Jehova el nombre del Dios y este quierre decir “Ta Causá Le Para Sucede.” Si Jehova el todopoderoso Dios y el quien ya crea con el todo las cosas. Tiene le poder para hace maskin cosa que ya decidi le hace.

Na Hebreo, cuatro letra el nombre del Dios. YHWH o JHVH este si na Ingles. Puede incuntra cerca 7,000 beses con el nombre del Dios na Hebreo Escritura. El maga gente na entero mundo ta usa y ta pronuncia con el nombre Jehova asegun na diila lengguaje.

▸ Cap. 1, par. 15

El Dios amo el Autor del Biblia pero ya usa le con el maga gente para escribi con ese. Igual lang se con el un negociante quien ya manda con el de suyu secretaria escribi un carta que ta contene su idea. Ya usa el Dios con el de suyu sagrao espiritu para guiá con el maga escritor del Biblia para escribi si cosa el na de suyu pensamiento. El espiritu del Dios ya guiá kanila na diferente manera, tiene vez para puede sila suña o mira maga vision que hay escribi sila despues.

▸ Cap. 2, par. 5

Maga enseñanza este na Biblia que ta ayudá kanaton hace maga justo decicion. Por ejemplo, el principio que “el maga barcada malo ta hace cambia el custumbre bueno de un gente” ta enseña que tiene buen o mal efecto kanaton el maga gente con quien kita pirmi tan junto. (1 Corinto 15:33) Y el principio “cosa el gente ta siembra, ese tamen ele ay cosecha” ta enseña kanaton que gendeh kita puede escapa con el resulta del cosa kita ya hace.​—Galacia 6:7.

▸ Cap. 2, par. 12

Un mensaje este estaba con Dios. Ese mensaje posible ta explica acerca el voluntad del Dios, un enseñanza de moral, un mandato o juzgamiento. Puede tambien se un mensaje acerca si cosa sucede na futuro. Manada profecia na Biblia el ya cumpli ya.

▸ Cap. 2, par. 13

Si Jesus el ya cumpli con el manada profecia na Biblia acerca con el Mesias. Mira con el cajon “ Maga Profecia Acerca con el Mesias.”

▸ Cap. 2, par. 17, ftn.

Ya crea si Jehova con el tierra para queda un paraiso donde hay esta el maga gente quien ta ama con ele. Nuay cambia el de suyu proposito. Gendeh dura, hay quita le con el maldad y dale vida hasta para cuando con el de suyu maga siervo.

▸ Cap. 3, par. 1

El angel quien ya principia el rebelion contra con Dios. Ya llama con ele Satanas que quierre decir “el uno quien ta resisti” cay tan contra le con Jehova. Ya llama tambien con ele Diablo que quierre decir “el falso acusador.” Ya dale con ele este nombre cay ta habla le imbusterias acerca con Dios y ta engaña con el maga gente.

▸ Cap. 3, par. 4

Ya crea si Jehova maga angel antes de crea con el tierra. Ya crea kanila para queda na cielo. Tiene mas de cien millon de angel. (Daniel 7:10) Tiene sila nombre y diferente personalidad. No quierre el maga leal angel que adora kanila el maga gente. Otro-otro el diila maga ranggo y trabajo. Tiene diila ta sirvi con Jehova na trono, ta lleva el de suyu mensaje, ta protege y ta guiá con el de suyu maga siervo aqui na tierra, ta lleva el de suyu juzgamiento y ta suportá con el trabajo predicacion. (Salmo 34:7; Revelacion 14:6; 22:8, 9) Na futuro, hay man guerra sila junto con Jesus na Armagedon.​—Revelacion 16:14, 16; 19:14, 15.

▸ Cap. 3, par. 5; Cap. 10, par. 1

Pecado el maskin cosa que ta sinti kita, ta pensa o ta hace que contra con Jehova o na de suyu voluntad. Ciendo ta destroza el pecado con el diaton relacion con Jehova, ya dale le kanaton maga ley y principio que puede ayudá para evita kita comete pecado. Del primero, perfecto el todo cosas que ya crea si Jehova. Pero cuando ya iscuji kanda Adan y Eva que desobedece con Jehova, ya comete sila pecado y ya queda imperfecto. Ya queda sila viejo y ya muri. Ciendo ya hereda kita pecado con Adan, ta queda tambien kita viejo y ta muri.

▸ Cap. 3, par. 7; Cap. 5, par. 3

Este amo el guerra del Dios para destroza con el mundo de Satanas y con el todo maldad.

