1, 2. Porque el Biblia un bonito regalo estaba con Dios?

COSA tu sinti si ya dale contigo regalo el de tuyu amigo? Quierre dayun tu sabé si cosa el laman de este y alegre tu cay ya acorda le contigo. Hay rindi gayot tu gracias con ele.

² El Biblia un regalo estaba con Dios. Ta dale este kanaton informacion que gendeh kita puede incuntra maskin onde. Por ejemplo, ta habla este kanaton que ya crea el Dios con el cielo, tierra y con el primer hombre y mujer. Ta contene este maga principio que puede ayudá kanaton si tiene kita maga problema. Puede kita aprende na Biblia si paquemodo el Dios puede cumpli el su proposito para hace con el tierra un bonito lugar. Que bien bonito regalo el Biblia!

3. Cosa tu puede aprende mientras ta estudia tu con el Biblia?

³ Mientras ta estudia tu con el Biblia, hay sabé tu que quierre el Dios queda tu de suyu amigo. Si aprende tu mas acerca con ele, hay queda tu mas cerca con ele como un amigo.

4. Cosa el ya dale contigo buen impresion acerca na Biblia?

⁴ Yan translate con el Biblia na mas de 2,800 lengguaje y billones de copia ya el ya imprimi. Mas de 90 por ciento del maga gente na mundo el puede le con el Biblia na diila mismo lengguaje. Y cada semana, mas de un millon gente el ta tiene Biblia! Si, nuay otro libro igual con el Biblia.

5. Porque kita puede habla que el Biblia “inspirao de Dios”?

 ⁵ El Biblia “inspirao de Dios.” (Le con el 2 Timoteo 3:16.) Pero baká pensa el otro, ‘Maga gente lang el quien ya escribi con el Biblia, poreso paquemodo este estaba con Dios?’ El Biblia ta contesta: “El Espiritu Santo [o sagrao espiritu] amo el ya manda canila conversa por parte de Dios.” (2 Pedro 1:21) Igual lang este con el un negociante quien ta manda hace carta con el de suyu secretaria. Quien el autor del carta? El negociante, gendeh el secretaria. Na igual manera, el Dios amo el Autor del Biblia, gendeh el maga gente con quien ele ya usa para escribi con este. Ya guiá kanila el Dios para escribi el de suyu pensamiento. Poreso, el  Biblia “palabra del Dios.”​—1 Tesalonica 2:13; mira con el Endnote 2.

6, 7. Porque kita puede habla que harmonia el Biblia?

⁶ Ya escribi con el Biblia na mas de 1,600 año. El maga escritor de este ya vivi na diferente tiempo. Educao el cuanto kanila mientras el otro gendeh. Por ejemplo, doctor el uno kanila. El otro maga jardinero, pescador, pastor, profeta, juez y rey. Maskin pa otro-otro el escritor del Biblia, harmonia el todo parte de este. Gendeh este ta habla un cosa na un capitulo que contra na otro. *

⁷ Ta discuti na primer capitulo del Biblia si paquemodo ya principia el problema na mundo. El ultimo capitulo ta habla kanaton si paquemodo el Dios hay solva con este y hace paraiso con el tierra. El Biblia ta cubri miles de año na historia del gente y ta dale mira que pirmi ta cumpli el proposito del Dios.

8. Dale maga ejemplo que justo el cosa ta habla el Biblia acerca na ciencia.

⁸ Nuay escribi con el Biblia para enseña ciencia o para queda libro de escuela. Pero, el cosa este ta habla acerca na ciencia pirmi justo. Ese el cosa kita puede expecta con el libro que estaba con Dios. Por ejemplo, el libro de Levitico ta contene maga instruccion del Dios si cosa debe hace el maga Israelita para gendeh man calayat el enfermedad. Ya dura ya este escribido antes pa  ya sabé el maga gente si paquemodo el bacteria y virus ta causá enfermedad. Justo tambien el cosa ta enseña el Biblia que el mundo nuay onde tan bitay. (Job 26:7) Y cuando gendeh justo el maga idea del maga gente acerca si cosa el forma del mundo, el Biblia ya habla que redondo este.​—Isaias 40:22.

9. Cosa ta dale mira el honestidad del maga escritor del Biblia?

⁹ Si ta discuti el Biblia acerca na historia, pirmi este exacto. Pero mucho libro de historia el gendeh exacto cay gendeh honesto el maga escritor de este. Por ejemplo, gendeh sila pirmi ta menciona el perdicion del diila nacion na guerra. Pero el maga escritor del Biblia honesto y ya inclui maskin el perdicion del Israel. Ya escribi tambien sila maskin el diila mismo kamali. Por ejemplo, na libro del Numero, ya habla kanaton si Moises que ya comete le culpa poreso ya diciplina con ele el Dios. (Numero 20:2-12) El honestidad del maga escritor ta dale mira que el Biblia estaba con Dios y puede kita confia con este.

10. Porque el maga consejo na Biblia puede ayudá kanaton ahora?

¹⁰ El Biblia “inspirao de Dios y puede gayot usa con provecho para insiña, para discuti, para guia el vida del maga gente.” (2 Timoteo 3:16) Si, el consejo del Biblia puede ayudá kanaton ahora. Si Jehova el ya hace kanaton poreso ta entende le si cosa kita ta pensa y ta sinti. Conoce le kanaton mas pa que conoce kita diaton cuerpo y quierre le queda kita alegre. Sabe le si cosa el bueno y si cosa el malo para kanaton.

