1, 2. Quien el cuanto maga amigo de Jehova?

QUIEN tu quierre queda de tuyu amigo? Aquel con quien tu ta gusta y tan uyun. Aquel quien tiene personalidad y custumbre que ta gusta tu.

² Ya iscuji si Jehova cuanto maga gente para queda de suyu maga amigo. Uno ya alli si Abraham. (Isaias 41:8; Santiago 2:23) Amigo tambien de Jehova si David. Ele ya habla que ‘ya gusta gayot le’ con David. (Maga Actividad 13:22) Y “bien precioso” si profeta Daniel con Jehova.​—Daniel 9:23.

3. Porque amigo de Jehova kanda Abraham, David y Daniel?

³ Paquemodo ya queda amigo de Jehova kanda Abraham, David y Daniel? Ya habla si Jehova con Abraham: “Ya oi tu el de mio voz.” (Genesis 22:18) Ta queda amigo de Jehova aquellos quien ta obedece con ele. Maskin un nacion de gente puede queda de suyu maga amigo. Ya explica si Jehova con el nacion del Israel: “Obedece ustedes conmigo y hay queda yo de ustedes Dios y hay queda ustedes de mio maga gente.” (Jeremias 7:23) Poreso, si quierre gayot tu queda amigo de Jehova necesita tambien tu obedece con ele.

4, 5. Paquemodo ta protege si Jehova con el de suyu maga amigo?

⁴ El Biblia ta habla que ta busca manera si Jehova “para dale mira el de suyu fuerza para con aquellos quien completo  el corazon para con ele.” (2 Cronicas 16:9) Na Salmo 32:8, si Jehova ya promete con el de suyu maga amigo: “Hay dale yo contigo el hondo entendimiento y enseña contigo el camino que debe tu camina. Hay dale yo contigo consejo mientras el de mio ojos ta mira contigo.”

⁵ No quierre el un poderoso enemigo que queda kita amigo del Dios. Pero quierre kanaton protege si Jehova. (Le con el Salmo 55:22.) Como maga amigo de Jehova, ta sirvi kita con ele con todo corazon. Leal kita con ele maskin ta enfrenta kita maga dificultad. Y tiene kita confianza igual con apostol Pablo. Ya escribi le acerca con Jehova: “El Señor amo el quien ta ayuda conmigo. Gendeh yo ay tene miedo.” (Maga Hebreo 13:6) Cosa ta hace si Satanas para gendeh mas kita queda amigo del Dios?

6. Cosa el acusacion de Satanas con el maga gente?

⁶ Na Capitulo 11 ya aprende kita que ya acusa si Satanas que imbustero si Jehova y gendeh justo el de suyu rulanza cay nuay si Jehova permiti con Adan y Eva que decidi si cosa el justo para kanila y si cosa el gendeh. El libro de Job na Biblia ta enseña kanaton que ta acusa tambien si Satanas con el maga gente quien quierre queda amigo del Dios. Ya clama si Satanas que ta sirvi el maga gente con Dios cay tiene sila cosa puede saca con Ele y gendeh por causa na amor. Ya clama tambien si Satanas que puede le hace bira maskin con quien contra con Dios. Mira kita si cosa kita puede aprende con Job y si paquemodo con ele ya protege si Jehova.

7, 8. (a) Quien si Job? (b) Cosa ya habla si Satanas acerca con Job?

⁷ Quien si Job? Un buen gente ele quien ya vivi maga 3,600 año ya el ya pasa. Ya habla si Jehova que nuay igual con ele na tierra aquel tiempo. Si Job tiene hondo  respeto con Dios y ya odia le si cosa el malo. (Job 1:8) Si, un deverasan amigo de Jehova si Job.

⁸ Ya clama si Satanas que ta sirvi lang si Job con Dios cay tiene le beneficio. Ya habla si Satanas con Jehova: “Gendeh ba ya pone uste corral alrededor con ele y na de suyu casa y na todo cosa que tiene le? Ya bendici uste el todo cosa le ta hace y ya queda manada el de suyu maga animal na tierra. Pero, para cambia tambien, estira de uste mano y mete el todo cosa que tiene le y asigurao que hay maldeci le con uste na de uste mismo cara.”​—Job 1:10, 11.

9. Cosa ya permiti si Jehova que hace si Satanas?

⁹ Ya acusa si Satanas que ta sirvi lang si Job con Jehova cay tiene le cosa ta puede saca. Ya clama tambien le que tiene le cosa puede hace para gendeh mas sirvi si Job con Jehova. Sabe si Jehova que gendeh se deverasan pero ya permiti le que pone si Satanas na probanza con Job para mira si deverasan ba le amigo y ta ama con Jehova.

