1, 2. Onde kita puede incuntra proteccion ahora?

IMAGINA que malo el tiempo cuando ta camina tu apuera. Ya queda grueso el iscurana, ya principia man kirlat y despues yan trueno. Nuay tarda, ya cae ulan. Ya busca tu onde puede man hulau. Bien aliviao gayot tu cuando ya incuntra tu un lugar donde protegido y gendeh tu muha!

² Ansina tambien el diaton situacion ahora. Mas ta agraba el condicion del mundo. Baka ta pensa tu, ‘Onde yo puede incuntra proteccion?’ Ya escribi el un salmista: “Hay habla yo con Jehova: ‘Etu el de mio refugio y el de mio fortaleza, el Dios con quien yo ta confia.’” (Salmo 91:2) Si, puede kanaton dale alivio si Jehova na diaton maga problema y ta dale le kanaton un bonito esperanza para na futuro.

3. Paquemodo kita hace con Jehova el diaton refugio?

³ Paquemodo kanaton protege si Jehova? Ayudá le kanaton para puede kita enfrenta con el diaton maga problema y mas poderoso le que con aquellos quien quierre hace malo kanaton. Si tiene cosa malo hay sucede kanaton ahora, puede kita asigura que hay quita le con el mal efecto de este na futuro. El Biblia ta anima kanaton: “Esta ustedes na amor de Dios.” (San Judas 21) Necesita kita esta cerca con Jehova para ricibi el de suyu ayuda na tiempo de dificultad. Pero paquemodo se kita hace?

4, 5. Paquemodo ya dale mira si Jehova que ta ama le kanaton?

⁴ Para esta cerca con Jehova, necesita kita pensa  enbuenamente si paquemodo de grande el de suyu amor para kanaton. Pensa si cosa ya hace si Jehova para kanaton. Ya dale le kanaton un bonito mundo que lleno de siembra y animal. Ya dale tambien le kanaton sabroso comida y limpio agua. Por medio na Biblia, ya habla si Jehova si cosa el de suyu nombre y el de suyu maga buen calidad. Y mas pa na todo, ya demonstra le de suyu amor kanaton cuando ya imbia le con el de suyu Anak, si Jesus, para aqui na tierra y dale el de suyu vida para kanaton. (Juan 3:16) Y por causa con aquel sacrificio, tiene kita bonito esperanza na futuro.

⁵ Ya dale si Jehova el Mesianico Reino, un gobierno na cielo que bien cerca ya termina con el todo sufrimiento. Este Reino hay hace paraiso con el tierra donde todo hay vivi con paz y alegria hasta para cuando. (Salmo 37:29) El otro manera que ya dale mira si Jehova el de suyu amor amo que ta enseña le kanaton si paquemodo kita tiene un alegre vida ahora. Quierre tambien le que reza kita con ele y pirmi le ta oi con el diaton maga rezo. Ya dale mira si Jehova que ta ama gayot le con el cada uno kanaton.

6. Cosa tu hace en cambio na amor que ya dale mira si Jehova?

⁶ Cosa tu hace en cambio na amor que ya dale mira si Jehova? Rindi gracias na todo cosa que ya hace le para contigo. Pero makatriste cay gendeh se ta hace el manada gente. Ya sucede tambien se cuando taqui si Jesus na tierra. Ya curá le con el diez leproso pero uno lang el ya rindi gracias con ele. (Lucas 17:12-17) Quierre kita imita con el cosa ya hace aquel gente. Quierre kita rindi gracias pirmi con Jehova.

7. Paquemodo kita debe ama con Jehova?

⁷ Necesita tambien kita dale mira el diaton amor con  Jehova. Ya habla si Jesus con el de suyu maga dicipulo que debe sila ama con Jehova con todo corazon, alma y pensamiento. (Le con el Mateo 22:37.) Cosa se quierre decir?

8, 9. Paquemodo kita dale mira con Jehova que ta ama kita con ele?

⁸ Bastante ya ba que habla kita que ta ama kita con Jehova? Gendeh. Si ta ama kita con Jehova con todo corazon, alma y pensamiento, hay dale kita se mira por medio na diaton accion. (Mateo 7:16-20) Claro ta enseña el Biblia que si ta ama kita con Dios, hay obedece kita con el de suyu maga mandamiento. Dificil ba se hace? Gendeh, cay “el disuyo maga mandamiento gendeh pesao.”​—Le con el 1 San Juan 5:3.

