1, 2. Cosa tu debe preguntá con el de tuyu cuerpo y porque este importante?

NA DE TUYU estudiada del Biblia, ya aprende tu que manada gente ta clama que ta adora con Dios pero ta enseña y ta hace maga cosas que ta odia el Dios. (2 Corinto 6:17) Ese el razon si porque ta manda kanaton si Jehova sale na falso religion, “el Grande Babilonia.” (Revelacion 18:2, 4) Cosa tu hace? Cada uno kanaton necesita decidi y preguntá este, ‘Quierre ba yo adora con Dios na manera que quierre le o na manera que yan anad yo?’

² Un buen decicion si ya deja ya tu con el falso religion. Pero, baká tiene siempre maga practica y tradicion de falso religion el ta continua tu hace. Discuti kita el cuanto de ese y si porque importante que mira con este igual si paquemodo ta mira si Jehova.

3. (a) Porque dificil para con el cuanto maga gente que gendeh mas usa maga imagen na diila adoranza? (b) Cosa ta habla el Biblia acerca na usada de maga imagen para adora con Dios?

³ El cuanto maga gente ya dura ya ta usa maga imagen o altar na diila casa para adora con Dios. Si ansina tambien tu ta hace, baká sinti tu otro o gendeh justo que adora con Dios si nuay se maga cosas. Pero acorda que ya enseña kanaton si Jehova si paquemodo con ele adora. Y claro ta habla kanaton el Biblia que no quierre si Jehova usa kita maga imagen na diaton adoranza.​—Le con el Exodo 20:4, 5; Salmo 115:4-8; Isaias 42:8; 1 San Juan 5:21.

4. (a) Porque gendeh kita debe dale ofrecimiento con el maga muerto? (b) Porque ya prohibi si Jehova con el de suyu maga siervo que comunica con el maga muerto?

 ⁴ El cuanto maga gente ta dale grande tiempo y energia na diila maga familia quien ya muri ya para gendeh kanila hace malo. Ta dale pa gane sila ofrecimiento kanila. Pero ya aprende kita que gendeh kanaton puede ayudá o hace malo aquellos quien ya muri ya. Gendeh sila ta vivi na otro lugar. Peligroso comunica kanila cay el maskin cosa mensaje que dol estaba na diaton pariente quien ya muri ya, estaba gayot na maga demonio. Ese el razon si porque ya prohibi si Jehova con el maga Israelita que comunica con el maga muerto o queda envuelto na maskin cosa clase de demonismo.​—Deuteronomio 18:10-12; mira con el Endnote 26 y 31.

5. Cosa contigo puede ayudá para gendeh mas tu usa maga imagen na adoranza con Dios y gendeh mas reza na maga muerto?

⁵ Cosa contigo puede ayudá para gendeh mas tu usa maga imagen na adoranza con Dios y gendeh mas reza na maga muerto? Necesita tu le con el Biblia y pensa enbuenamente si cosa el mirada de Jehova con ese maga cosas. “Detestable” se o ta odia gayot con ese si Jehova. (Deuteronomio 27:15) Reza con Jehova cada dia que ayudá contigo mira maga cosas igual si paquemodo le ta mira y pidi que ayudá contigo para adora con ele na manera que quierre le. (Isaias 55:9) Puede tu asigura que hay ayudá contigo si Jehova para puede tu desaleja con el maskin cosa que tiene que hace na falso adoranza.

6. Porque ya iscuji con el Deciembre 25 para celebra el nacimiento de Jesus?

⁶ Un popular celebracion na entero mundo el Pascua y mayoria del maga gente ta pensa que amo se el  celebracion del nacimiento de Jesus. Pero el deverasan, conectao este na falso adoranza. Asegun na un encyclopedia, el maga Romano pagano ta celebra con el cumpliaño del sol na Deciembre 25. Quierre el maga lider del iglesia que mas manada pagano el queda Cristiano poreso maskin nuay nace si Jesus del Deciembre 25, ya decidi sila celebra el nacimiento de Jesus na ese fecha. (Lucas 2:8-12) Nuay celebra Pascua el maga dicipulo de Jesus. El un libro de referencia ta explica que adentro del 200 año despues nace si Jesus, “nuay quien sabe y poco lang el interesao si del cuando gayot le ya nace.” (Sacred Origins of Profound Things) Ya principia celebra con el Pascua maga cuanto siglo pa despues si Jesus vivi aqui na tierra.

