1, 2. (a) Cosa ta hace con el un regalo precioso para contigo? (b) Porque el rescate amo el de con todo precioso regalo del Dios?

COSA el de con todo bonito regalo que ya ricibi tu? Gendeh necesita de caro el un regalo para queda este precioso contigo. Si ta puede este contigo hace alegre o un cosa este que bien necesita tu, hay aprecia gayot tu con este.

² Na todo regalo que ya dale el Dios kanaton, tiene un regalo que bien necesita kita. Este el de con todo precioso regalo del Dios para na maga gente. Na este capitulo, hay aprende kita que ya imbia si Jehova con el de suyu Anak, si Jesucristo, para puede kita vivi hasta para cuando. (Le con el Mateo 20:28.) Ya dale prueba si Jehova que ta ama gayot le kanaton cuando ya imbia le con Jesus aqui na tierra como un rescate.

3. Porque ta muri el maga gente?

³ El rescate amo el manera de Jehova para libra con el maga gente desde na pecado y muerte. (Efeso 1:7) Para entende si porque necesita con el rescate, sabé kita si cosa ya sucede na jardin de Eden miles de año ya el ya pasa. Ya comete pecado el diaton primer mayores, kanda Adan y Eva. Ya muri sila por causa na diila pecado. Ta muri tambien kita ahora cay ya hereda kita el pecado estaba con Adan y Eva.​—Mira con el Endnote 9.

4. Quien si Adan y cosa le tiene?

 ⁴ Cuando ya crea si Jehova con el primer gente, si Adan, ya dale le con ele un cosa que bien precioso. Ya dale le con Adan un perfecto vida. Tiene si Adan perfecto pensamiento y cuerpo. Gendeh le enferma, queda viejo y muri. Cay ya crea si Jehova con Adan, Ele ya queda como de suyu tata. (Lucas 3:38) Pirmi tan cuento si Jehova con ele. El Dios claro ya habla con Adan si cosa le ta expecta con ele y ya dale con ele un bonito trabajo.​—Genesis 1:28-30; 2:16, 17.

5. Cosa quierre decir cuando ya habla el Biblia que ya crea con Adan “na imagen del Dios”?

⁵ Ya crea con Adan “na imagen del Dios.” (Genesis 1:27) Ya dale con ele si Jehova maga calidad igual como cosa le tiene incluido el amor, sabeduria, justicia y poder. Ya dale le con Adan el libertad para hace decicion. Gendeh como un robot si Adan. Ya crea con ele el Dios que puede le iscuji si hace ba le el justo o gendeh. Si ya iscuji si Adan que obedece con Dios, ya vivi era le hasta para cuando na Paraiso.

6. Cosa ya hace perde si Adan cuando ya desobedece le con Dios? Cosa el efecto de este kanaton?

⁶ Cuando ya desobedece si Adan con Dios y ya sentenciá con ele na muerte, grande gayot el cosa ya paga si Adan. Ya perde el de suyu especial relacion con Jehova, perfecto vida y el Paraiso donde le ta queda. (Genesis 3:17-19) Ya iscuji kanda Adan y Eva que desobedece con Dios poreso nuay mas sila esperanza. Por causa na cosa ya hace si Adan, “el pecado ya entra na mundo. Y, por medio del pecado, ya entra el muerte. Y el muerte ya alcanza con todo el maga gente, cay todo sila ya peca [o comete pecado].” (Roma 5:12) Cuando ya comete pecado si Adan, ya ‘vende’ le con ele y kanaton para  queda esclavo na pecado y muerte. (Roma 7:14) Tiene ba kita esperanza? Si, cay ya dale si Jehova el rescate.

7, 8. Cosa el rescate?

⁷ Cosa el rescate? Dos cosas el envuelto na idea de rescate. Una, el rescate amo el pago que ta paga para libra con el un persona o para rescata con el un cosa. Ika-dos, el rescate amo el pago para tapa o paga con el valor del un cosa.

⁸ Nuay quien gente puede paga con el cosa ya hace perde si Adan cuando ya comete le pecado y ya resultá muerte para kanaton. Pero ya hace manera si Jehova para libra kanaton desde na pecado y muerte. Hay aprende kita mas acerca con este rescate y si paquemodo kita puede beneficia con este.

