1. Onde kita puede sabé acerca na futuro?

MIENTRAS ta mira o ta oi tu noticia, ya puede ba tu pensa, ‘Hay queda pa ba mas grabe este maga suceso?’ Bien manada trajedia y maldad que ta sucede poreso el cuanto maga gente ta creé que cerca ya el fin del mundo. Deverasan ba se? Tiene ba manera para sabé si cosa hay pasa na futuro? Si. No sabe el maga gente si cosa hay sucede na futuro pero si Jehova sabe. Ya habla le kanaton na Biblia si cosa el diaton futuro y del tierra.​—Isaias 46:10; Santiago 4:14.

2, 3. Cosa quierre sabé el maga dicipulo de Jesus y paquemodo le ya contesta kanila?

² Si ta le kita na Biblia acerca na fin del mundo, gendeh este quierre decir el fin de este planeta sino el fin del maldad. Si Jesus ya enseña con el maga gente que el Reino del Dios hay rula na entero tierra. (Lucas 4:43) Quierre sabé el de suyu maga dicipulo si cuando llega el Reino del Dios poreso ya preguntá sila con Jesus: “Cuando ay sucede este y cosa ba el señal del de Uste llegada y del fin del mundo?” (Mateo 24:3) Nuay kanila dale si Jesus el exacto fecha pero ya habla le si cosa hay sucede antes el fin de este mundo. Ta sucede ya ahora el cosa ya habla si Jesus.

³ Hay discuti kita na este capitulo el prueba que ta vivi ya kita na tiempo antes el fin de este mundo. Necesita kita sabé una acerca na un guerra que ya sucede na cielo para puede kita entende si porque ta sucede el maga mal cosas aqui na tierra.

4, 5. (a) Cosa ya sucede na cielo despues queda Rey si Jesus? (b) Asegun na Revelacion 12:12, cosa sucede na tierra despues buta con Satanas?

⁴ Na Capitulo 8, ya aprende kita que si Jesus ya queda Rey na cielo del 1914. (Revelacion 11:15) El libro de Revelacion ta habla kanaton si cosa ya sucede: “Ya tene guerra na cielo: Si Miguel [Jesus] y el disuyo maga angel ya imbisti con el Dragon [Satanas]. Ya imbisti tamen el Dragon y el disuyo maga angel.” * Ya perde na guerra si Satanas y el de suyu maga demonio y ya buta kanila para aqui na tierra. Imagina el alegria que ya sinti el maga angel! Pero quetal el maga gente na tierra? El Biblia ta habla que experienciá sila grabe maga problema na ese tiempo. Porque? Cay bien rabiao el Diablo y “sabe le que contao lang el disuyo maga dia.”​—Revelacion 12:7, 9, 12.

⁵ El Diablo ta hace el todo para causá problema na tierra. Rabiao gayot ele cay corto ya lang el de suyu tiempo antes con ele quita el Dios. Sabé kita si cosa ya habla si Jesus que sucede durante el ultimo maga dia.​—Mira con el Endnote 24.

6, 7. Cosa kita puede habla acerca na guerra y hambre que ta sucede ahora?

⁶ Guerra. Si Jesus ya habla: “Maga nacion ay man guerra contra otro maga nacion, y maga reino ay man guerra contra otro maga reino.” (Mateo 24:7) Mas manada gente el ya muri na guerra na diaton tiempo contra na otro tiempo na historia. Asegun na Worldwatch  Institute, mas de 100 millon de gente el ya muri na guerra desde 1914. Mas de triple el ya muri na guerra durante el 100 año desde 1900 hasta 2000 contra el ya muri del ya pasa 1,900 año. Imagina el tristeza y dolor que ya sinti el millones de gente por causa na guerra!

⁷ Hambre. Si Jesus ya habla: “Ay tene donde-donde maga calamidad de hambre.” (Mateo 24:7) Maskin pa mas manada comida el ta produci ahora compara de antes, manada siempre el nuay bastante comida. Porque? Cay nuay sila bastante cen para cumpra comida o tierra para onde siembra. Bien diutay lang el incuntrada cada dia del mas de un billon gente. El World Health Organization ta habla que millones de bata el ta muri cada año por causa na malnutricion.