10. Paquemodo ya pruba si Satanas con Job y cosa el reaccion de Job?

¹⁰ Una, ya ruba y ya destroza si Satanas con el todo maga animal de Job. Despues, ya mata le con el mayoria del maga ayudante de Job. Ya perde el todo que tiene si Job. Na ultimo, ya mata si Satanas con el diez anak de Job por medio na tifun. Pero ya esta leal si Job con Jehova. “Despues de todo, nuay culpa si Job o acusa que el Dios tiene cosa ya hace que gendeh justo.”​—Job 1:12-19, 22.

11. (a) Cosa pa ya hace si Satanas con Job? (b) Cosa el reaccion de Job?

¹¹ Nuay queda contento si Satanas. Ya habla le con Dios: “Mete el de suyu bukuk y laman y asigurao que hay maldeci le con uste na de uste mismo cara.” Ya dale  si Satanas con Job un bien duele enfermedad. (Job 2:5, 7) Pero si Job ya esta siempre leal con Jehova. Ele ya habla: “Hasta hay muri yo, gendeh yo hace perde el de mio integridad!”​—Job 27:5.

12. Paquemodo ya dale mira si Job que imbustero si Satanas?

¹² No sabe ni nada si Job acerca na acusacion de Satanas o si porque le ta sufri. Pensaba le si Jehova el causa del de suyu sufrimiento. (Job 6:4; 16:11-14) Pero maskin pa ansina, si Job ya esta leal con Jehova. Sin duda que si Job un amigo del Dios gendeh cay tiene le cosa ta puede saca sino cay ta ama le con Jehova. El acusacion de Satanas todo de imbusterias!

13. Cosa el resulta del lealtad de Job?

¹³ Maskin pa no sabe si Job si cosa ta sucede na cielo, ya esta le leal con Dios y ya dale prueba que bien malo si Satanas. Por causa na lealtad de Job, ya bendici con ele si Jehova.​—Job 42:12-17.

14, 15. Cosa el acusacion de Satanas con el todo gente?

¹⁴ Puede tu aprende importante leccion na cosa ya sucede con Job. Ahora, ta acusa si Satanas que ta sirvi kita con Jehova cay tiene kita cosa puede saca con Ele. Na Job 2:4, si Satanas ya clama: “Hay dale el un gente todo cosa que tiene le para na de suyu vida.” Entonces, ya acusa si Satanas con el todo gente gendeh lang con Job. Cuanto siglo despues del muerte de Job, ta insulta lang siempre si Satanas con Jehova y ta acusa con el de suyu maga siervo. Por ejemplo, puede kita le na Proverbio 27:11: “Queda sabio, mi anak y hace alegre con el de mio corazon, para puede yo contesta con el quien ta gangguia conmigo.”

¹⁵ Puede tu iscuji sirvi con Jehova y queda de suyu leal amigo para dale prueba que imbustero si Satanas.  Maskin pa tiene tu cosa debe cambia na de tuyu vida para queda amigo del Dios, ese el de con todo buen decicion que puede tu hace! Un serioso cosa este. Ta clama si Satanas que gendeh tu queda leal con Dios si ta enfrenta tu maga problema. Ta pricura le engaña kanaton para gendeh kita queda leal con Dios. Paquemodo?

16. (a) Cosa maga manera ta usa si Satanas para gendeh mas sirvi el maga gente con Jehova? (b) Cosa posible hace si Satanas para gendeh mas tu sirvi con Jehova?

¹⁶ Tiene diferente manera si Satanas que ta usa para gendeh mas kita queda amigo del Dios. Ta ataca le “igual como un leon que ta gruñi mientras ta busca con quien puede come.” (1 Pedro 5:8) No estraña si el de tuyu maga amigo, miembro na familia o el otro gente no quierre que continua tu estudia con el Biblia y hace si cosa el justo. Hay sinti tu que dol tiene quien ta ataca contigo. * (Juan 15:19, 20) Ta pretende tambien si Satanas “como angel del luz” para puede le kanaton engaña que desobedece con Jehova. (2 Corinto 11:14) El otro manera que ta usa si Satanas para gendeh mas kita sirvi con Jehova amo que ta manda le kanaton pensa que gendeh kita puede sirvi con Dios.​—Proverbio 24:10.