9. Paquemodo puede paga con el rescate?

⁹ Ni uno kanaton gendeh puede rescata con el perfecto vida que ya hace perde si Adan. Porque? Cay todo kita imperfecto. (Salmo 49:7, 8) Un perfecto vida tambien el rescate que debe paga. (1 Timoteo 2:6) Igual debe el valor del rescate na vida que ya hace perde si Adan.

10. Paquemodo si Jehova ya dale el rescate?

¹⁰ Paquemodo si Jehova ya dale el rescate? Ya imbia le con el de suyu bien precioso Anak aqui na tierra. Este Anak amo si Jesus, el de suyu primer creacion. (1 San Juan 4:9, 10) Si Jesus con todo voluntad ya deja con el de suyu Tata y con el cielo onde le ta queda. (Filipo 2:7) Ya transfiri si Jehova el vida de Jesus estaba na cielo para na tierra y ya nace si Jesus como un perfecto gente.​—Lucas 1:35.

11. Paquemodo queda rescate el un gente para na todo?

¹¹ El primer gente, si Adan, ya hace perde el perfecto  vida para con el maga gente cuando ya desobedece le con Jehova. Tiene ba otro gente quien puede quita con el muerte na maga anak de Adan? Si. (Le con el Roma 5:19.) Ya dale si Jesus el de suyu perfecto vida como un rescate. (1 Corinto 15:45) Puede usa con el de suyu perfecto vida para quita con el muerte na todo anak de Adan.​—1 Corinto 15:21, 22.

12. Porque necesita pa gayot sufri si Jesus?

¹² Ya dale detalle el Biblia si paquemodo ya sufri si Jesus antes le muri. Ya latiga con ele, ya clava na estaca y ya sufri gayot antes de muri. (Juan 19:1, 16-18, 30) Porque necesita pa gayot sufri si Jesus? Cay ya clama si Satanas que nuay gente quien hay esta leal con Dios si ta experienciá le grabe dificultad. Ya dale prueba si Jesus que el un perfecto gente pueda esta leal con Dios maskin grabe el de suyu sufrimiento. Imagina si paquemodo de alegre si Jehova na cosa ya hace si Jesus!—Proverbio 27:11; mira con el Endnote 15.

13. Paquemodo ya paga con el rescate?

¹³ Paquemodo ya paga con el rescate? Ya dale si Jesus con el de suyu Tata el valor del de suyu vida. Del año 33, Nisan 14 na calendario del maga Judio, ya permiti si Jehova que mata con Jesus el de suyu maga enemigo. (Maga Hebreo 10:10) Despues el tres dia, ya hace vivi otravez si Jehova con Jesus gendeh como un gente sino como un espiritu persona. Y cuando ya bira si Jesus na cielo, ya presenta le con Jehova como un rescate el valor del de suyu perfecto vida de gente que ya sacrificia le. (Maga Hebreo 9:24) Ciendo ya paga ya con el rescate, tiene ya kita ahora el oportunidad para queda librao desde na pecado y muerte.​—Le con el Roma 3:23, 24.

14, 15. Cosa kita debe hace para perdona con el diaton maga pecado?

¹⁴ Ta beneficia ya kita na de con todo precioso regalo del Dios. Sabé kita si paquemodo kita beneficia ahora y na futuro.

¹⁵ Ta perdona con el diaton maga pecado. Dificil hace si cosa el justo na todo tiempo. Tan kamali kita y tiene vez, ta habla y ta hace maga cosas que gendeh justo. (Colosa 1:13, 14) Paquemodo kanaton puede perdona? Debe kita arripinti na cosa kita ya hace malo y con humildad pidi con Jehova que perdona kanaton. Na ese manera, puede kita tiene confianza que ya perdona con el diaton maga pecado.​—1 San Juan 1:8, 9.

