1. Cosa tu posible pensa despues tu estudia enbuenamente con este libro?

NA DE TUYU estudiada na este libro, ya aprende tu manada verdad na Biblia como el promesa del Dios de vida eterna, condicion del maga muerto y el esperanza de resureccion. (Eclesiastes 9:5; Lucas 23:43; Juan 5:28, 29; Revelacion 21:3, 4) Siguro ta atende ya tu na maga miting del maga Testigo de Jehova y ta creé que ta practica sila el verdadero adoranza. (Juan 13:35) Ya principia ya tu siguro tiene buen relacion con Jehova y ya decidi que quierre tu sirvi con ele. Poreso baká ta pensa tu, ‘Cosa yo debe hace ahora para sirvi con Dios?’

2. Porque quierre bautiza el un gente de Etiopia?

 ² Ese el cosa ya pensa el un gente de Etiopia quien ya vivi na tiempo de Jesus. Cuanto tiempo despues resucita si Jesus, el de suyu dicipulo si Felipe ya predica con ese gente. Ya dale con ele prueba si Felipe que si Jesus amo el Mesias. Convincido gayot el gente de Etiopia na cosa le ya aprende poreso ya puede dayun le habla: “Mira, tiene aqui agua. Tiene ba cosa ta sangga conmigo para recivi el bautismo?”​—Maga Actividad 8:26-36.

3. (a) Cosa el mandato de Jesus con el de suyu maga siguidores? (b) Paquemodo debe bautiza con el un persona?

³ Claro ta enseña el Biblia que si quierre tu sirvi con Jehova, debe tu bautiza. Si Jesus ya habla con el de suyu maga siguidores: “Hace maga dicipulo con todo el maga gente: Bautiza canila.” (Mateo 28:19) Un buen ejemplo si Jesus cay ya bautiza tambien con ele. Gendeh lang con ele ya hace pisik agua na cabeza sino ya hace gayot con ele sumi na agua. (Mateo 3:16) Si ta bautiza con el un Cristiano ahora, ta hace tambien sumi con el de suyu entero cuerpo na agua.

4. Cosa ta dale mira con otro el de tuyu bautismo?

⁴ El de tuyu bautismo ta dale mira con otro que quierre gayot tu queda amigo del Dios y sirvi con ele. (Salmo 40:7, 8) Poreso baká ta pensa tu, ‘Cosa yo necesita hace para bautiza conmigo?’

5. (a) Cosa tu necesita hace para puede contigo bautiza? (b) Porque importante el maga miting del maga Testigo de Jehova?

⁵ Para puede contigo bautiza, necesita tu conocé con Jehova y con Jesus. Ya principia ya tu se hace por medio na de tuyu estudiada del Biblia. (Le con el Juan 17:3.) Pero gendeh se bastante. Ta habla el Biblia que debe ‘omenta el de tuyu entendimiento’ acerca na voluntad  de Jehova. (Colosas 1:9, El Nuevo Testamento) El maga miting del maga Testigo de Jehova hay ayudá contigo para queda tu mas cerca con Jehova. Un razon se si porque importante que atende tu regular na maga miting.​—Maga Hebreo 10:24, 25.

6. Cosa tu necesita sabé acerca na Biblia antes contigo puede bautiza?

⁶ Siempre, gendeh contigo ta expecta si Jehova que sabé tu el todo cosa na Biblia antes tu de bautiza. Nuay le expecta que sabe ya todo aquel gente de Etiopia antes de bautiza. (Maga Actividad 8:30, 31) Y hay continua kita aprende acerca con Dios hasta para cuando. (Eclesiastes 3:11) Pero para puede contigo bautiza, necesita tu sabé y acepta el cuanto maga importante enseñanza del Biblia.​—Maga Hebreo 5:12.

7. Paquemodo contigo ya ayudá el de tuyu estudiada del Biblia?

⁷ El Biblia ta habla: “Pero si noay fe, noay quien ya puede hace el cosa quiere el Dios.” (Maga Hebreo 11:6) Entonces, necesita tu tiene fe para puede contigo bautiza. Asegun na Biblia, el cuanto maga gente na ciudad de Corinto del primer siglo ya oi con el cosa ya enseña el maga siguidores de Jesus y como resulta, “ya cree y ya bautiza” sila. (Maga Actividad 18:8) Na igual manera, por medio na de tuyu estudiada del Biblia ya tiene tu fe na maga promesa del Dios y na rescate de Jesus que puede kanaton libra na pecado y muerte.​—Josue 23:14; Maga Actividad 4:12; 2 Timoteo 3:16, 17.

8. Porque tu quierre habla con otro acerca na cosa tu ya aprende?

⁸ Mientras ta omenta el de tuyu saber na Biblia y ta puede tu mira si paquemodo este ta puede ayudá  contigo, hay queda mas fuerte el de tuyu fe. Hay quierre tu habla con otro acerca na cosa tu ta aprende. (Jeremias 20:9; 2 Corinto 4:13) Pero, con quien tu se habla?

