1. Quien ya dale kanaton vida?

SI Jehova amo el “vivo Dios.” (Jeremias 10:10) Ele el diaton Creador y el quien ya dale kanaton vida. El Biblia ta habla: “Uste amo el quien ya hace con el entero mundo y cay, por causa del de Uste voluntad, ya hace con todo maga cosa-cosa que tiene ahora.” (Revelacion 4:11) Si, quierre si Jehova que tiene kita vida. Un precioso regalo estaba con Dios el vida.​—Le con el Salmo 36:9.

2. Paquemodo kita puede vivi con alegria?

² Ya dale si Jehova el maga cosa que necesita kita para continua vivi, igual na comida y agua. (Maga Actividad 17:25) Pero mas pa con ese, quierre le que vivi kita con alegria. (Maga Actividad 14:15-17) Para queda kita alegre, necesita kita obedece con el maga ley del Dios.​—Isaias 48:17, 18.

3. Cosa ya hace si Jehova cuando ya mata si Cain con Abel?

³ Ta enseña el Biblia que precioso para con Jehova el diaton vida y del otro maga gente. Por ejemplo, cuando bien rabiao el anak de Adan y Eva, si Cain, con el de suyu hermano menor si Abel, ya habla si Jehova con ele que necesita le controla con el de suyu rabia. Pero nuay oi si Cain y por causa na de suyu rabia, ya ‘ataca le con el de suyu hermano, si Abel y ya mata con ele.’ (Genesis 4:3-8) Ya castiga si Jehova con Cain cay ya mata le con Abel. (Genesis 4:9-11) Poreso, peligroso el rabia y agrabio cay puede se causá para queda kita violente y nuay lastima. Si ansina el un persona, gendeh le puede tiene vida hasta para  cuando. (Le con el 1 San Juan 3:15.) Para puede kita hace alegre con Jehova, necesita kita aprende ama con el todo maga gente.​—1 San Juan 3:11, 12.

4. Cosa ta enseña el uno na maga ley que ya dale el Dios con el Israel acerca na regalo de vida?

⁴ Miles de año despues, ya dale mira si Jehova que precioso el vida para con ele cuando ya dale le el Diez Mandamiento con Moises. El uno del maga ley amo que “No mata.” (Deuteronomio 5:17) Si el un gente ya mata intencional con el un persona, hay mata tambien con ele.

5. Cosa ta sinti el Dios acerca na aborcion?

⁵ Cosa ta sinti el Dios acerca na aborcion? Precioso para con Jehova el vida del un bata maskin nuay pa este nace. Na Ley que ya dale si Jehova na maga Israelita, ya habla le que si tiene quien ya hace sinti duele con el un priñada y ya muri el bata, debe mata con aquel persona. (Le con el Exodo 21:22, 23; Salmo 127:3.) Este ta enseña kanaton que gendeh justo el aborcion.​—Mira con el Endnote 28.

6, 7. Paquemodo kita dale mira con Jehova que precioso kanaton el vida?

⁶ Paquemodo kita dale mira con Jehova que precioso kanaton el diaton vida y del otro? Necesita kita evita maga cosas que peligroso para na diaton vida y del otro gente. Poreso, gendeh kita debe usa tabaco, droga prohibido o man mamah cay gendeh se bueno para kanaton y puede queda causa del diaton muerte.

⁷ Ya dale kanaton el Dios vida y cuerpo poreso debe kita usa con ese asegun na de suyu querrer. Necesita kita cuida con el diaton cuerpo. Cay si gendeh kita se hace, hay queda kita mabuling na vista del Dios. (Roma 6:19; 12:1; 2 Corinto 7:1) Gendeh kita puede adora con Jehova, el quien ya dale kanaton vida, si gendeh precioso para kanaton el vida. Maskin pa dificil quita el maga  mal vicio, hay ayudá kanaton si Jehova si ta hace kita esfuerzo cay precioso para kanaton el vida.