16. Cosa kita debe hace para tiene limpio conciencia?

¹⁶ Puede kita tiene limpio conciencia. Si el diaton conciencia ta habla kanaton que tiene kita cosa ya hace gendeh justo, ta sinti kita culpable y tiene vez miserable pa gane. Pero gendeh kita debe perde esperanza. Si pidi kita perdon con Jehova, puede kita asigura que ele hay oi y perdona kanaton. (Maga Hebreo 9:13, 14) Quierre si Jehova que habla kita con ele si cosa el diaton maga problema y inclinacion. (Maga Hebreo 4:14-16) Como resulta, hay tiene kita limpio conciencia adelante con Dios.

17. Cosa maga bendicion el puede kita ricibi cay ya muri si Jesus para kanaton?

¹⁷ Tiene kita esperanza vivi hasta para cuando. “El pago ta dale el pecado amo el muerte, pero el regalo libre que ta dale el Dios amo el Vida eterno, unido con Cristo el diaton Señor.” (Roma 6:23) Cay ya muri si Jesus para kanaton, puede kita tiene buen salud y vivi hasta para cuando. (Revelacion 21:3, 4) Pero, cosa kita debe hace para ricibi ese maga bendicion?

18. Porque kita puede habla que ta ama kanaton si Jehova?

¹⁸ Pensa si paquemodo tu de alegre si tiene contigo quien ya dale un bonito regalo. El rescate amo el de con todo precioso regalo y debe kita rindi gracias con Jehova por causa con este. El Juan 3:16 ta habla kanaton que “grande el amor del Dios para con el mundo: que ya dale Le su Unico Anak.” Si, ta ama gayot kanaton si Jehova poreso ya dale le kanaton el de suyu precioso Anak, si Jesus. Y sabe kita que ta ama tambien kanaton si Jesus cay ya conforma le muri para kanaton. (Juan 15:13) El regalo de rescate debe convinci contigo que ta ama gayot contigo si Jehova y si Jesus.​—Galacia 2:20.

19, 20. (a) Paquemodo tu queda amigo de Jehova? (b) Paquemodo tu demonstra fe na sacrificio de Jesus?

¹⁹ Ciendo ya sabé ya tu ahora acerca na grande amor del Dios, paquemodo tu queda de suyu amigo? Dificil ama con el un persona que no conoce tu. Asegun na Juan 17:3, puede kita conoce con Jehova. Mientras ta hace tu este, hay queda mas hondo el de tuyu amor con ele, hace tu maga cosas que ta hace con ele alegre y hay queda tu de suyu amigo. Poreso, continua aprende acerca con Jehova por medio na estudiada del Biblia.​—1 San Juan 5:3.

²⁰ Demonstra fe na sacrificio de Jesus. Ta habla el Biblia que “si quien ta cree [o demonstra fe, NW] con el Anak tiene vida hasta cuando.” (Juan 3:36) Cosa quierre decir que demonstra fe? Este quierre decir que hace kita si cosa ya enseña kanaton si Jesus. (Juan 13:15) Gendeh bastante que ta creé lang kita con Jesus. Tiene kita cosa debe hace na diaton fe. Puede kita le na  Santiago 2:26: “El fe ta muri si noay maga trabajo bueno.”

21, 22. (a) Porque kita debe atende na Comemoracion del muerte de Jesus cada año? (b) Cosa hay discuti na Capitulo 6 y 7?

²¹ Atende na Comemoracion del muerte de Cristo. El noche antes ya muri si Jesus, ya enseña le kanaton que debe kita comemora con el de suyu muerte. Ta hace kita este cada año y ta llama con este el Comemoracion o “el Cena del Señor.” (1 Corinto 11:20; Mateo 26:26-28) Quierre si Jesus que acorda kita que ya dale le el de suyu perfecto vida como un rescate para kanaton. Ele ya habla: “Hace este para acorda conmigo.” (Le con el Lucas 22:19.) Si atende tu na Comemoracion, ta dale tu mira que ta acorda tu el rescate y con el grande amor de Jehova y de Jesus para kanaton.​—Mira con el Endnote 16.

²² El rescate amo el de con todo precioso regalo que ya ricibi kita. (2 Corinto 9:14, 15) Maskin el millones de maga gente quien ya muri ya hay beneficia con este. El capitulo 6 y 7 hay discuti si paquemodo se ya queda posible.