1. Porque kita necesita aprende acerca na maga angel?

QUIERRE si Jehova que conocé kita con el de suyu familia. Parte del familia del Dios el maga angel. Ta llama kanila na Biblia “maga anak del Dios.” (Job 38:7) Cosa ta hace el maga angel? Paquemodo sila ya ayudá con el maga gente de antes? Y paquemodo sila puede ayudá kanaton ahora?—Mira con el Endnote 8.

2. Onde estaba el maga angel? Paquemodo sila de manada?

² Necesita kita sabé si onde estaba el maga angel. El Colosa 1:16 ta habla kanaton que despues crea con Jesus, si Jehova “ya hace todo el maga cosa-cosa na cielo y na mundo.” Incluido alli el maga angel. Paquemodo sila de manada? Asegun na Biblia, tiene millones de angel.​—Salmo 103:20; Revelacion 5:11.

3. Cosa ta habla kanaton el Job 38:4-7 acerca na maga angel?

³ Ta enseña tambien kanaton el Biblia que ya crea si Jehova con el maga angel antes con el tierra. Cosa sila ya sinti cuando ya mira con el tierra? El libro de Job ta habla kanaton que alegre sila. Un familia sila que ta sirvi con Jehova.​—Job 38:4-7.

4. Porque kita puede habla que interesao el maga angel con el maga gente?

⁴ Interesao gayot el maga angel con el maga gente y con el proposito de Jehova para con el tierra y na maga gente. (Proverbio 8:30, 31; 1 Pedro 1:11, 12) Ya  queda sila triste cuando yan rebelde kanda Adan y Eva. Asigurao que mas triste sila ahora cay mayoria del maga gente ta desobedece con Dios. Pero, alegre sila si tiene quien ta arripinti y ta bira con Dios. (Lucas 15:10) Bien interesao el maga angel con aquellos quien ta sirvi con Dios. Ta usa kanila si Jehova para ayudá y protege con el de suyu maga siervo aqui na tierra. (Maga Hebreo 1:14) Discuti kita cuanto maga ejemplo.

5. Paquemodo ya ayudá el maga angel con el maga siervo del Dios del antes?

 ⁵ Ya imbia si Jehova dos angel para ayudá con Lot y con el de suyu familia para escapa na destrozo del ciudad de Sodoma y Gomorra. (Genesis 19:15, 16) Cuanto siglo despues, ya buta con profeta Daniel na cueva del maga leon pero nuay con ele cosa malo ya pasa cay el “Dios ya imbia con el de suyu angel y ya cerra con el boca del maga leon.” (Daniel 6:22) Ya imbia tambien angel si Jehova para libra con apostol Pedro na preso. (Maga Actividad 12:6-11) Ya ayudá tambien el maga angel con Jesus cuando taqui le na tierra. Por ejemplo, despues con ele bautiza, “el maga angel ta sirvi con Ele.” (Marcos 1:13) Y antes de mata con Jesus, un angel el “ya dale con Ele fuerza.”​—Lucas 22:43.

6. (a) Porque kita puede habla que ta ayudá el maga angel con el maga siervo del Dios ahora? (b) Cosa maga pregunta kita hay contesta?

⁶ Gendeh mas ta aparece el maga angel na maga gente ahora. Pero ta usa siempre kanila el Dios para ayudá con el de suyu maga siervo. El Biblia ta habla: “El angel de Jehova ta vicia con todo quien ta tiene miedo con Ele, y ta salva le kanila.” (Salmo 34:7) Porque kita necesita proteccion? Cay tiene kita maga poderoso enemigo quien quierre hace malo kanaton. Quien se sila? Onde sila estaba? Paquemodo sila ta pricura hace malo kanaton? Para sabé el contestacion, mira kita si cosa ya sucede despues crea con Adan y Eva.

7. Cosa ya hace el maga gente cay ya engaña kanila si Satanas?

⁷ Ya aprende kita na Capitulo 3 que yan rebelde con Dios el un angel y quierre le rula con otro. El Biblia ta llama con ele Satanas Diablo. (Revelacion 12:9) Quierre  tambien le que man rebelde el otro con Dios. Ya puede le engaña con Eva y desde aquel tiempo, ya puede le engaña con el mayoria del maga gente. Pero tiene siempre cuanto quien ya esta fiel con Jehova, igual con Abel, Noe y Abraham.​—Maga Hebreo 11:4, 7, 8.

8. (a) Paquemodo ya queda demonio el cuanto maga angel? (b) Cosa ya hace el maga demonio para gendeh muri na Avenida?

