa kita hay aprende, ya sucede ya este.

13. Cosa ya pasa na cielo despues buta con Satanas?

¹³ Ta habla el Biblia si paquemodo de alegre el maga fiel angel na cielo despues buta con Satanas y con el de suyu maga demonio. Puede kita le: ‘Alegre maga cielo y maga viviente na cielo.’ (Revelacion 12:12) Tiene ya ahora paz y unidad na cielo cay todo alla ta hace el voluntad del Dios.

14. Cosa ya pasa na tierra cuando ya buta con Satanas estaba na cielo?

¹⁴ Pero bien diferente el situacion na tierra. Ya sucede  maga mal cosas na maga gente “cay el diablo ya abaja . . . y bien rabiao gayot ele cay sabe le que el di suyo tiempo corto ya lang!” (Revelacion 12:12, El Nuevo Testamento) Bien rabiao si Satanas. Ya buta con ele estaba na cielo y sabe le que bien cerca ya con ele destroza. Ta hace le todo manera para causá problema, dolor y sufrimiento na entero tierra.

15. Cosa el voluntad del Dios para na tierra?

¹⁵ Pero nuay cambia el voluntad del Dios para na tierra. Quierre siempre le que vivi el maga gente na paraiso tierra hasta para cuando. (Salmo 37:29) Pero, paquemodo el Reino del Dios hace posible con este?

16, 17. Cosa kanaton ta habla el Daniel 2:44 acerca na Reino del Dios?

¹⁶ El profecia na Daniel 2:44 ta habla: “Na tiempo de aquellos maga rey, el Dios na cielo hay formá un reino que nunca hay destroza. Y gendeh hace pasa con este reino na maskin quien gente. Este hay machaca y termina con este todo maga reino, y este solamente hay esta hasta para cuando.” Cosa kanaton ta enseña este profecia acerca na Reino del Dios?

¹⁷ Una, ta habla este kanaton que el Reino del Dios hay principia rula “na tiempo de aquellos maga rey.” Quierre decir, hay principia rula el Reino mientras ta existi pa el otro maga gobierno na tierra. Ika-dos, ta habla este kanaton que el Reino del Dios hay rula hasta para cuando y nuay otro gobierno hay cambia con este. Y ika-tres, hay tiene guerra entre el Reino del Dios y el todo gobierno de este mundo. El Reino del Dios hay gana y este el solamente gobierno que hay rula na entero mundo. Despues, el maga gente hay tiene el de con todo buen gobierno.

18. Cosa ta llama con el guerra entre el Reino del Dios y del todo gobierno de este mundo?

 ¹⁸ Paquemodo guinda na Reino del Dios el rulanza na entero tierra? Antes de sucede el ultimo guerra que ya llama Armagedon, el maga demonio hay engaña con “todo el maga rey na mundo para ajunta canila para na guerra del Grande Dia del Dios todopoderoso.” Si, hay tiene guerra entre el gobierno del maga gente y el Reino del Dios.​—Revelacion 16:14, 16; mira con el Endnote 10.

19, 20. Porque kita necesita con el Reino del Dios para rula na entero tierra?

¹⁹ Porque kita necesita con el Reino del Dios? Tiene tres razon. Una, todo kita tiene pecado poreso ta enferma y ta muri kita. Pero el Biblia ta habla que bajo na Reino del Dios, hay vivi kita hasta para cuando. Gane, el Juan 3:16 ta habla: “Ansina gayot de grande el amor del Dios para con el mundo: que ya dale Le su Unico Anak para todo quien ta cree con Ele gendeh ay muri, sino ay tene Vida hasta para cuando.”

²⁰ El ika-dos razon si porque necesita kita con el Reino del Dios amo que bien manada mal gente alreredor kanaton. Manada gente el imoral y tan imbusterias. Nuay kita cosa puede hace para quita kanila pero el Dios hay quita kanila na Armagedon. Ele hay destroza con el todo maga gente quien ta hace mal cosas. (Le con el Salmo 37:10.) El ika-tres razon si porque kita necesita con el Reino del Dios amo que el gobierno del gente nuay lastima y lleno de corapcion. Nuay sila interes ayudá con el maga gente para obedece con Dios. El Biblia ta habla que “el gente ya domina con el gente para na de suyu perjuicio.”​—Eclesiastes 8:9.

21. Paquemodo asigura el Reino que el voluntad del Dios hay hace aqui na tierra?

 ²¹ Despues del Armagedon, el Reino del Dios hay asigura que el voluntad del Dios hay hace aqui na tierra. Por ejemplo, hay quita este con Satanas y con el de suyu maga demonio. (Revelacion 20:2) Nuay mas quien hay enferma y muri llega el tiempo. Por causa na rescate, todo maga fiel gente hay vivi hasta para cuando na Paraiso. (Revelacion 22:1-3) El Reino hay santifica con el nombre del Dios. Quierre decir, si rula ya el gobierno del Dios na tierra todo maga gente hay honra con el nombre de Jehova.​—Mira con el Endnote 21.

22. Porque kita puede habla que nuay queda Rey si Jesus cuando taqui le na tierra o dayun despues con ele ya resucita?

²² Ya enseña si Jesus con el de suyu maga dicipulo reza: “Manda vene el de Uste Reino.” Poreso bien claro que na futuro pa llega el gobierno del Dios. Hay formá una si Jehova con el de suyu gobierno y hace con Jesus el Rey de este. Ya hace ba dayun Rey con Jesus cuando ya bira le na cielo? Nuay, sino debe pa le espera. Cuanto  tiempo despues el resurreccion de Jesus, ya hace se claro si Pedro y Pablo cuando ya aplica sila el profecia na Salmo 110:1 con Jesus. Na profecia, si Jehova ya habla: “Sinta tu na dimio lao derecha hasta ay pone yo con el dituyo maga contrario abajo na dituyo pies.” (Maga Actividad 2:32-35; Maga Hebreo 10:12, 13) Paquemodo de largo tiempo debe espera si Jesus antes con ele hace Rey si Jehova?

23. (a) Cuando ya principia rula si Jesus como Rey na gobierno del Dios? (b) Cosa kita hay aprende na siguiente capitulo?

²³ Por cuanto año antes del 1914, sabe el un grupo de maga sincero Cristiano que un importante año el 1914 na profecia del Biblia. Desde aquel año, el maga suceso na mundo ya dale prueba que justo sila. Ya principia rula si Jesus como Rey na ese año. (Revelacion 6:2) Y despues, ya buta le dayun con Satanas na tierra y ahora “el di suyo tiempo corto ya lang.” (Revelacion 12:12, El Nuevo Testamento) Na siguiente capitulo, hay mira kita mas prueba que ta vivi ya kita na ese tiempo. Hay aprende tambien kita que gendeh mas dura el Reino del Dios hay asigura que el voluntad del Dios hay hace aqui na tierra.​—Mira con el Endnote 22.