▸ Cap. 3, par. 13; Cap. 8, par. 18

Un gobierno este que ya formá si Jehova na cielo. Si Jesucristo el ta rula como el Rey de este. Na futuro, hay usa si Jehova con el Reino para quita con el todo maldad. El Reino del Dios hay rula na entero mundo.

▸ Cap. 3, par. 14

Ya crea el Dios con Jesus antes con el todo las cosas. Ya imbia si Jehova con Jesus aqui na tierra y muri para na bien del todo gente. Despues mata con Jesus, ya resucita con ele si Jehova. Ta rula ya si Jesus ahora na cielo como el Rey na Reino del Dios.

▸ Cap. 4, par. 2

Ya predicta el Biblia si cuando aparece el Mesias. Hay sucede este na fin del 69 semana que ya principia del año 455 B.C.E. y ya termina del año 29 C.E.

Porque kita sabe que ya termina este del 29 C.E.? El 69 semana ya principia del año 455 B.C.E. cuando si Nehemias ya llega na Jerusalem y ya principia construi otravez con el ciudad. (Daniel 9:25; Nehemias 2:1, 5-8) Igual si paquemodo ta puede kita pensa con el numero 12 na palabra “dosena,” ta puede tambien kita pensa el numero 7 na palabra “semana.” El semana que ya menciona na este profecia, gendeh semana de siete dia sino semana de siete año. Asegun se na manera si paquemodo ta cunta con el dia na profecia del Biblia que “un dia por un año.” (Numero 14:34; Ezequiel 4:6) Quierre decir, el cada semana tiene largor de siete año. Entonces, el 69 semana tiene largor de 483 año (69 x 7). Si cunta kita 483 año principia 455 B.C.E., hay llega kita na año 29 C.E. Ese el exacto año que ya bautiza con Jesus y ya queda el Mesias!—Lucas 3:1, 2, 21, 22.

 Este profecia ya predicta tambien acerca na otro pa semana de siete año. Durante ese tiempo, hay mata con el Mesias na año 33 C.E. y principia na año 36 C.E., hay predica con el buen noticia acerca el Reino del Dios gendeh lang na maga Judio sino na todo nacion.​—Daniel 9:24-27.

▸ Cap. 4, par. 7

El Biblia ta enseña que si Dios Jehova el Creador y ya crea le con Jesus antes con el todo las cosas. (Colosa 1:15, 16) Gendeh si Jesus el Todopoderoso Dios. Nunca le ya clama que igual le con Dios. Gane, ele ya habla: “El Tata mas importante que conmigo.” (Juan 14:28; 1 Corinto 15:28) Pero el cuanto maga religion ta enseña acerca na Trinidad que tres persona el Dios: el Tata, el Anak y el espiritu santo o sagrao espiritu. Nuay na Biblia el palabra “Trinidad.” Un falso enseñanza se.

El sagrao espiritu amo el activo fuerza de Jehova, el de suyu invisible poder que ta usa le para hace el de suyu voluntad. Gendeh este persona. Por ejemplo, el maga Cristiano del primer siglo “ya queda lleno del Espiritu Santo” y si Jehova ya habla: “Ay vacia yo mi Espiritu con todo el maga gente.”​—Maga Actividad 2:1-4, 17.

▸ Cap. 4, par. 12; Cap. 15, par. 17

Gendeh ta usa cruz el maga verdadero Cristiano si ta adora con Dios. Porque?

1.  Ya usa con el cruz na falso religion por largo tiempo. De antes, ya usa con ese el maga gente para adora con el maga creacion y na maga pagano ritual de sexo. Durante el 300 año despues del muerte de Jesus, gendeh ta usa cruz el maga Cristiano na diila adoranza. Despues el cuanto año, el Romano emperador si Constantine ya hace con el cruz como el simbolo del Cristianidad. Ya usa con ese simbolo para hace mas popular con el Cristianidad. Pero nuay coneccion el cruz con Jesucristo. El New Catholic Encyclopedia ta habla: “Puede incuntra con el cruz na maga cultura antes pa el tiempo del maga Cristiano y na cultura del maga gendeh Cristiano.”

2.  Nuay muri si Jesus na cruz. El Griego palabra que yan translate “cruz” quierre decir “un derecho estaca,” “un  palo” o “un pono.” El The Companion Bible ta explica: “Nuay maskin cosa escribido na lengguaje Griego del [Nuevo Testamento] que ta indica dos pedazo de palo.” Ya muri si Jesus na un derecho estaca.