⁸ Na tiempo de Noe, yan rebelde el cuanto del maga angel y ya deja con el cielo para vivi como gente aqui na tierra. Porque? Asegun na Biblia, quierre sila tiene mujer. (Le con el Genesis 6:2.) Pero gendeh justo el cosa sila ya hace. (San Judas 6) Ya queda tambien malo y violente el mayoria del maga gente igual con aquel maga mal angel. Poreso, ya decidi si Jehova que destroza kanila por medio de un grande avenida. Pero ya salva le con el de suyu maga fiel siervo. (2 Pedro 2:5) Para gendeh muri, ya bira na cielo el maga mal angel. Ta llama kanila el Biblia maga demonio. Yan rebelde sila igual con Satanas y el Diablo el quien ta rula kanila.​—Mateo 9:34.

9. (a) Cosa ya pasa con el maga demonio cuando ya bira sila na cielo? (b) Cosa kita hay discuti?

⁹ Cay maga rebelde sila, nuay mas acepta si Jehova con el maga demonio para queda parte del de suyu familia. (2 Pedro 2:4, NW) Gendeh mas puede queda gente otravez el maga demonio pero ta puede siempre sila “engaña con el entero mundo.” (Revelacion 12:9; 1 San Juan 5:19) Discuti kita si paquemodo sila ta engaña con el maga gente.​—Le con el 2 Corinto 2:11.

10. Paquemodo ta engaña el maga demonio con el maga gente?

¹⁰ Ta engaña el maga demonio con el maga gente na manada manera. Si ta comunica el maga gente na maga  demonio, ta hace sila este directamente o por medio na otro gente, igual na surujano o espiritista. Ta llama con este demonismo o espiritismo. Pero el Biblia ta manda kanaton evita na maskin cosa que tiene que hace na maga demonio. (Galacia 5:19-21) Porque? Igual con el un pajareador que ta usa trampa para cuji maga animal, el maga demonio ta usa tambien trampa para engaña y controla con el maga gente.​—Mira con el Endnote 26.

11. Cosa el adivinacion y porque kita debe desaleja con este?

¹¹ Uno del maga trampa que ta usa sila amo el adivinacion. Ese el usada del poder de maga demonio para sabé acerca na futuro o acerca na un cosa. Tiene ta hace con este por medio na mirada na maga estrellas, buscada de maga señalles, lehida de maga tarot card y palma del un persona o usada del bola de cristal. Manada gente ta pensa que nuay cosa malo na ese maga cosas. Pero el deverasan, bien peligroso se. Por ejemplo, el Biblia ta dale mira que tan ayudahan el maga demonio y aquellos quien ta practica adivinacion. Na Maga Actividad 16:16-18 puede kita le acerca con el un bata mujer que “controlao de un demonio quien ta puede adivina si cosa ay sucede.” Despues manda sale si apostol Pablo con el demonio, nuay mas puede adivina el bata.

12. (a) Porque peligroso que comunica con el maga muerto? (b) Porque gendeh ta participa el maga siervo del Dios na maga cosas que tiene que hace con el maga demonio?

¹² Ta usa tambien otro trampa el maga demonio para engaña con el maga gente. Quierre sila manda creé kanaton que puede kita man cuento con el maga muerto y vivo siempre na otro lugar el maga ya muri y puede sila comunica o hace cosas malo kanaton. Por ejemplo, si ya muri el amigo o pariente del un persona, ta anda le con el un espiritista quien ta habla que ta puede le man cuento con el  maga muerto. Posible el espiritista hay habla maga cosas acerca con el ya muri y copiá pa gane el voz. (1 Samuel 28:3-19) El manada maga ritual que ta hace si tiene quien ya muri yan base tambien na idea que el maga muerto vivo pa na otro lugar. Incluido alli el celebracion que ta hace despues del inchero, aniversario del muerte, ofrecimiento y velacion na muerto. Si gendeh participa el maga Cristiano con ese maga ritual, el diila familia o el otro maga gente posible hay gangguia, insulta o desaleja kanila. Pero sabe el maga Cristiano que el maga muerto gendeh mas ta vivi na maskin onde lugar. Gendeh kita puede man cuento kanila y gendeh sila puede hace cosa malo kanaton. (Salmo 115:17) Tiene gayot cuidao. No pruba comunica con el maga muerto o con el maga demonio y no participa na maga cosas que tiene que hace kanila.​—Le con el Deuteronomio 18:10, 11; Isaias 8:19.

13. Cosa ya puede hace el manada gente quien ta tiene miedo na maga demonio de antes?

¹³ Puera que ta engaña el maga demonio con el maga gente, ta hace tambien sila miedo kanila. Sabe si Satanas y el de suyu maga demonio que ‘contao lang el diila maga dia’ antes de quita kanila el Dios na tierra. Poreso, mas violente y agresivo ya sila ahora. (Revelacion 12:12, 17) Pero miles de gente quien ta tiene miedo na maga demonio de antes el gendeh mas ta tiene miedo ahora. Cosa ya ayudá kanila para gendeh mas tiene miedo na maga demonio?