9, 10. (a) Con quien tu puede habla acerca na cosa tu ya aprende? (b) Cosa tu hace si quierre tu predica junto con el congregacion?

⁹ Puede tu habla na de tuyu familia, maga amigo, vecinos o na de tuyu maga ubán na trabajo acerca na cosa tu ta aprende. Un buen cosa se pero necesita tu se habla kanila na amable y buen manera. Gendeh dura, puede ya tu predica junto na congregacion. Si ta sinti tu que puede ya tu se hace, puede tu se habla con el quien tan Bible study contigo. Habla con ele que quierre tu sigui na predicacion junto na congregacion. Si ta mira le que puede ya tu se hace y ta vivi tu asegun na maga principio del Biblia, hay converza con ustedes el dos anciano na congregacion.

¹⁰ Para cosa sila man cuento contigo? Quierre sila sabé si ta entende y ta creé ba tu con el cuanto maga importante enseñanza del Biblia, si ta aplica ba tu el cosa ta habla el Biblia y si quierre ba gayot tu queda uno del maga Testigo de Jehova. Acorda que ta cuida el maga anciano con el todo miembro del congregacion, incluido ya contigo. Poreso, no tiene miedo man cuento kanila. (Maga Actividad 20:28; 1 Pedro 5:2, 3) Despues ustedes man cuento, hay manda contigo sabé el maga anciano si puede ya ba tu predica junto na congregacion.

11. Porque importante que hace maga cambio antes tu puede sigui predica junto na congregacion?

¹¹ Posible hay habla contigo el maga anciano que tiene pa tu cosa necesita cambia na de tuyu vida antes tu puede sigui predica junto na congregacion. Porque importante  que hace se maga cambio? Cay si tan cuento kita con otro acerca con Dios, ta representa kita con Jehova y debe kita vivi na manera que ta honra con ele.​—1 Corinto 6:9, 10; Galacia 5:19-21.

12. Porque necesita arripinti el todo gente?

¹² Tiene pa tu cosa debe hace antes contigo puede bautiza. Si apostol Pedro ya habla: “Arripinti ustedes y cambia el de ustedes corazon para el de ustedes maga pecado ay perdona.” (Maga Actividad 3:19) Cosa quierre decir que arripinti? Ese quierre decir que triste gayot tu na cosa tu ya hace que gendeh justo. Por ejemplo, necesita tu arripinti si imoral el de tuyu manera de vida de antes. Y maskin pa na de tuyu entero vida ya pricura tu hace el todo para hace si cosa el justo, necesita siempre tu arripinti cay tan kamali kita todo y necesita pidi con el perdon del Dios.​—Roma 3:23; 5:12.

13. Cosa quierre decir que “cambia”?

¹³ Bastante ya ba que ya arripinti tu na cosa tu ya hace? Gendeh. Si Pedro ya habla que necesita tambien tu “cambia.” Este quierre decir que gendeh mas tu hace cosa malo y principia hace si cosa el justo. Como un ilustracion, imagina que tan viaje tu para na un lugar que nuay pa tu anda. Nuay dura, ya puede tu notá que gendeh justo el camino donde tu ta pasa. Cosa tu hace? Asigurao que menora tu el de tuyu corrida, descanza, bira y anda na justo direccion. Na igual manera, cuando ya estudia tu con el Biblia posible ya puede tu discubri que debe tu hace maga cambio na de tuyu vida. “Cambia” el maga cosas que gendeh bueno y principia hace si cosa el justo.

14. Paquemodo tu dedica el de tuyu vida con Jehova?

¹⁴ El otro cosa que necesita tu hace antes contigo bautiza amo que dedica el de tuyu vida con Jehova. Si ta dedica tu el de tuyu vida con Jehova, ta promete tu con ele na rezo que con ele lang tu adora y el hacida del de suyu voluntad amo hay queda el de con todo importante cosa na de tuyu vida.​—Deuteronomio 6:15.

15, 16. Porque quierre el un persona que dedica el de suyu vida con Dios?

¹⁵ Si ta promete tu que con Jehova lang tu sirvi, igual lang se si ta promete tu con el un persona con quien tu ta ama que man junto tu con ele hasta na fin del de tuyu vida. Imagina que ta enamora el un hombre con el un mujer. Mientras ta conocé le mas con el mujer, mas ta queda hondo el de suyu amor y hay quierre le casá con el mujer. Maskin pa un serioso decicion este, conforme el hombre que acepta el responsibilidad cay ta ama le con el mujer.

¹⁶ Mientras ta aprende tu acerca con Jehova, ta queda hondo el de tuyu amor con ele y quierre tu hace el todo para sirvi con ele. Por causa con ese, hay promete tu na rezo que sirvi tu con ele. El Biblia ta habla que aquellos quien quierre queda siguidores de Jesus debe ‘olvida con el diila mismo cuerpo.’ (Marcos 8:34) Cosa se quierre decir? Ese quierre decir que una na de tuyu vida el obediencia con Jehova. Mas importante el cosa quierre si Jehova contra con el de tuyu deseo o querer.​—Le con el 1 Pedro 4:2.