⁹ Si obedece kita con Jehova, hay tiene kita alegre vida. (Isaias 48:17, 18) Pero cosa kanaton puede ayudá para esta cerca con Jehova? Mira kita.

10. Porque tu debe continua aprende acerca con Jehova?

¹⁰ Paquemodo tu ya queda amigo de Jehova? Por medio na de tuyu estudiada del Biblia, mas ya conocé tu con Jehova y ya tiene tu buen amistad con ele. Este amistad igual na un fuego que quierre tu pirmi arde. Igual na fuego que necesita leña para ardé, necesita tambien tu continua aprende acerca con Jehova para esta fuerte el de ustedes amistad.​—Proverbio 2:1-5.

11. Cosa el efecto del maga enseñanza del Biblia contigo?

¹¹ Mientras ta continua tu estudia con el Biblia, hay aprende tu maga cosas que hay penetra gayot na de tuyu corazon. Notá si cosa ya sinti el dos dicipulo de Jesus cuando ya explica le kanila el cuanto maga profecia na Biblia. Ya habla sila: “Gendeh ba el diaton maga corazon ta arde gayot adentro canaton cuando ya comversa  Le canaton na camino y ya explica el maga Escritura canaton?”​—Lucas 24:32.

12, 13. (a) Cosa posible sucede na diaton amor con Dios? (b) Paquemodo esta fuerte el diaton amor para con Jehova?

¹² Posible cuando ya entende tu con el Biblia, ya sinti tambien tu igual el cosa ya sinti el maga dicipulo cuando ya entende sila con el Escritura. Ya ayudá se contigo para conocé con Jehova y ama con ele. No quierre tu queda frio el de tuyu amor.​—Mateo 24:12.

¹³ Una vez ya queda tu amigo del Dios, necesita tu hace esfuerzo para esta fuerte el de ustedes amistad. Debe tu continua aprende acerca con ele y con Jesus. Medita si cosa tu ta aprende y si paquemodo con este aplica na de tuyu vida. (Juan 17:3) Si ta le tu o ta estudia con el Biblia, preguntá tu na de tuyu mismo cuerpo: ‘Cosa este ta enseña conmigo acerca con Dios Jehova? Porque yo debe ama con ele con todo mi corazon y alma?’—1 Timoteo 4:15.

14. Paquemodo el rezo puede ayudá para esta fuerte el diaton amor con Jehova?

 ¹⁴ Si tiene tu amigo, pirmi tu con ele tan cuento y ta ayudá se para esta fuerte el de ustedes amistad. Na igual manera, si pirmi kita tan cuento con Jehova na rezo hay esta fuerte el diaton amor para con ele. (Le con el 1 Tesalonica 5:17.) Un bonito regalo estaba con el diaton Tata na cielo el rezo. Debe kita man cuento con ele con todo corazon. (Salmo 62:8) Gendeh kita debe repiti maga encabezao rezo sino debe sincero kita na cosa kita ta habla. Si continua kita estudia con el Biblia y reza con todo corazon, hay esta fuerte el diaton amor para con Jehova.

15, 16. Cosa el trabajo predicacion para contigo?

¹⁵ Si quierre kita esta cerca con Jehova, necesita tambien kita man cuento con otro acerca na cosa kita ta creé. Un bonito privilegio se. (Lucas 1:74) Y un responsibilidad se que ya dale si Jesus con todo maga verdadero Cristiano. Cada uno kanaton debe predica con el buen noticia acerca na Reino del Dios. Ya hace ya ba tu este?—Mateo 24:14; 28:19, 20.

¹⁶ Bien precioso para con apostol Pablo el trabajo predicacion. Ya llama le con este un “riqueza.” (2 Corinto 4:7) El de con todo importante trabajo que puede tu hace amo que habla con otro acerca con Jehova y el de suyu proposito. Un manera se para sirvi con Jehova y valoroso con ele el de tuyu servicio. (Maga Hebreo 6:10) Si ta predica tu, tiene tu beneficio y aquellos quien ta oi contigo. Hay ayudá tu con otro y contigo mismo para queda cerca con Dios y tiene vida hasta para cuando. (Le con el 1 Corinto 15:58.) Tiene pa ba otro trabajo que puede contigo dale deverasan alegria?