14. Igual con el maga Cristiano del primer siglo, cosa kita debe hace para gendeh kita queda envuelto na maga demonio?

¹⁴ El Biblia ta habla kanaton si paquemodo resisti y gendeh queda envuelto na maga demonio. Por ejemplo, el  cuanto maga gente na ciudad de Efeso ta comunica con el maga demonio antes sila ya aprende el verdad. Paquemodo sila ya deja con ese clase de trabajo? El Biblia ta habla: “Mucho de aquellos quien estaba ta practica magic ya saca el diila maga libro y ya quema todo esos na publico.” (Maga Actividad 19:19) Cay quierre sila queda Cristiano, ya destroza sila el todo diila libro acerca na magica. Ansina tambien el cosa debe hace ahora. Todo quien quierre sirvi con Jehova necesita destroza con el maga cosas que tiene que hace na maga demonio. Incluido alli el maga libro, magasin, horoscope, salida, musica, juego y maskin maga poster que ta hace sale que bonito y gendeh peligroso el magica y maga demonio. Ta inclui tambien alli el maga cosa que ta usa el maga gente para protege el diila cuerpo desde na maldad.​—1 Corinto 10:21.

15. Cosa pa kita necesita hace para puede resisti con Satanas y con el de suyu maga demonio?

¹⁵ Cuanto año despues de destroza el maga gente de Efeso con el diila maga libro de magica, si apostol Pablo ya escribi que necesita siempre sila resisti con el “maga espiritu malo.” (Efeso 6:12) Si, maskin ya quema ya sila con el diila maga libro, ta pricura siempre el maga demonio hace malo kanila. Poreso, cosa pa sila necesita hace? Si apostol Pablo ya habla kanila que necesita sila “el Fe como un defensa para hace apaga con el maga pana de fuego del Demonio.” (Efeso 6:16) Igual con el un soldao que protegido na guerra cay tiene le defensa, queda tambien kita protegido si tiene kita fe. Si ta confia gayot kita que protege kanaton si Jehova, puede kita resisti con Satanas y con el de suyu maga demonio.​—Mateo 17:20.

16. Paquemodo kita hace fuerte el diaton fe con Jehova?

¹⁶ Paquemodo kita hace fuerte el diaton fe con Jehova?  Necesita kita le con el Biblia cada dia y confia que protege le kanaton. Si fuerte el diaton confianza con Jehova, gendeh kanaton puede hace malo si Satanas y el de suyu maga demonio.​—1 San Juan 5:5.

17. Cosa pa puede protege kanaton na maga demonio?

¹⁷ Cosa pa necesita hace el maga Cristiano na Efeso? Ta queda sila na un ciudad que lleno de demonismo. Poreso, si apostol Pablo ya habla kanila: “Reza firmi.” (Efeso 6:18) Necesita sila pirmi pidi con Jehova el de suyu proteccion. Necesita ba tambien kita se hace? Si, cay ta vivi kita na un mundo que lleno de demonismo. Poreso, necesita kita pidi con Jehova el de suyu proteccion y debe kita usa el de suyu nombre si ta reza kita. (Le con el Proverbio 18:10.) Si continua kita pidi con Jehova que libra kanaton desde con Satanas, si Jehova hay contesta con el diaton rezo.​—Mateo 6:13; 1 San Juan 5:14.

18, 19. (a) Paquemodo kita ganá contra con Satanas y con el maga demonio? (b) Cosa pregunta hay contesta na siguiente capitulo?

¹⁸ Si desaleja kita con el todo cosa que tiene que hace na demonismo y confia que protege kanaton si Jehova, puede kita resisti con Satanas y con el maga demonio. Gendeh kita debe tiene miedo kanila. (Le con el Santiago 4:7, 8.) Mas poderoso si Jehova contra con el maga demonio. Ya castiga le kanila na tiempo de Noe y hay destroza le kanila na futuro. (San Judas 6) Acorda que si Jehova ta usa con el de suyu maga angel para protege kanaton. (2 Rey 6:15-17) Puede kita tiene confianza que na ayuda de Jehova, puede kita ganá contra con Satanas y con el maga demonio.​—1 Pedro 5:6, 7; 2 Pedro 2:9.

¹⁹ Pero si ta causá grabe sufrimiento si Satanas y el maga demonio, porque nuay pa kanila destroza si Jehova? El siguiente capitulo hay contesta con ese.