7. Porque gendeh ta celebra Pascua el maga verdadero Cristiano?

⁷ Manada gente sabe que ya origina na maga pagano el Pascua y el maga tradicion de este, igual el dalida regalo y maga party. Por ejemplo, ya prohibi del antes el celebracion del Pascua na England y na cuanto parte del America cay ya origina este na maga pagano. Ta castiga con aquellos quien ta celebra. Pero na uliji, ya principia otravez celebra Pascua el maga gente. Porque gendeh ta celebra Pascua el maga verdadero Cristiano? Cay quierre sila hace alegre con Dios na todo cosa sila ta hace.

8, 9. Porque gendeh ta celebra cumpliaño el maga Cristiano del primer siglo?

⁸ Un popular celebracion tambien para na manada gente el diila cumpliaño. Debe ba celebra cumpliaño el maga verdadero Cristiano? El solamente quien ya celebra cumpliaño que ya menciona na Biblia amo aquellos quien gendeh ta adora con Jehova. (Genesis 40:20; Marcos 6:21) Ya usa con el celebracion de cumpliaño para  honra con el maga falso dios. Ese el razon si porque el maga Cristiano del primer siglo “ya considera con el celebracion de nacimiento del maskin quien como tradicion de pagano.”​—The World Book Encyclopedia.

⁹ Ta creé el maga Romano y Griego de antes que presente el un espiritu na nacimiento del cada persona y hay protege este con el persona na de suyu entero vida. El maga gendeh Cristiano na aquel tiempo ta celebra cumpliaño cay ta pensa sila que por medio con ese celebracion hay protege el diila maga dios con el persona de quien cumpliaño ya celebra.

10. Porque gendeh debe celebra cumpliaño el maga Cristiano?

¹⁰ Para contigo, aceptable ba con Jehova el maga celebracion que conectao na falso religion? (Isaias 65:11, 12) Gendeh gayot. Poreso, gendeh kame ta celebra cumpliaño o otro celebracion que conectao na falso religion.

11. Porque ta celebra el cuanto maga gente con el maga celebracion que ya origina na maga pagano? Cosa debe el mas importante contigo?

¹¹ Maskin pa sabe el cuanto maga gente que ya origina na maga pagano el Pascua y otro celebracion, ta celebra lang siempre sila con este. Ta pensa sila que un buen oportunidad lang este para man junto con el diila familia. Ansina ba tambien tu ta sinti? Gendeh malo que quierre tu man junto con el de tuyu familia. Ya crea si Jehova con el familia y quierre le que tiene kita buen relacion kanila. (Efeso 3:14, 15) Pero, mas importante que tiene kita buen relacion con Jehova contra celebra maga celebracion de falso religion para lang hace alegre con el diaton maga pariente. Poreso, si apostol Pablo ya habla: “Precura ustedes descubri si cosa ta hace alegre con el Señor.”​—Efeso 5:10.

12. Cosa clase de celebracion el gendeh aceptable con Jehova?

 ¹² Manada gente ta sinti que gendeh importante si onde ya origina el maga celebracion pero gendeh ansina el cosa ta sinti si Jehova. Gendeh aceptable con ele el maga celebracion que estaba na falso adoranza o ta alaba con el maga gente o simbolo del un nacion. Por ejemplo, manada celebracion el maga gente de Egipto para na diila maga falso dios. Despues sale el maga Israelita na Egipto, ya copiá sila el uno del maga pagano celebracion y ya llama con este “un fiesta para con Jehova.” Pero ya castiga kanila si Jehova por causa con ese. (Exodo 32:2-10) Igual con el cosa ya habla si profeta Isaias, gendeh kita debe “agarra cosa mabuling!”​—Le con el Isaias 52:11.

13. Cosa siguro el de tuyu maga pregunta si decidi tu que gendeh mas celebra maga holiday?

¹³ Si decidi tu que gendeh mas celebra maga holiday, manada siguro tu maga pregunta. Por ejemplo: Cosa yo debe hace si preguntá conmigo el de mio maga uban na trabajo si porque gendeh yo ta celebra Pascua junto kanila? Cosa yo debe hace si tiene quien ya dale conmigo regalo na tiempo de Pascua? Cosa yo debe hace si ta expecta el de mio marido o mujer que hay celebra yo maga holiday? Cosa yo hace para gendeh queda triste el de mio maga anak cay gendeh celebra el diila cumpliaño o otro pa maga holiday?

