1-3. Todo kita ya queda preso de cosa y paquemodo libra kanaton si Jehova?

IMAGINA que ya sentenciá contigo man preso hasta muri tu por causa con el un crimen que nuay tu comete. Nuay posibilidad que puede tu libra. Dol nuay mas esperanza el de tuyu futuro y nuay mas ya tu cosa puede hace. Pero na uliji, ya puede tu sabe que tiene un persona quien tiene poder para libra contigo y ya promete le que ayudá contigo! Cosa tu sinti?

² Todo kita ya queda preso na muerte. Maskin cosa kita hace, gendeh kita puede escapa. Pero tiene poder si Jehova para libra kanaton desde na muerte. Y ya promete le que “el ultimo contrario que ay destroza Le amo el Muerte.”​—1 Corinto 15:26.

³ Imagina el alegria que hay experienciá tu llega el tiempo que gendeh mas tu man lingasa que muri tu! Pero gendeh lang el muerte el quita si Jehova. Hay hace tambien le vivi otravez con aquellos quien ya muri ya. Pensa si paquemodo tu hay beneficia con este. Ele ya promete que “el maga muerto” hay vivi otravez. (Isaias 26:19) El Biblia ta llama con este el resureccion.

4. (a) Cosa kanaton puede dale comforta si ya muri el un miembro na diaton familia o el diaton amigo? (b) Quien el maga buen amigo de Jesus?

⁴ Bien duele para kanaton si ya muri el un miembro del diaton familia o el diaton amigo. Ta sinti kita  miserable. Nuay kita cosa puede hace para vivi otravez aquel persona. Pero ta dale kanaton comforta el Biblia. (Le con el 2 Corinto 1:3, 4.) Discuti kita un ejemplo que ta dale mira si paquemodo de quierre si Jehova y si Jesus hace vivi otravez con el maga gente ya muri ya. Cuando taqui pa na tierra si Jesus, pirmi le ta visitá con Lazaro y con el maga hermana de este, kanda Marta y Maria. Maga buen amigo sila de Jesus. El Biblia ta habla: “Si Jesus ta ama gayot con Marta y su hermana y con Lazaro.” Pero, ya muri si Lazaro.​—Juan 11:3-5.

5, 6. (a) Cosa ya hace si Jesus cuando ya mira le que ta llura el familia y maga amigo de Lazaro? (b) Porque ta dale kanaton comforta el cosa ya sinti si Jesus acerca na muerte?

⁵ Ya anda si Jesus con Marta y Maria para dale kanila comforta. Cuando ya sabé si Marta que llega si Jesus, ya anda le apuera del ciudad para hace encuentro con ele. Alegre le mira con Jesus, pero ya habla le: “Si taqui lang Uste antes, mi hermano noay pa era muri.” Pensaba si Marta que atrasao ya si Jesus. Ya mira si Jesus que ta llura si Maria. Cuando ya mira le que bien triste sila, ya sinti le duele y ya llura. (Juan 11:21, 33, 35) Ya sinti le el dolor que ta sinti kita si ya muri el un persona que importante kanaton.

⁶ Ta dale kanaton comforta que ta sinti si Jesus el cosa kita ta sinti acerca na muerte. Igual con Jesus, ansina tambien ta sinti el de suyu Tata. (Juan 14:9) Tiene poder si Jehova para quita con el muerte hasta para cuando y bien cerca ya le se hace.

7, 8. Porque no quierre si Marta que quita con el piedra na sepultura de Lazaro? Cosa ya hace si Jesus?

⁷ Cuando ya llega si Jesus na sepultura donde ya  pone con el cuerpo de Lazaro, trancao de un grande piedra el entrada de este. Si Jesus ya habla: “Quita el piedra!” Pero no quierre si Marta cay “cuatro dias” ya talla na sepultura el cuerpo de Lazaro. (Juan 11:39) No sabe le si cosa hay hace si Jesus para ayudá con el de suyu hermano.

⁸ Ya habla si Jesus con Lazaro: “Sale afuera!” Ya espanta kanda Marta y Maria na cosa sila ya mira. “El muerto ya sale, disuyo maga mano y pies emvuelto pa de maga venda.” (Juan 11:43, 44) Ya vivi otravez si Lazaro! Ya puede le man junto otravez con el de suyu familia y maga amigo. Ya puede sila agarra y man cuento con ele. Un milagro gayot! Si Jesus ya hace resucita con Lazaro.

9, 10. (a) Quien ya dale poder con Jesus para hace resucita con el maga gente? (b) Porque importante kanaton el cosa kita ya le acerca na resureccion?