3.  No quierre si Jehova que usa kita maga imagen o simbolo na diaton adoranza.​—Exodo 20:4, 5; 1 Corinto 10:14.

▸ Cap. 5, par. 12

Ya manda si Jesus con el de suyu maga dicipulo que comemora el de suyu muerte. Ta hace sila este na Nisan 14 cada año, ese tambien el tiempo que el maga Israelita ta celebra con el Pascua. El pan y vino que ta representa con el cuerpo y sangre de Jesus, ta hace pasa con el todo quien presente na Comemoracion. Aquellos quien hay rula junto con Jesus na cielo ta come con el pan y ta toma con el vino. Mientras aquellos quien tiene esperanza vivi hasta para cuando na tierra ta atende na Comemoracion pero gendeh ta come con el pan y ta toma con el vino.

▸ Cap. 5, par. 21

El Hebreo y Griego palabra que yan translate “alma” ya usa na Biblia para refiri na (1) gente, (2) animal o (3) vida del un gente o del un animal. Taqui el cuanto maga ejemplo:

• Gente. Na tiempo de Noe “poco lang el gente quien ya puede salva na barco, ocho persona [“alma,” NW] lang sila todo.” (1 Pedro 3:20) El palabra “alma” aqui ta refiri na maga gente—con Noe, de suyu mujer, diila tres anak y el diila maga mujer.

• Animal. “El Dios ya habla: ‘Queda manada na agua el maga vivo creatura [“alma,” footnote], y el maga ta bula creatura, bula arriba del tierra na atmosfera del cielo.’ Despues el  Dios ya habla: ‘Hay tiene diferente clase de vivo creatura [“alma,” footnote] na tierra, maga manso animal, maga animal tan kamang y mailap animal de tierra asegun na diila clase.’ Y ese el ya sucede.”​—Genesis 1:20, 24.

• El vida del un gente o del un animal. Si Jehova ya habla con Moises: “Muerto ya el todo maga gente quien ta busca para mata contigo [“ta busca con el de tuyu alma,” footnote].” (Exodo 4:19) Cuando taqui si Jesus na tierra, ele ya habla: “Yo amo el buen pastor. El buen pastor ta dale su vida [“alma,” NW footnote] por causa del disuyo maga carnero.”​—Juan 10:11.

  Puera con ese, si el un persona ta hace un cosa ‘con todo alma,’ ese quierre decir que ta hace le se con todo gusto y con todo de suyu abilidad. (Mateo 22:37; Deuteronomio 6:5) Puede refiri con el muerto como muerto alma.​—Numero 6:6; Haggeo 2:13.

▸ Cap. 6, par. 5; Cap. 15, par. 17

El Hebreo y Griego palabra que yan translate “espiritu” na Biblia puede refiri na diferente cosas. Pero, pirmi este ta refiri na maga cosas que gendeh kita ta puede mira igual na viento o resuello del maga gente y animal. Este palabra puede tambien refiri na maga espiritu persona y na sagrao espiritu, el activo fuerza del Dios. Gendeh ta enseña el Biblia que tiene separtao parte del gente el ta continua vivi despues ele muri.​—Exodo 35:21; Salmo 104:29; Mateo 12:43; Lucas 11:13.

▸ Cap. 6, par. 5; Cap. 15, par. 17

El Griego palabra ‘Gehena’ yan translate “infierno” na El Nuevo Testamento na Chavacano. Gehena el nombre del lugar cerca na Jerusalem donde ta quema con el maga  basura hasta man uput este. Nuay evidencia que ta castiga aqui o ta quema vivo con el maga animal y gente na tiempo de Jesus. Poreso gendeh simbolo de un invisible lugar el Gehena donde ta castiga y ta quema hasta para cuando con el maga gente quien ya muri ya. Cuando ya menciona si Jesus acerca con aquellos con quien ta buta na Gehena, ta refiri le con el maga gente quien el Dios gendeh mas hace vivi otravez.​—Mateo 5:22; 10:28.

▸ Cap. 7, par. 20

Este el rezo que ya dale si Jesus cuando ya enseña le con el de suyu maga dicipulo si paquemodo reza. Ta llama tambien con este el Padre Nuestro o el modelo rezo. Por ejemplo, ya enseña kanaton si Jesus reza na este manera:

• “Santifica con el de uste nombre”

  Ta pidi kita que limpia si Jehova el de suyu nombre desde na todo imbusterias y para todo na cielo y na tierra hay honra y respeta con el de suyu nombre.