8. Cosa kita hace para asigura que gendeh kita ta pone na peligro el diaton vida y del otro?

⁸ Ya aprende kita que un precioso regalo el vida. Ta confia si Jehova que hay hace kita el todo para gendeh pone na peligro el diaton vida y del otro. Ta hace kita este na manera si paquemodo kita ta maneja motor o otro vehiculo. Desaleja kita na maga peligroso o violente juego. (Salmo 11:5) Hace tambien kita el todo para puede asigura que lejos na peligro el maskin quien talli na diaton casa. Ya manda si Jehova con el maga Israelita: “Si construi ustedes un nuevo casa, debe tambien ustedes pone barandilla na techo, para gendeh ustedes lleva culpa de sangre na de ustedes casa si tiene quien cae alla.”​—Deuteronomio 22:8.

9. Paquemodo kita debe trata con el maga animal?

⁹ Maskin el manera si paquemodo kita ta trata con el maga animal importante con Jehova. Ta permiti le que mata kita animal para na diaton comida y ropa y si na peligro el diaton vida por causa na un animal. (Genesis 3:21; 9:3; Exodus 21:28) Pero gendeh kita debe hace pasipala o mata con el maga animal por juego lang.​—Proverbio 12:10.

10. Porque kita puede habla que ta representa el sangre con el vida?

¹⁰ Sagrao para con Jehova el sangre cay ta representa este con el vida. Despues mata si Cain con Abel, si Jehova ya habla con ele: “Ta grita conmigo el sangre del de tuyu hermano estaba na tierra.” (Genesis 4:10) El sangre de Abel ta representa con el de suyu vida y ya castiga si Jehova con Cain cay ya mata le con Abel. Despues el  Avenida na tiempo de Noe, ya dale mira otravez si Jehova que ta representa el sangre con el vida. Ya permiti si Jehova con Noe y con el de suyu familia que come carne de animal. Ele ya habla: “Todo maga vivo animal puede queda de ustedes comida. Ta dale yo se todo con ustedes igual como ya dale yo el maga verde siembra.” Pero, tiene un cosa que nuay kanila manda come si Jehova: “Pero no ustedes come con el carne que tiene sangre, cay el sangre amo el vida.”​—Genesis 1:29; 9:3, 4.

11. Cosa mandamiento acerca na sangre el ya dale el Dios con el nacion del Israel?

¹¹ Maga 800 año despues ya habla si Jehova con Noe que no come sangre, ya manda le otravez con el de suyu maga gente: “Si uno del maga Israelita o un extrangero quien ta queda junto con ustedes ya anda pajarea y ya puede cuji animal de monte o pajaro que puede come, debe le hace derrama el sangre y tapa con este de tierra.” Despues ya habla le: “No come con el sangre.” (Levitico 17:13, 14) Quierre siempre si Jehova que el de suyu maga gente mira con el sangre como sagrao. Puede sila come con el carne pero gendeh el sangre. Si mata sila animal para come, necesita sila hace derrama con el sangre de este na tierra.

12. Cosa el mirada del maga Cristiano con el sangre?

¹² Cuanto año despues del muerte de Jesus, ya decidi el maga apostoles y maga anciano del Cristiano congregacion si cosa na maga ley que ya dale na maga Israelita el aplicable siempre na maga Cristiano. (Le con el Maga Actividad 15:28, 29; 21:25.) Ya ayudá kanila si Jehova entende que precioso siempre el sangre para con ele y necesita sila siempre mira con este como sagrao. El maga Cristiano del primer siglo gendeh ta come o ta toma sangre o ta come carne de animal que nuay hace sale el sangre  enbuenamente. Si hace sila se, igual lang como ta adora sila maga dios-dios o ta comete imoralidad. Desde aquel tiempo, el maga verdadero Cristiano gendeh ta come o ta toma sangre. Quetal ahora? Quierre siempre si Jehova que mira kita con el sangre como sagrao.