⁹ Ya hace ba resucita si Jesus con el maga gente por medio na de suyu poder? Nuay. Antes le hace resucita con Lazaro, ya reza si Jesus con Jehova y ya dale con ele poder si Jehova para hace resucita con Lazaro. (Le con el Juan 11:41, 42.) Gendeh lang si Lazaro el ya resucita. El Biblia ta habla kanaton acerca na un bata mujer que 12 año quien ya queda bien enfermo. El de suyu tata, si Jairo, ya queda bien desperao y ya suplica con Jesus que curá con el de suyu unico anak. Mientras tan cuento le con Jesus, ya atraca el cuanto maga gente y ya habla: “El de uste anak ya muri ya. Para cosa pa man destorba con el maestro?” Pero si Jesus ya habla con Jairo: “No tu tene miedo. Tene lang tu fe y el dituyo anak ay salva.” Despues, ya sigui si Jesus con Jairo na  de suyu casa. Cuando cerca ya sila na casa, ya mira y ya oi si Jesus que ta llura el maga gente. Ya habla si Jesus kanila: “No mas ustedes llora. El bata gendeh muerto! Ta durmi lang le.” Ya estraña el tata’y nana del bata na cosa ya habla si Jesus. Ya manda sale si Jesus con el maga gente y ya lleva con el mayores del bata na cuarto donde acustao el bata. Ya agarra si Jesus con el mano del bata y ya habla con ele: “Neneng, levanta ya.” Imagina si paquemodo de alegre el de suyu mayores cuando ya levanta le y ya principia camina! Ya hace resucita si Jesus con el diila anak. (Marcos 5:22-24, 35-42; Lucas 8:49-56) Desde aquel dia, si ta mira sila con el diila anak, ta puede sila acorda el cosa ya hace si Jehova para kanila por medio de Jesus. *

¹⁰ Aquellos ya hace resucita si Jesus ya muri lang otravez. Pero importante el cosa kita ya le acerca kanila cay ta dale este kanaton deverasan esperanza. Quierre si Jehova hace resucita con el maga gente y hay hace le se.

11. Cosa kanaton ta enseña el Eclesiastes 9:5 acerca con Lazaro?

¹¹ Claro ta habla el Biblia que “el maga muerto no sabe ni nada.” Ansina el condicion de Lazaro cuando muerto le. (Eclesiastes 9:5) Si Lazaro dol ta durmi lang como cosa ya habla si Jesus. (Juan 11:11) Cuando na sepultura le, si Lazaro “no sabe ni nada.”

12. Porque kita puede habla que ya resucita gayot con Lazaro?

 ¹² Manada gente el ya mira cuando ya hace resucita si Jesus con Lazaro. Maskin el maga enemigo de Jesus sabe que ya hace le quel milagro. Ya vivi otravez si Lazaro y ta dale se prueba que deverasan el resureccion. (Juan 11:47) Manada tambien gente ya visitá con Lazaro y como resulta, ya principia sila creé que ya imbia el Dios con Jesus. No quierre se el maga enemigo de Jesus poreso ya plaña sila mata con ele y con Lazaro.​—Juan 11:53; 12:9-11.

13. Porque kita puede asigura que hay resucita si Jehova con el maga muerto?

¹³ Si Jesus ya habla que “todo el maga muerto” hay resucita. (Juan 5:28) Entonces, hay vivi otravez el todo quien talli na memoria de Jehova. Pero para puede resucita si Jehova con el un gente, necesita le acorda el todo cosas acerca con aquel persona. Puede ba gayot se le hace? Tiene billones de estrellas na universo. El Biblia ta habla que sabe si Jehova el nombre del cada estrellas. (Le con el Isaias 40:26.) Si ta acorda si Jehova el nombre del cada estrellas, asigurao que facil lang para con ele acorda el todo cosas acerca con el maga gente que hay resucita le. Mas pa, si Jehova el ya crea con el todo las cosas poreso tiene le el poder para hace vivi otravez con el maga gente.

14, 15. Cosa el maga palabra de Job ta enseña kanaton acerca na resureccion?

¹⁴ El un fiel gente, si Job, ta creé na resureccion. Ya preguntá le: “Si muri el un gente, hay vivi ba le otravez?” Despues, ya habla le con Jehova: “Hay llama tu y hay contesta yo contigo. Hay desea gayot tu con el trabajo del de tuyu mano.” Si, sabe si Job que ta desea gayot  si Jehova con el tiempo que hay hace le resucita con el maga muerto.​—Job 14:13-15.

¹⁵ Cosa tu ta sinti acerca na esperanza de resureccion? Siguro ta pensa tu, ‘Hay resucita tambien gaha el de mio familia y maga amigo quien ya muri ya?’ Ta dale kanaton comforta que si Jehova quierre gayot hace vivi otravez con el maga muerto. Sabé kita si cosa ta habla el Biblia acerca si onde sila queda y con quien hay resucita.

16. Cosa clase de vida hay experienciá aquellos quien hay resucita aqui na tierra?

¹⁶ Aquellos con quien ya resucita de antes ya puede man junto otravez con el diila familia y maga amigo aqui na tierra. Pero mas pa con ese el sucede na futuro. Porque? Cay aquellos quien hay vivi otravez aqui na tierra hay tiene el oportunidad que vivi hasta para cuando y gendeh mas muri. Hay vivi sila na un mundo que bien diferente na cosa kita ta mira ahora. Nuay mas guerra, crimen y enfermedad.

