1-3. Cosa el maga pregunta del maga gente acerca na muerte y cosa el contestacion del cuanto maga religion?

EL Biblia ya promete kanaton que llega el tiempo “nunca mas ay tene muerte.” (Revelacion 21:4) Na Capitulo 5, ya aprende kita que por medio del rescate puede kita tiene vida hasta para cuando. Pero ta muri pa siempre el maga gente ahora. (Eclesiastes 9:5) Poreso, uno del diaton maga importante pregunta amo, Cosa el condicion del maga muerto?

² Importante el contestacion na ese pregunta especialmente si ya muri el un persona que importante kanaton. Siguro ta pensa kita: ‘Onde ya gaha le ahora? Ta mira ba le kanaton? Puede ba le ayudá kanaton? Puede pa ba kita mira con ele otravez?’

³ Otro-otro el contestacion del diferente religion acerca con ese maga pregunta. El cuanto ta enseña que si buen gente tu, hay anda tu na cielo pero si mal gente tu, hay quema contigo na infierno. El cuanto tambien ta habla que si muri tu, hay queda tu espiritu y vivi junto con el de tuyu familia quien ya muri ya. Mientras el otro ta habla que despues contigo juzga na de tuyu muerte, hay nace tu otravez o vivi otravez na otro cuerpo, posible como otro persona o un animal.

4. Cosa comon idea que ta enseña el maga religion acerca na muerte?

⁴ Dol otro-otro el cosa ta enseña el maga religion. Pero el mayoria kanila un comon idea lang ta enseña. Asegun  kanila si ta muri el un gente, tiene pa siempre parte na de suyu cuerpo ta continua vivi. Deverasan ba se?

5, 6. Cosa el condicion del maga muerto?

⁵ Sabe si Jehova si cosa el condicion del maga muerto y ele ya habla kanaton que nuay mas vida el un persona que ya muri ya. Entonces si muri el un gente, gendeh mas esta vivo el de suyu sentido y memoria maskin onde. * Si hay muri kita, gendeh mas kita puede mira, oi y pensa.

⁶ Si Rey Solomon ya escribi que “el maga muerto no sabe ni nada.” Gendeh mas sila ta ama o ta odia y “nuay mas trabajo ni plano ni saber ni sabeduria na Sepultura.” (Le con el Eclesiastes 9:5, 6, 10.) Y na Salmo 146:4, el Biblia ta habla kanaton que si muri el un gente, ta muri tambien el “de suyu pensamiento.”

7. Cosa ya habla si Jesus acerca na muerte?

⁷ Cuando ya muri el amigo de Jesus que si Lazaro, ya habla le con el de suyu maga apostoles: “El diaton amigo si Lazaro ta durmi.” Pero gendeh quierre decir que ta descansa lang si Lazaro. Si Jesus ya continua habla: “Si Lazaro muerto ya.” (Juan 11:11-14) Entonces ya compara si Jesus con el muerte na durmida. Nuay le habla que talla na cielo si Lazaro o junto na de suyu familia que ya muri ya. Y nuay tambien le habla que si Lazaro ta sufri na infierno o ya nace otravez como otro persona o animal. Sino si Lazaro igual lang como bien durmido. Ya compara tambien si Jesus con el muerte na durmida cuando ya hace le resucita  con el anak de Jairo. Ele ya habla, “El bata gendeh muerto! Ta durmi lang le.”​—Lucas 8:52.

8. Porque kita puede habla que nuay crea el Dios con el maga gente para muri?

⁸ Ya crea ba el Dios con Adan y Eva para muri lang? Gendeh! Ya crea kanila si Jehova para vivi hasta para cuando con alegria y buen salud. Cuando ya hace si Jehova con el maga gente, ya dale le kanila el deseo para vivi hasta para cuando. (Eclesiastes 3:11) No quierre mira el maga mayores con el diila maga anak queda viejo y muri y ansina tambien ta sinti si Jehova para kanaton. Pero si ya crea kanaton el Dios para vivi hasta para cuando, porque man kita ta muri?

9. Porque justo y gendeh dificil obedece con el mandamiento que ya dale si Jehova con Adan y Eva?

⁹ Na jardin de Eden, si Jehova ya habla con Adan: “Puede tu come con el fruta del todo pono na jardin hasta satisfecha tu. Pero gendeh gayot tu debe come con el fruta del pono de saber del bueno y malo, cay na dia que come tu con este hay muri gayot tu.” (Genesis 2:9, 16, 17) Gendeh dificil obedece con ese bien claro mandamiento y tiene derecho si Jehova para habla con kanda Adan y Eva si cosa el bueno y si cosa el malo. Si obedece sila con Jehova, puede sila dale mira que ta respeta sila con el de suyu autoridad. Puede tambien sila dale mira que ta aprecia gayot sila con el todo cosas que ya dale si Jehova kanila.

10, 11. (a) Paquemodo ya engaña si Satanas con Adan y Eva? (b) Porque bien culpable kanda Adan y Eva?

¹⁰ Maka-triste cay ya iscuji kanda Adan y Eva que desobedece con Jehova. Si Satanas ya habla con Eva: “Ya habla ba gayot el Dios que gendeh ustedes debe come con el fruta del todo pono na jardin?” Si Eva ya contesta: “Puede kame come con el fruta del pono na jardin. Pero si acerca con el fruta del pono que talli na medio del jardin, el Dios ya habla: ‘No ustedes come con ese, ni agarra con ese; cay si hace se ustedes hay muri gayot ustedes.’”​—Genesis 3:1-3.