17. Porque el cuanto maga gente gendeh ta dedica el diila vida con Jehova?

¹⁷ Cuanto maga gente el gendeh ta dedica el diila vida  con Dios cay tiene sila miedo que baká gendeh sila puede cumpli el diila promesa que sirvi con ele. Ta pensa sila que baká hace lang sila sinti duele con Jehova o mas bueno pa si gendeh sila dedicao con Dios cay si man kamali man gendeh sila culpable con Jehova.

18. Cosa ayudá contigo para gendeh tu pensa que baká hace lang tu sinti duele con Jehova?

¹⁸ El de tuyu amor con Jehova puede ayudá contigo para gendeh tu pensa que baká hace lang tu sinti duele con ele. Cay ta ama tu con ele, hay hace tu el todo para cumpli el de tuyu promesa que sirvi con ele. (Eclesiastes 5:4; Colosa 1:10) Gendeh tu pensa que bien dificil hace el voluntad de Jehova. Si apostol Juan ya escribi: “Cay ama con el Dios quiere decir obedece su maga mandamiento. Y el disuyo maga mandamiento gendeh pesao.”​—1 San Juan 5:3.

19. Porque gendeh tu debe tiene miedo dedica el de tuyu vida con Jehova?

¹⁹ Gendeh tu necesita queda perfecto para dedica el de tuyu vida con Jehova. Gendeh le ta expecta que hace kita maga cosas que gendeh kita puede hace. (Salmo 103:14) Hay ayudá le contigo para puede tu hace si cosa el justo. (Isaias 41:10) Confia con Jehova con todo corazon y “hay hace le derecho el de tuyu camino.”​—Proverbio 3:5, 6.

20. Despues tu dedica el de tuyu vida con Dios, cosa ya tu hace?

²⁰ Para contigo, preparao ya ba tu para dedica el de tuyu vida con Jehova? Despues tu se hace, puede ya contigo bautiza.

21, 22. Paquemodo tu “proclama” el de tuyu fe na publico?

²¹ Manda sabé con el coordinator del grupo del maga anciano na de tuyu congregacion que ya dedica ya tu el  de tuyu vida con Jehova y quierre ya tu bautiza. Despues, hay iscuji le cuanto maga anciano quien man repaso contigo acerca na cuanto maga importante enseñanza del Biblia. Si ta mira sila que cualificao ya tu, hay habla sila contigo que puede ya tu bautiza na venedero asemblea del maga Testigo de Jehova. Na asemblea, tiene un discurso acerca na bautismo. El hermano  quien dale con el discurso hay preguntá dos simple pregunta con aquellos quien hay bautiza. Por medio na de tuyu contestacion na maga pregunta, hay “proclama” tu el de tuyu fe na publico.​—Roma 10:10.

²² Despues con ese, hay bautiza ya contigo. Hay hace sumi con el de tuyu entero cuerpo na agua. El bautismo  ta dale mira con todo que ya dedica ya tu el de tuyu vida con Jehova y uno ya tu del maga Testigo de Jehova.

23. Cosa quierre decir que bautiza “na Nombre del Tata y del Anak y del Espiritu Santo”?

²³ Ya habla si Jesus que hay bautiza el de suyu maga dicipulo “na Nombre del Tata y del Anak y del Espiritu Santo.” (Le con el Mateo 28:19.) Cosa se quierre decir? Ese quierre decir que ta conocé tu con el autoridad de Jehova y con el papel de Jesus na proposito del Dios y si paquemodo ta usa el Dios con el de suyu sagrao espiritu para cumpli el de suyu voluntad.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Cosa quierre decir del de tuyu bautismo? (b) Cosa kita hay discuti na ultimo capitulo?

²⁴ Bien importante el cosa quierre decir del de tuyu bautismo. Una vez hace contigo sumi na agua, quierre decir quel que ya abandona ya tu el de tuyu de antes manera de vida. Despues tu sale na agua, hay principia tu un nuevo vida para hace el voluntad del Dios. Ese ta dale mira que hay sirvi ya tu con Jehova. Acorda que gendeh tu dedicao na un gente, organizacion o na un trabajo. Ya dedica tu el de tuyu vida con Jehova.

²⁵ El de tuyu dedicacion hay ayudá contigo para tiene buen amistad con Dios. (Salmo 25:14) Gendeh se quierre decir que hay salva ya el un persona cay bautizao ya le. Si apostol Pablo ya escribi: “Continua ustedes trabaja con miedo y nervios para el de ustedes salvacion.” (Filipo 2:12) El bautismo amo el principio pa lang. Pero, paquemodo tu esta cerca con Jehova? El ultimo capitulo hay contesta con ese pregunta.