8, 9. Cosa el prueba que ya sucede ya el profecia de Jesus acerca na temblor y enfermedad?

⁸ Temblor. Ya predicta si Jesus: “Tene donde-donde maga grande temblor.” (Lucas 21:11) Ahora, manada fuerte temblor el  ta expecta cada año. Principiando del año 1900, mas de dos millon gente el ya muri por causa na temblor. Y maskin pa el tecnologia ta puede ayudá para sabé si tiene temblor, manada siempre ta muri.

⁹ Enfermedad. Si Jesus ya habla que hay tiene “epidemia.” Hay man calayat el maga peligroso enfermedad y manada hay muri. (Lucas 21:11, El Nuevo Testamento) Maskin pa sabe curá el maga doctor con el manada enfermedad, tiene siempre enfermedad que nuay cura. Gane asegun na un report, millones el ta muri cada año por causa na enfermedad igual na tuberculosis, malaria y cholera. Puera con ese, ya discubri tambien el maga doctor 30 nuevo enfermedad y nuay cura el cuanto de ese.

10. Paquemodo ta cumpli el 2 Timoteo 3:1-5 ahora?

¹⁰ El 2 Timoteo 3:1-5 ta habla: “Puede tu asigura que ay tene maga dificultad na ultimo  maga dia.” Si apostol Pablo ya habla si cosa el custumbre del maga gente durante el ultimo maga dia. Asegun con ele, el maga gente hay queda

• canalla

• hambriento

• orgulloso

• desobediente con el maga mayores

• nuay lastima

• no sabe perdona

• salvaje

• mas quierre na alegria que con Dios

• ta pretende que ta ama con Dios pero ta desobedece con ele

11. Asegun na Salmo 92:7, cosa hay pasa con el maga mal gente?

¹¹ Ansina ba el custumbre del maga gente onde tu ta queda? Na entero mundo, manada ansina el custumbre. Pero gendeh dura, tiene cosa hace el Dios con ese. Ele ya promete: “Cuando el maga malo hay crisi igual con el maga sahbut y todo el maga ta comete culpa hay queda manada, ese que para destroza kanila hasta para cuando.”​—Salmo 92:7.

12, 13. Cosa kanaton ya enseña si Jehova durante el ultimo maga dia?

¹² El Biblia ya habla que durante el ultimo maga dia, hay llena el mundo de dolor y sufrimiento. Pero ya habla tambien el Biblia que tiene buen cosas hay sucede.

¹³ Entendimiento na Biblia. Ya escribi si profeta Daniel acerca na ultimo maga dia. Ele ya habla: “El verdadero sabeduria hay queda abundancia.” (Daniel 12:4) Dale el Dios con el de suyu maga siervo el abilidad para entende mas claro con el Biblia compara de antes. Ya hace este si Jehova especialmente desde 1914. Por ejemplo, ya enseña le kanaton el importancia del de suyu nombre, su proposito para na tierra, el verdad acerca na rescate, si cosa el condicion del maga muerto y el resureccion. Ya aprende kita que solamente el Reino del Dios el puede solva con el todo diaton problema. Ya aprende tambien kita si paquemodo queda alegre y vivi na manera que ta hace alegre con Dios. Pero cosa hace el maga siervo del Dios na cosa sila ya aprende? El otro profecia hay contesta con ese.​—Mira con el Endnote 21 y 25.

14. Onde ta predica con el buen noticia acerca del Reino y quien ta predica con este?

¹⁴ Predicacion na entero mundo. Acerca na ultimo maga dia, si Jesus ya habla: “Este Buen Noticia acerca del Reino ay anuncia na entero mundo.” (Mateo 24:3, 14) El buen noticia acerca del Reino ta predica ya na mas de 230 lugar y na mas de 700 lengguaje. Si, na entero mundo, el maga Testigo de Jehova estaba na “todo maga nacion, raza, tribo” ta ayudá con el maga gente para entende si cosa el Reino y si cosa este hay hace.  (Revelacion 7:9) Libre este sila ta hace. Maskin pa ta odia y ta persigui kanila el maga gente, nuay quien puede hace descansa con el predicacion como cosa ya habla si Jesus.​—Lucas 21:17.