¹¹ Y despues si Satanas ya habla: “Gendeh gayot ustedes muri. Cay sabe el Dios que na mismo dia que hay come ustedes con ese, hay abri el de ustedes ojos y hay queda ustedes igual con Dios que sabe el bueno y malo.” (Genesis 3:4-6) Quierre si Satanas que pensa si Eva que puede le decidi para con ele mismo si cosa el bueno y malo. Yan imbusterias tambien le acerca na cosa hay pasa si desobedece si Eva. Ya habla si Satanas que gendeh muri si Eva, poreso ya  come si Eva con el fruta y ya dale tambien le con el de suyu marido. Sabe kanda Adan y Eva que ya habla si Jehova que no come con el fruta. Cuando ya come sila se, ya iscuji sila desobedece con el claro y rasonable mandamiento. Por medio na cosa sila ya hace, ya dale sila mira que nuay sila respeta con el diila amable Tata na cielo. Claro gayot que bien culpable sila!

12. Porque bien maka-triste que kanda Adan y Eva ya desobedece con Jehova?

¹² Bien maka-triste que nuay respeta el diaton primer mayores con el diila Creador! Cosa tu sinti si despues tu hace engranda con el de tuyu anak hombre y mujer, yan rebelde sila contigo y ya hace sila el cosa tu ya prohibi? Gendeh ba hay sinti gayot tu duele?

13. Cosa quierre decir cuando ya habla si Jehova que “na polvos tu hay bira”?

¹³ Cuando ya desobedece kanda Adan y Eva, ya hace sila perde el oportunidad para vivi hasta para cuando. Ya habla si Jehova con Adan: “Polvos tu y na polvos tu hay bira.” (Le con el Genesis 3:19.) Quierre decir que si Adan hay queda polvoz otravez igual lang como nuay crea con ele. (1 Corinto 15:47) Despues comete pecado si Adan, ya muri le y nuay mas existi.

14. Porque kita ta muri?

¹⁴ Si ya obedece kanda Adan y Eva con Dios, vivo pa era sila ahora. Pero cuando ya desobedece sila, ya comete sila pecado y na uliji ya muri. El pecado igual como un  grabe enfermedad que ya hereda kita con el diaton primer mayores. Todo kita ya nace con pecado poreso ta muri kita. (Roma 5:12) Pero gendeh ese el proposito del Dios para na maga gente. No quierre el Dios que muri el maga gente y ta llama el Biblia con el muerte como un “contrario.”​—1 Corinto 15:26.

15. Paquemodo el verdad acerca na muerte hay libra kanaton?

¹⁵ El verdad acerca na muerte hay libra kanaton desde na manada falso idea. Ta enseña kanaton el Biblia que el muerto gendeh mas ta sinti duele o ta queda triste. Gendeh kita puede man cuento kanila y gendeh tambien sila puede man cuento kanaton. Gendeh kita puede ayudá con el maga muerto y gendeh tambien sila puede ayudá kanaton. Gendeh sila puede hace sinti duele kanaton poreso gendeh kita debe tiene miedo kanila. Pero manada religion el ta enseña que el maga muerto ta vivi na otro lugar y puede kita ayudá kanila si paga kita na maga lider del religion. Pero si sabe kita el verdad acerca na muerte, gendeh kita creé con ese maga imbusterias.

16. Cosa imbusterias ta enseña el manada religion acerca na maga muerto?

¹⁶ Si Satanas ta usa con el falso religion para man imbusterias kanaton y manda kanaton pensa que vivo lang siempre el maga muerto. Por ejemplo, el cuanto religion ta enseña que si muri kita, tiene parte del diaton cuerpo hay continua vivi na otro lugar. Ese ba el cosa contigo ta enseña el de tuyu religion o ta enseña sila si cosa ta habla el Biblia acerca na maga muerto? Tan imbusterias si Satanas para deja el maga gente con Jehova.

17. Porque el enseñanza que quema con el gente na infierno un insulto con Jehova?

¹⁷ Gendeh gayot justo el cosa ta enseña el manada religion.  Por ejemplo, el cuanto ta enseña que hay quema con el maga mal gente na infierno hasta para cuando. Ese imbusterias un insulto con Jehova. Gendeh gayot le permiti que sufri el maga gente na ansina manera! (Le con el 1 San Juan 4:8.) Cosa tu sinti con el un persona quien ya quema con el mano del un bata na fuego para castiga con este? Hay pensa tu que bien malo le. Gendeh gayot tu quierre conocé con ele. Y ese el cosa quierre si Satanas que sinti kita acerca con Jehova!

18. Porque gendeh kita debe tiene miedo con el maga muerto?

¹⁸ El cuanto religion ta enseña que si muri el maga gente, hay queda sila espiritu. Asegun kanila, debe kita respeta y tiene miedo con ese maga espiritu cay puede sila queda poderoso amigo o makamiedo contrario. Manada gente ta creé con ese imbusterias. Ta tiene sila miedo con el maga muerto poreso ta adora sila con esos en vez con Jehova. Acorda kita que el maga muerto nuay mas cosa ta sinti poreso gendeh kita debe tiene miedo kanila. Si Jehova el diaton Creador. Ele el verdadero Dios y con ele lang kita debe adora.​—Revelacion 4:11.

19. Paquemodo puede ayudá kanaton el verdad acerca na muerte?

¹⁹ Si sabe kita el verdad acerca na muerte, queda kita librao desde na falso enseñanza del maga religion. Y este verdad hay ayudá kanaton entende el maga bonito promesa de Jehova acerca na diaton vida y na futuro.

20. Cosa kita aprende na siguiente capitulo?

²⁰ Del antes, un siervo del Dios que el nombre si Job el ya preguntá: “Si muri el un gente, hay vivi ba le otravez?” (Job 14:14) Posible ba gayot vivi otravez el un persona que ya muri ya? Bonito gayot el contestacion que ya dale el Dios kanaton na Biblia. Hay sabé kita se na siguiente capitulo.