14, 15. Cosa tu puede hace si tiene contigo quien ya habla “Merry Christmas!” o quierre contigo dale regalo?

¹⁴ Importante que usa de tuyu sentido comon si decidi tu si cosa habla y hace na cada situacion. Por ejemplo, si tiene contigo quien ya habla “Merry Christmas!” gendeh tu debe ignora kanila. Puede tu contesta kanila, “Gracias.” Pero si tiene quien quierre sabé mas, puede tu kanila  explica si porque gendeh tu ta celebra Pascua. Pero debe tu con este habla con respeto y na buen manera. El Biblia ta habla: “Hace el de ustedes conversada alegre y interesante. Contesta con cada uno con abilidad, como conviene.” (Colosa 4:6) Puede tambien tu kanila habla que alegre tu man junto-junto con otro y dale regalo pero ya decidi tu que no hace con ese na tiempo de Pascua.

¹⁵ Cosa tu debe hace si tiene contigo quien ya dale regalo? Nuay dale lista de ley el Biblia pero ta habla este que debe kita tiene limpio conciencia. (1 Timoteo 1:18, 19) Posible no sabe el persona quien ya dale contigo regalo que gendeh tu ta celebra Pascua. O baká habla le, “Sabe yo que gendeh tu ta celebra Pascua pero quierre siempre yo dale este contigo.” Maskin onde na ese dos situacion, puede tu decidi si acepta ba tu con el regalo o gendeh. Pero maskin cosa pa el de tuyu decicion, asigura que limpio el de tuyu conciencia. No quierre kita hace maga cosas que hay tiene mal efecto na diaton relacion con Jehova.

16. Cosa tu debe hace si quierre celebra holiday el de tuyu familia?

¹⁶ Cosa tu debe hace si quierre celebra holiday el de tuyu familia? No man contra kanila. Acorda que tiene sila derecho para decidi si cosa sila quierre hace. Trata kanila enbuenamente y respeta con el diila decicion igual como quierre tu que respeta sila con el de tuyu decicion. (Le con el Mateo 7:12.) Pero cosa tu debe hace si quierre el de tuyu familia que man junto tu kanila mientras ta celebra sila holiday? Antes tu decidi si cosa hace, reza con Jehova que ayudá contigo hace el justo decicion. Pensa enbuenamente y man research acerca el situacion. Acorda que quierre tu pirmi hace alegre con Jehova.

17. Cosa tu puede hace para gendeh envidiá el de tuyu maga anak si ta celebra holiday el otro?

 ¹⁷ Cosa tu puede hace para na de tuyu maga anak si ta mira sila con otro ta celebra holiday? Puede tu hace maga bonito cosas para kanila na otro-otro tiempo. Puede tambien tu dale kanila regalo. Y el uno del maga bonito regalo que puede tu dale amo el de tuyu tiempo y amor.

18. Porque kita debe atende na maga miting del maga verdadero Cristiano?

¹⁸ Para hace alegre con Jehova, necesita kita deja con el falso religion incluido el maga tradicion y celebracion de este. Pero necesita tambien kita practica el verdadero adoranza. Paquemodo? Un manera amo por medio na regular atendida na maga miting del maga verdadero Cristiano. (Le con el Maga Hebreo 10:24, 25.) Bien importante parte del verdadero adoranza el maga miting. (Salmo 22:22; 122:1) Puede kita anima con uno y otro si tan junto-junto kita na miting.​—Roma 1:12.

19. Porque importante que habla con otro acerca na cosa tu ya aprende na Biblia?

¹⁹ Parte tambien del verdadero adoranza que habla tu con otro acerca na cosa tu ya aprende na Biblia. Manada gente tan lingasa por causa na maga mal cosas que ta sucede ahora na entero mundo. (Ezequiel 9:4) Baká tiene tu maga conoce quien ta sinti ansina. Habla kanila acerca el de tuyu bonito esperanza para na futuro. Mientras ta atende tu maga miting y ta habla con otro acerca el verdad na Biblia, gendeh mas tu sinti que quierre pa tu queda parte del falso religion y na maga tradicion de este. Puede tu asigura que hay queda tu alegre y hay bendici gayot si Jehova con el de tuyu esfuerzo mientras ta iscuji tu que adora con ele na justo manera.​—Malaquias 3:10.