17. Porque bien importante ahora el trabajo predicacion?

 ¹⁷ Bien importante el trabajo predicacion. Debe kita ‘proclama el palabra’ y hace se “na todo ocassion.” (2 Timoteo 4:2) Necesita oi el maga gente acerca na Reino del Dios. El Biblia ta habla: “Cerca ya el grande dia de Jehova! Cerca ya este y bien pronto este ta llega!” El fin ‘gendeh atrasa!’ (Sofonias 1:14; Habacuc 2:3) Gendeh mas tarda, hay destroza si Jehova con el mal mundo de Satanas. Pero antes se sucede, necesita dale aviso con el maga gente para puede sila decidi sirvi con Jehova.

18. Porque kita debe adora con Jehova junto na otro maga verdadero Cristiano?

¹⁸ Quierre si Jehova que adora kita con ele junto con el otro maga verdadero Cristiano. Ta habla el Biblia: “Pensa kita si paquemodo puede kita dale animo con uno y otro para ama y hace maga trabajo bueno. No ustedes falta na maga reunion del comunidad, como tiene de ustedes ta hace. Emvez, dale animo con uno y otro, especialmente ahora cay ta mira ustedes que cerca ya el Dia.” (Maga Hebreo 10:24, 25) Debe kita hace esfuerzo para queda presente na todo maga miting. Puede kita anima y hace fuerte con uno’y otro na diaton maga miting.

19. Cosa kanaton ayudá para ama con el diaton maga hermano y hermana na fe?

¹⁹ Si atende tu na miting, hay incuntra tu maga buen amigo quien ayudá contigo para adora con Jehova. Hay conocé tu maga hermano y hermana quien ta hace esfuerzo para adora con Jehova igual contigo. Maga imperfecto tambien sila y tan kamali. Si ya falta sila contigo, perdona kanila. (Le con el Colosa 3:13.) Mira pirmi si cosa el maga buen calidad del de tuyu maga hermano y hermana na fe. Ese hay ayudá contigo para ama kanila y queda mas cerca con Jehova.

20, 21. Cosa “el deverasan Vida”?

²⁰ Quierre si Jehova que el de suyu maga amigo hay tiene el de con todo bonito vida que posible. Ta enseña el Biblia que el diaton vida na futuro bien diferente na cosa kita ta experienciá ahora.

²¹ Na futuro, hay vivi kita gendeh lang por 70 o 80 año sino hasta para cuando. Hay tiene kita “Vida Eterno” con perfecto salud, paz y alegria na un bonito paraiso. Ese el cosa ta llama el Biblia “el deverasan Vida.” Ya promete si Jehova que dale le kanaton este deverasan vida pero necesita kita hace el todo para “asigura” con este.​—1 Timoteo 6:12, 19.

22. (a) Paquemodo kita puede “asigura el deverasan Vida”? (b) Porque gendeh kita puede obtene con el vida eterna na diaton lang esfuerzo?

²² Paquemodo kita puede “asigura el deverasan Vida”? Debe kita “hace el bueno” y “queda rico na maga buen trabajo.” (1 Timoteo 6:18) Este quierre decir que debe kita aplica el cosa kita ta aprende na Biblia. Pero gendeh gayot kita puede obtene con el deverasan vida na diaton lang mismo esfuerzo. Un libre regalo este de Jehova para na de suyu maga fiel siervo, un ejemplo del de suyu “abundancia del gracia.” (Roma 5:15) El diaton Tata na cielo quierre gayot dale este regalo con el de suyu maga fiel siervo.

23. Porque tu necesita hace maga justo decicion ahora?

²³ Preguntá tu na de tuyu mismo cuerpo, ‘Ta adora ba yo con Dios na manera que aceptable con ele?’ Si ta sinti tu que necesita tu hace maga cambio, debe tu se hace dayun. Si confia kita con Jehova y hace el todo para obedece con ele, hay queda si Jehova el diaton refugio. Hay protege le con el de suyu maga fiel siervo na mal mundo  de Satanas durante este ultimo maga dia. Y despues, hay asigura si Jehova que vivi kita na Paraiso hasta para cuando como cosa le ya promete. Si, hay tiene tu el deverasan vida si hace tu maga justo decicion ahora!