11, 12. (a) Cosa buen consejo el ya dale si Jesus na Mateo capitulo 5 hasta 7? (b) Cosa pa kita puede aprende na Biblia?

¹¹ Na Mateo capitulo 5 hasta 7, puede kita le el maga  buen consejo de Jesus si paquemodo queda alegre, tiene buen relacion con otro, paquemodo reza y el justo mirada na sen. Maskin pa 2,000 año ya el ya pasa cuando ya dale le con este consejo, aplicable y puede siempre este ayudá kanaton ahora.

¹² Na Biblia, ta enseña tambien kanaton maga principio si Jehova para tiene kita buen vida de familia, queda buen trabajador y vivi con paz junto con otro. El maga principio na Biblia puede ayudá kanaton maskin quien kita, de onde kita o maskin cosa problema kita tiene.​—Le con el Isaias 48:17; mira con el Endnote 3.

13. Asegun con Isaias, cosa hay pasa con el ciudad del Babilonia?

¹³ Manada profecia na Biblia el ya cumpli ya. Por ejemplo, asegun con profeta Isaias hay destroza con el Babilonia. (Isaias 13:19) Ya dale le exacto detalle si paquemodo destroza con este ciudad. Protegido el ciudad de bien grande fuerta y rio. Pero ya habla si Isaias que hay seca el rio y hay deja abierto con el fuerta del ciudad. El maga soldao hay puede saca con el ciudad sin guerra. Ya menciona si Isaias maskin el nombre del gente quien hay hace perde con el Babilonia, si Ciro.​—Le con el Isaias 44:27–45:2; mira con el Endnote 4.

14, 15. Paquemodo ya cumpli el profecia de Isaias?

¹⁴ Dos cientos año despues ya escribi con el profecia, ya llega el maga soldao para ataca con el Babilonia. Quien el lider del maga soldao? Si Ciro, el rey del Persia, como cosa ya habla na profecia. Pero, puede ba saca el maga soldao de Ciro con el Babilonia como cosa ya habla si profeta Isaias?

 ¹⁵ El noche cuando ya ataca el maga soldao, tiene fiesta na Babilonia. Campante el maga gente cay protegido el diila ciudad de alto pader y rio. Apuera del ciudad, si Ciro y el de suyu maga soldao ya hace otro pasada de agua para abaja el agua na rio. Ya abaja el agua y ya puede pasa el maga soldao Persiano. Pero paquemodo sila puede entra na Babilonia ciendo bien alto el  pader de este? Ya deja abierto con el fuerta del ciudad como cosa ya habla na profecia. Poreso, el maga soldao ya puede saca con el ciudad sin guerra.

16. (a) Cosa ya habla si Isaias acerca na futuro del Babilonia? (b) Cosa el prueba que ya cumpli el profecia de Isaias?

¹⁶ Ya habla si Isaias que llega el tiempo nuay mas quien queda otravez na Babilonia. Ele ya escribi: “Gendeh mas con ele queda.” (Isaias 13:20) Ya cumpli ba se? Na lugar donde el Babilonia de antes, maga 80 kilometro parte sur del Baghdad, Iraq, resto ya lang del ciudad el puede mira. Maskin ahora, nuay quien ta queda alla. Si Jehova ya barre con el Babilonia “con escoba de destrozo.”​—Isaias 14:22, 23. *

17. Porque kita puede confia con el maga promesa del Dios?

¹⁷ El maga bien manada profecia que ya cumpli prueba que puede kita confia con el cosa ta habla el Biblia  acerca na futuro. Puede kita asigura que hay cumpli si Jehova con el de suyu promesa que hace paraiso con el tierra. (Le con el Tito 1:2.) ‘Si tiene si Jehova cosa ta habla, ele hay hace con ese.’—Numero 23:19. *

18. Cosa ya habla si Pablo acerca na “Palabra del Dios”?

¹⁸ Ya aprende kita que nuay otro libro igual con el Biblia. Harmonia el laman de este y exacto si ta discuti acerca na ciencia y historia. Ta dale tambien este buen consejo kanaton y ta contene manada profecia que ya cumpli ya. Pero gendeh lang ese el cosa ta hace el Biblia. Si apostol Pablo ya escribi: “El Palabra del Dios vivo y efectivo.” Cosa se quierre decir?—Le con el Maga Hebreo 4:12.

19, 20. (a) Paquemodo el Biblia puede ayudá contigo conocé si quien gayot tu? (b) Paquemodo tu dale mira apreciacion para con este regalo?

¹⁹ El Biblia puede cambia con el de tuyu vida. Puede este ayudá contigo conocé si quien gayot tu. Hay ayudá este contigo entende si cosa gayot tu ta pensa y ta sinti. Por ejemplo, ta pensa kita que ta ama kita con Dios. Pero para demonstra el diaton amor con ele, debe kita aplica si cosa ta habla el Biblia.

²⁰ El Biblia estaba gayot con Dios. Quierre ele que le, estudia y ama tu con este. Aprecia con este regalo y continua con ese estudia. Como resulta, hay entende tu el proposito del Dios para na maga gente. Na siguiente capitulo, hay sabé kita mas acerca con este proposito.