• “Manda vene el de Uste Reino”

  Ta pidi kita que el gobierno del Dios hay destroza con el mal mundo de Satanas, rula na entero tierra y hace con este un paraiso.

• “Hace el de Uste voluntad aqui na mundo”

  Ta pidi kita que cumpli el proposito de Jehova para na tierra. Como resulta, el maga obediente y perfecto gente hay vivi hasta para cuando na paraiso tierra como cosa quierre si Jehova cuando ya crea le con el maga gente.

▸ Cap. 8, par. 2

Ya dale si Jehova el rescate para salva con el maga gente na pecado y muerte. El rescate amo el valor que necesita paga para hace bira otravez el perfecto vida que ya hace perde si Adan y el buen relacion del maga gente con Jehova. Ya  imbia el Dios con Jesus aqui na tierra para muri. Por causa na muerte de Jesus, todo el maga gente tiene oportunidad para vivi hasta para cuando y queda perfecto.

▸ Cap. 8, par. 21; Cap. 9, par. 13

El profecia na Daniel capitulo 4 ta enseña kanaton que el Dios hay formá de suyu Reino na año 1914.

El profecia: Ya dale si Jehova con Rey Nabucodonosor un profetico sueño acerca na un grande pono que ya hace tumba. Na sueño, ya pone venda de yero y bronce con el tuud para gendeh este crisi adentro de “siete tiempo.” Despues de ese, hay crisi otravez el pono.​—Daniel 4:1, 10-16.

Si cosa quierre decir del profecia para kanaton: El pono ta representa con el rulanza del Dios. Por cuanto año, ya usa si Jehova maga rey na Jerusalem para rula con el nacion del Israel. (1 Cronicas 29:23) Pero nuay esta fiel aquellos maga rey poreso ya termina el diila rulanza. Ya destroza con el Jerusalem del año 607 B.C.E. Ese el principio del “siete tiempo.” (2 Rey 25:1, 8-10; Ezequiel 21:25-27) Cuando ya habla si Jesus, “El maga hende-Judio ay destrosa con Jerusalem hasta ay cumpli el tiempo que Dios ta permiti canila,” ta converza le acerca el “siete tiempo.” (San Lucas 21:24, El Nuevo Testamento) Entonces, nuay termina el “siete tiempo” cuando taqui si Jesus na tierra. Ya promete si Jehova que tiene quien hay reina na fin del “siete tiempo.” El rulanza de este nuevo Rey, si Jesus, hay lleva manada bendicion na maga siervo del Dios na entero tierra hasta para cuando.​—Lucas 1:30-33.

El largor del “siete tiempo”: El “siete tiempo” ya dura por 2,520 año. Si cunta kita 2,520 año principia na año 607 B.C.E., hay llega kita na año 1914. Ese el tiempo cuando ya hace si Jehova con Jesus el Rey na Reino del Dios na cielo.

 Paquemodo ya saca el numero 2,520? El Biblia ta habla que el tres y media tiempo tiene el largor de 1,260 dia. (Revelacion 12:6, 14, NW) Entonces doble de ese numero el “siete tiempo” o 2,520 dia. El 2,520 dia tiene largor de 2,520 año asegun na manera si paquemodo ta cunta con el dia na profecia del Biblia que “un dia por un año.​—Numero 14:34; Ezequiel 4:6.

▸ Cap. 8, par. 23

El palabra “arcangel” quierre decir “lider del maga angel.” Uno lang el arcangel que ya menciona na Biblia y Miguel el de suyu nombre.​—Daniel 12:1; San Judas 9.

Si Miguel amo el Lider del maga soldao angel del Dios. El Revelacion 12:7 ta habla: “Si Miguel y el disuyo maga angel ya imbisti con el Dragon . . . y el disuyo maga angel.” Asegun na Revelacion, si Jesus el Lider del maga soldao del cielo o maga angel del Dios. Entonces, Miguel el otro nombre de Jesus.​—Revelacion 19:14-16.

▸ Cap. 9, par. 4

Ta refiri este con el tiempo donde tiene cosa hay sucede na tierra antes de destroza el Reino del Dios con el mundo de Satanas. El maga expresion que ya usa na profecia del Biblia como el “fin del mundo” y “el llegada del Anak del Gente,” ta refiri tambien con ese tiempo. (Mateo 24:3, 37) Ya principia el “ultimo maga dia” cuando el Reino del Dios ya principia rula na cielo del 1914 y termina este na Armagedon donde hay destroza con el mundo de Satanas.​—2 Timoteo 3:1; 2 Pedro 3:3.