17. Porque kita ta obedece con Jehova?

¹⁷ Si ta obedece kita con Jehova, ta dale kita prueba que imbustero si Satanas. Cosa kanaton puede ayudá para queda obediente? El Biblia ta habla: “Ama con el Señor, el dituyo Dios, con todo el dituyo corazon, con todo el dituyo  alma y con todo el dituyo pensamiento.” (Mateo 22:37) Ta obedece kita con Jehova cay ta ama kita con ele. Mientras ta queda hondo el diaton amor con Jehova, hay quierre kita hace el todo cosa que ta manda le kanaton. Si apostol Pablo ya escribi: “Cay ama con el Dios quiere decir obedece su maga mandamiento. Y el disuyo maga mandamiento gendeh pesao.”​—1 San Juan 5:3.

18, 19. (a) Cosa el cuanto maga cosas que ya habla si Jehova que gendeh justo? (b) Porque kita puede habla que gendeh kanaton ta manda hace si Jehova maga cosas que gendeh kita puede hace?

¹⁸ Cosa el cuanto maga cosas que ya habla kanaton si Jehova que gendeh justo? Tiene maga ejemplo na cajon “ Odia con el Cosa Ta Odia si Jehova.” Na primero, baká pensa tu que gendeh bien malo el cuanto na maga cosas que ya menciona. Pero si le tu con el maga versiculo na Biblia y pensa con este enbuenamente, puede tu entende si porque justo que obedece con el maga mandamiento de  Jehova. Puede tambien tu sinti que tiene tu cosa debe cambia na de tuyu vida. Si hace tu ese maga cambio maskin pa tiene vez gendeh este facil, hay tiene tu paz y alegria cay un leal amigo tu del Dios. (Isaias 48:17, 18) Porque kita puede habla que puede kita hace con ese maga cambio?

¹⁹ Gendeh kanaton ta manda hace si Jehova maga cosas que gendeh kita puede hace. (Deuteronomio 30:11-14) Como un deverasan Amigo, mas conoce le kanaton que conoce kita con el diaton cuerpo. Sabe le el diaton maga abilidad y maga limitacion. (Salmo 103:14) Si apostol Pablo ya anima kanaton: “Tene comfianza con Dios cay gendeh Ele ay permiti que ustedes ay tene tentacion mas grande pa que con el de ustedes fuerza. Na contrario, junto con el tentacion, Ele ay dale con ustedes el fuerza para aguanta el tentacion y el manera para desaleja con ese.” (1 Corinto 10:13) Puede kita asigura que hay dale kanaton pirmi fuerza si Jehova para hace si cosa el justo. Hay dale le contigo  “grande poder” para puede tu enfrenta con el maga dificil situacion.​—2 Corinto 4:7.

20. Cosa maga calidad el debe tu imita y porque?

²⁰ Si quierre kita queda amigo de Jehova, gendeh kita debe hace el maga cosas que ya habla si Jehova que gendeh justo. Pero gendeh lang ese el cosa kita debe hace. (Roma 12:9) El maga amigo de Jehova ta ama si cosa le ta ama igual na cosa ya menciona na Salmo 15:1-5. (Le.) El maga amigo de Jehova ta imita con el de suyu maga calidad y ta dale mira el “amor, alegria, paz, paciencia, hacida de bueno con otro, pagka-bueno, fe, pagka-calmao y control na cuerpo.”​—Galacia 5:22, 23, NW.

21. Cosa tu hace para puede tu demonstra con el maga calidad que ta ama el Dios?

²¹ Cosa tu hace para puede tu demonstra con ese maga bonito calidad? Necesita tu aprende si cosa ta ama si Jehova por medio na lehida y regular estudiada de Biblia. (Isaias 30:20, 21) Mientras ta hace tu este, hay queda mas hondo el de tuyu amor con Jehova y ayudá se contigo que obedece con ele.

22. Cosa el resulta si obedece tu con Jehova?

²² El maga necesita cambio que hace tu na de tuyu vida igual lang como ta desnuda tu y ta bisti nuevo camisa. Ta habla el Biblia que necesita tu “quita el daan personalidad” y bisti “el nuevo personalidad.” (Colosa 3:9, 10, NW) Si hace kita con ese maga cambio y obedece con Jehova, maskin pa gendeh facil hace, ya promete le que dale le kanaton “grande premio.” (Salmo 19:11) Si, iscuji sirvi con Jehova y dale prueba que imbustero si Satanas. Sirvi con Jehova gendeh por causa na maga premio na futuro sino por causa na amor. Si hace tu se, hay queda tu deverasan amigo del Dios!