13. Porque gendeh ta abona sangre el maga Cristiano?

¹³ Quierre decir ba que gendeh tambien debe abona sangre el maga Cristiano? Si. Ya prohibi kanaton si Jehova el comida y tomada de sangre. Si ya habla el doctor que no tu toma vino, hay claba ba tu este na de tuyu cuerpo? Siempre gendeh! Na igual manera, el mandamiento que no come o toma sangre quierre decir que gendeh kita abona sangre.—Mira con el Endnote 29.

14, 15. Cosa el mirada del maga Cristiano con el vida? Hay desobedece ba sila con el ley del Dios para lang extende el diila vida? Explica.

¹⁴ Paquemodo si habla el doctor que muri kita si gendeh kita abona sangre? Debe decidi el cada uno si obedece ba le con el ley del Dios acerca na sangre. El maga Cristiano ta aprecia gayot con el regalo de vida estaba con Dios y hay busca kita alternativo cura para continua vivi. Pero gendeh kita abona sangre.

¹⁵ Ta pricura kita tiene buen salud. Pero cay precioso con Dios el vida, gendeh kita abona sangre. Mas importante que obedece con Jehova contra desobedece con ele para lang extende el diaton vida. Ya habla si Jesus: “Cay si quien quiere salva el disuyo vida, ay perde lang con ese. Pero si quien ay perde su vida por causa dimio, ay salva gayot con ese.” (Mateo 16:25) Quierre kita obedece con Jehova cay ta ama kita con ele. Sabe si Jehova si cosa el bueno para kanaton y igual con ele, ta mira kita con el vida como precioso y sagrao.​—Maga Hebreo 11:6.

16. Porque ta obedece con Dios el de suyu maga siervo?

¹⁶ Determinao el maga fiel siervo del Dios que obedece  el de suyu ley acerca na sangre. Gendeh sila come o toma sangre, ni acepta con ese como cura. * Pero, hay acepta sila otro curada medical para salva con el diila vida. Convencido sila que sabe el Creador del vida y del sangre si cosa el bueno para kanila. Convencido ba tambien tu que sabe le si cosa el bueno para contigo?

17. Cosa el solamente usada de sangre que ya permiti si Jehova con el maga Israelita?

¹⁷ Na Ley que ya dale el Dios con Moises, si Jehova ya habla con el maga Israelita: “El vida del carne talli na sangre, y iyo mismo ya dale con este na altar para hace ustedes el tapada del de ustedes culpa, cay el sangre amo ta tapa con el culpa.” (Levitico 17:11) Si ya culpa el maga Israelita, puede sila pidi perdon con Jehova por medio na ofrecimiento de animal y pidi con el sacerdote que bacia un poco sangre de este na altar alla na templo. Este el solamente usada de sangre que ya permiti si Jehova con el maga Israelita.

18. Cosa oportunidad kita tiene por causa na sacrificio de Jesus?

¹⁸ Cuando ya vene si Jesus na tierra, ya cambia le con el ley acerca na ofrecimiento de animal. Ya dale le el de suyu vida o sangre para puede perdona el diaton maga culpa. (Mateo 20:28; Maga Hebreo 10:1) Bien valoroso el vida de Jesus. Gane, despues con ele resucita si Jehova para na cielo, ya dale oportunidad si Jehova con todo maga gente para vivi hasta para cuando.​—Juan 3:16; Maga Hebreo 9:11, 12; 1 Pedro 1:18, 19.

19. Cosa kita debe hace para ‘limpio kita na sangre del todo gente’?

 ¹⁹ Rindi gayot kita gracias con Jehova por el de suyu regalo de vida! Y quierre kita habla con el maga gente que si tiene sila fe con Jesus, puede sila vivi hasta para cuando. Ta ama kita con el maga gente y hace kita el todo para enseña kanila si paquemodo obtene vida. (Ezequiel 3:17-21) Si hace kita se, puede kita habla igual con apostol Pablo: “Limpio yo na sangre del todo gente, cay ya habla yo con ustedes y nuay esconde el todo consejo del Dios.” (Maga Actividad 20:26, 27, NW) Si, ta dale kita mira que ta respeta gayot kita con el vida y sangre si ta habla kita con otro acerca con Jehova y si paquemodo de precioso el vida para con ele.