▸ Cap. 9, par. 5

Si hace vivi otravez el Dios con el un persona quien ya muri ya, ta llama con ese resureccion. Nueve resureccion el ya menciona na Biblia. Kanda Elias, Eliseo, Jesus, Pedro y Pablo el quien ya hace con ese resureccion na ayuda del poder del Dios. Ya promete si Jehova que hay resucita le con el “maga gente bueno y el maga pecador” aqui na tierra. (Maga Actividad 24:15) Ta menciona tambien el Biblia que tiene resureccion para na cielo. Sucede este si aquellos con quien ya iscuji el Dios hay resucita para queda na cielo junto con Jesus.​—Juan 5:28, 29; 11:25; Filipo 3:11; Revelacion 20:5, 6.

▸ Cap. 9, par. 13

El demonismo o espiritismo amo el mal practica donde el un persona ta pricura comunica directa con el maga espiritu o por medio na otro gente, igual na surujano o espiritista. Ta practica espiritismo el maga gente cay ta creé sila con el falso enseñanza que ta continua vivi el espiritu despues del muerte del un gente y ta queda un poderoso espiritu. Ta influenciá tambien el maga demonio con el maga gente para desobedece con Dios. Parte tambien del demonismo el barang, astrologia, adivinacion o magica. Manada maga libro, magasin, horoscope, salida, poster y maskin na maga cancion que ta hace sale que bonito y gendeh peligroso el magica y maga demonio. Tiene tambien coneccion na maga demonio el manada tradicion que ta hace si tiene quien ya muri igual na celebracion despues del inchero, aniversario del muerte, ofrecimiento y velacion na muerto. Ta usa droga el maga gente si ta pricura usa con el poder del maga demonio.​—Galacia 5:20, NW; Revelacion 21:8.

▸ Cap. 10, par. 10; Cap. 16, par. 4

Si Jehova el Todopoderoso Dios y ya crea le con el entero universo. (Revelacion 15:3) Poreso, ele el Dueño del todo las cosas y tiene le soberania o completo autoridad para rula con el de suyu todo creacion. (Salmo 24:1; Isaias 40:21-23; Revelacion 4:11) Ya hace le maga ley para na todo de suyu creacion. Tiene tambien autoridad si Jehova que iscuji con otro para rula. Ta suportá kita con el soberania de Jehova si ta ama y ta obedece kita con ele.​—1 Cronicas 29:11.

▸ Cap. 11, par. 10

El aborcion amo el intencional manera para mata con el bata que nuay pa nace. Gendeh este un accidente o el resulta del natural reaccion del cuerpo del gente. El bata que na barriga del un nana, gendeh lang basta otro parte del de suyu cuerpo sino un separtao persona.

▸ Cap. 13, par. 5

Este el proceso donde ta transfiri con el puro sangre o uno na cuatro importante parte de este para na cuerpo del un gente estaba na otro o estaba na sangre que yan deposito. El cuatro importante parte del sangre amo el plasma, colorao celula, blanco celula y platelet.

▸ Cap. 13, par. 13

El palabra “disciplina” na Biblia gendeh basta otro palabra lang para na castigo. Si ta discipliná kanaton, ta enseña y ta corecta kanaton. Gendeh por demas el disciplina de Jehova. (Proverbio 4:1, 2) Un buen ejemplo si Jehova para na maga mayores. Bien efectivo el disciplina de Jehova poreso el un persona puede ama con ese. (Proverbio 12:1) Ta ama si Jehova con el de suyu maga siervo y ta enseña kanila. Ta dale le kanila maga instruccion para corecta diila maga gendeh justo idea y hay ayudá se kanila para pensa y actua na manera que ta hace alegre con ele. Para na maga mayores, parte del disciplina que hace entende con el maga anak si porque sila debe queda obediente. Necesita tambien enseña kanila ama con Jehova, con el de suyu palabra na Biblia y entende con el maga principio de este.

▸ Cap. 14, par. 13

Maga mal espiritu creatura sila que gendeh kita ta puede mira y mas poderoso que kanaton. Maga mal angel el maga demonio. Ya queda sila enemigo del Dios cuando ya desobedece sila con ele. (Genesis 6:2; San Judas 6) Ya sigui sila na rebelion de Satanas contra con Jehova.​—Deuteronomio 32:17; Lucas 8:30; Maga Actividad 16:16; Santiago 2:19.

▸ Cap. 16, par. 4