17. Con quien hay resucita?

¹⁷ Con quien hay resucita? Ya habla si Jesus que “todo el maga muerto ay oi el disuyo voz, y todo sila ay sale na diila maga sepultura.” (Juan 5:28, 29) Y el Revelacion 20:13 ta habla kanaton: “El mar, el muerte y el lugar del maga muerto ya manda sale afuera con todo el maga muerto que ta guarda sila.” Si, billones de gente hay vivi otravez. Ya habla tambien si apostol Pablo que “el maga gente bueno [o recto] y el maga pecador [gendeh recto, NW] ay resucita.” (Le con el Maga Actividad 24:15.) Cosa se quierre decir?

18. Quien el ‘maga recto’ con quien hay hace resucita?

 ¹⁸ El ‘maga recto’ ta inclui el todo maga fiel siervo de Jehova quien ya vivi antes ya vene si Jesus aqui na tierra. El maga gente igual con Noe, Abraham, Sara, Moises, Rut y Ester hay resucita aqui na tierra. Puede tu le acerca con el cuanto kanila na Hebreo capitulo 11. Quetal aquellos maga fiel siervo de Jehova quien ya muri na diaton tiempo? Maga ‘recto’ tambien sila poreso hay resucita sila.

19. Quien el “maga gendeh recto”? Cosa oportunidad hay dale si Jehova kanila?

 ¹⁹ El “maga gendeh recto” ta refiri con el billones de gente quien nuay tiene el oportunidad conocé con Jehova. Maskin ya muri sila, nuay kanila ulvida si Jehova. Hay hace le resucita kanila y hay tiene sila el oportunidad para aprende y sirvi con ele.

20. Porque gendeh todo resucita?

²⁰ Quierre decir ba que todo quien ya muri hay resucita? Gendeh. Ya habla si Jesus que tiene maga gente gendeh mas vivi otravez. (Lucas 12:5, NW) Quien el decidi si hay resucita ba el un persona o gendeh? Si Jehova amo el ultimo Juez pero ya dale tambien le autoridad con Jesus para queda “juez de todo el maga vivo y el maga muerto.” (Maga Actividad 10:42) Gendeh hace resucita con el maga gente con quien ya juzga como malo y no quierre cambia.​—Mira el Endnote 19.

21, 22. (a) Cosa quierre decir que resucita con el un persona para na cielo? (b) Quien el primer persona que ya resucita para na cielo?

²¹ Ta habla tambien kanaton el Biblia que tiene cuanto maga gente hay queda na cielo. Si resucita el un persona para na cielo, gendeh le vivi otravez como un gente. Hay resucita le na cielo como un espiritu persona.

²² Si Jesus amo el primer persona quien ya ricibi ese clase de resureccion. (Juan 3:13) Tres dia despues muri si Jesus, ya resucita con ele si Jehova. (Salmo 16:10; Maga Actividad 13:34, 35) Nuay resucita con Jesus como un gente. Si apostol Pedro ya habla acerca con Jesus que “na su cuerpo Ele ya muri, pero ya recivi  Le vida na Espiritu.” (1 Pedro 3:18) Ya vivi otravez si Jesus como un poderoso espiritu persona! (1 Corinto 15:3-6) Pero el Biblia ta habla que gendeh lang ele el ricibi este clase de resureccion.

23, 24. Quien el “diutay grupo” que ya menciona si Jesus y cuanto sila?

²³ Antes le de muri, ya habla si Jesus con el de suyu maga fiel dicipulo: “Anda ya yo para prepara un lugar para con ustedes.” (Juan 14:2) Este quierre decir que el cuanto na de suyu maga siguidores hay resucita para queda junto con ele na cielo. Cuanto sila? Ya habla si Jesus que limitao lang el diila numero, un “diutay grupo.” (Lucas 12:32, NW) Ya dale si apostol Juan el exacto numero cuando ya mira le con Jesus que “parao na Monte de Sion [na cielo], y junto con ele ciento cuarenta y cuatro mil.”​—Revelacion 14:1.

²⁴ Cuando resucita con el 144,000 Cristiano? Asegun na Biblia, sucede se despues principia rula si Cristo na cielo. (1 Corinto 15:23) Ta vivi ya kita na ese tiempo y mayoria del 144,000 ya resucita ya para na cielo. Aquellos quien taqui pa na tierra y hay muri na diaton tiempo hay resucita dayun para na cielo. Pero, mas mucho gente el resucita para queda na Paraiso tierra na futuro.

25. Cosa kita hay aprende na siguiente capitulo?

²⁵ Gendeh dura, hay libra si Jehova con el maga gente na muerte y nuay mas ya muerte hasta para cuando! (Le con el Revelacion 21:4) Pero, cosa hay hace aquellos quien anda na cielo? El Biblia ta habla kanaton que hay rula sila junto con Jesus na un Reino o gobierno. Hay aprende kita mas acerca con ese gobierno na siguiente capitulo.