15. (a) Ta creé ba tu que ta vivi ya kita na ultimo maga dia? Porque? (b) Cosa hay sucede con aquellos quien ta obedece con Jehova y con aquellos gendeh?

¹⁵ Ta creé ba tu que ta vivi ya kita na ultimo maga dia? Ta cumpli ya el manada profecia na Biblia acerca na ultimo maga dia. Gendeh dura, hay decidi si Jehova que descansa el predicacion del buen noticia y llega “el fin.” (Mateo 24:14) Cosa el fin? Este amo el Armagedon, cuando el Dios hay quita con el maldad. Hay usa si Jehova con Jesus y con el de suyu maga poderoso angel para destroza con aquellos no quierre obedece con Ele y con el de suyu Anak. (2 Tesalonica 1:6-9) Despues de ese, gendeh puede engaña si Satanas y el de suyu maga demonio con el maga gente. Y todo aquellos quien quierre obedece con Dios y suporta na de suyu Reino hay mira el cumplimiento del todo promesa del Dios.​—Revelacion 20:2; 21:3-5.

16. Ciendo bien cerca ya el fin, cosa tu debe hace?

¹⁶ Cerca ya termina con este mundo de Satanas. Poreso bien importante que preguntá kita este, ‘Cosa iyo debe hace?’ Quierre si Jehova que continua tu aprende con el Biblia. Debe serioso tu na de tuyu estudiada. (Juan 17:3) Tiene maga miting cada semana el maga Testigo de Jehova para ayudá con el maga gente entende con el Biblia. Pricura tu atende regular con ese maga miting. (Le con el Maga Hebreo 10:24, 25.) Si ya sabé tu que tiene tu cosa debe cambia na de tuyu vida, no tiene miedo  hace con ese. Si hace tu se, hay queda mas fuerte el de tuyu amistad con Jehova.​—Santiago 4:8.

17. Porque el mayoria del maga gente hay espanta si llega ya el fin?

¹⁷ Si apostol Pablo ya explica que llega el destrozo del maga malo cuando el mayoria del maga gente gendeh ta expecta con ese, “como un ladron del noche.” (1 Tesalonica 5:2) Si Jesus ya habla que manada el gendeh pone atencion con el maga evidencia que ta vivi ya kita na ultimo maga dia. Ya habla le: “El llegada del Anak del Gente [o el ultimo maga dia] ay sucede igual como ya sucede na tiempo de Noe. Cay durante aquel maga dia antes del avenida, el mga gente ta come y ta toma, y el maga hombre y maga mujer ta casa hasta el dia gayot cuando si Noe ya embarca na barco. Y nuay sila suspecha ni nada hasta ya llega el avenida y ya man anud sila todo. Ansina gayot ay sucede na llegada del Anak del Gente.”​—Mateo 24:37-39.

18. Cosa aviso ya dale si Jesus kanaton?

¹⁸ Ya dale aviso si Jesus que no kita debe queda ocupao na “maga borracherias y maga lingasa de este vida.” Ya habla le que de repente llega el fin “igual como un trampa.” Ya menciona tambien le que “ese dia ay llega gayot para con todo el maga viviente na entero mundo.” Y ya habla pa le: “Poreso, esta ustedes despierto y reza firmi, para ay tene ustedes fuerza para resisti todo el maga cosa-cosa que ay sucede, y ay puede ustedes con comfianza man atubangan con el Anak del Gente.” (Lucas 21:34-36) Porque bien importante que pone kita atencion con el aviso de Jesus? Cay bien cerca ya destroza con el mal mundo de Satanas. Aquellos lang con quien ta aprova si Jehova y si Jesus el sobrevivi na fin y vivi hasta para cuando na nuevo mundo.​—Juan 3:16; 2 Pedro 3:13.