1, 2. Cosa el pregunta del manada gente?

DESTROZAO el un barrio por causa na tsunami. Un gente el ya supla de tiro na iglesia poreso manada el ya iri y ya muri. Un nana que tiene cinco anak el ya muri por causa na cancer.

² Si ta sucede el maga calamidad o tragedia igual ansina, manada gente ta preguntá, “Porque?” Manada ta preguntá si porque bien lleno de agrabio y sufrimiento el mundo. Tu ba tambien?

3, 4. (a) Cosa el maga pregunta de Habacuc? (b) Paquemodo con ele ya contesta si Jehova?

³ Na Biblia, puede kita aprende que el maga gente quien tiene fuerte fe con Dios ya preguntá tambien ansina maga pregunta. Por ejemplo, si profeta Habacuc ya preguntá con Jehova: “Porque uste ta manda mira conmigo el maldad? Y porque uste ta permiti con el maltratamiento? Porque ta mira yo destrozo y violencia? Y porque manada pelea y conflicto?”​—Habacuc 1:3.

⁴ Puede kita le na Habacuc 2:2, 3 el contestacion del Dios na maga pregunta de Habacuc y el de suyu promesa que tiene le cosa hace acerca na situacion. Ta ama gayot si Jehova con el maga gente. El Biblia ta habla: “Ele ta cuida con ustedes.” (1 Pedro 5:7) Gane, mas no quierre mira sufrimiento si Jehova que kanaton. (Isaias 55:8, 9) Si ansina, porque bien manada sufrimiento na mundo? Hay discuti kita con este pregunta.

5. Cosa ta habla el maga lider de religion acerca na sufrimiento? Cosa ta enseña el Biblia?

⁵ Ta habla el maga pastor, padre y otro maga lider de religion que querrer del Dios que sufri el maga gente. El cuanto ta habla que todo cosa que ta sucede na un persona, incluido ya el maga tragedia, ya plaña ya daan el Dios y gendeh kita puede entende si porque. Mientras el otro ta habla que ta muri el maga gente, incluido el maga bata, para puede sila man junto con Dios na cielo. Pero gendeh se deverasan. Si Jehova gendeh gayot el causa del todo mal cosas que ta sucede. Ta habla el Biblia: “Imposible que el verdadero Dios hay hace cosa malo, ni el Todopoderoso hay hace cosa gendeh justo!”​—Job 34:10.

6. Porque manada ta disculpa con Dios por el todo sufrimiento na mundo?

⁶ Manada gente el ta disculpa con Dios por el todo sufrimiento cay pensaba sila ele el quien ta rula con el mundo. Pero como cosa kita ya aprende na Capitulo 3, si Satanas Diablo el deverasan ta rula con el mundo.

7, 8. Porque bien manada sufrimiento na mundo?

⁷ El Biblia ta habla kanaton que “el entero mundo talli na poder del demonio.” (1 San Juan 5:19) Violente y nuay lastima el quien ta rula con este mundo, si Satanas. Ele “ta engaña con el entero mundo.” (Revelacion 12:9) Manada gente ta copiá con ele. Y un razon se si porque el mundo ahora bien lleno de imbusterias, odio y violencia.

⁸ Tiene pa otro razon si porque bien manada sufrimiento na mundo. Despues man rebelde kanda Adan y Eva, ya hace sila pasa pecado na diila maga anak. Y por causa na pecado, el maga gente ta causá sufrimiento na otro. Quierre sila queda mas importante que con otro.  Ta pelea sila, tan guerra y ta maltrata con otro. (Eclesiastes 4:1; 8:9) Tiene vez, ta sufri el maga gente por causa na “tiempo y maga suceso que gendeh ta expecta.” (Eclesiastes 9:11) Si talli sila na gendeh justo lugar y na gendeh justo tiempo, posible kanila sucede el accidente y maga mal cosas.

9. Porque kita puede asigura que tiene buen razon si Jehova si porque le ta permiti continua el sufrimiento?

⁹ Gendeh gayot si Jehova el causa del sufrimiento. Gendeh con ele debe disculpa por el guerra, crimen y maltratamiento que ta sucede ahora. Gendeh ele el causa del maga calamidad igual na temblor, tifun y avenida. Pero baká ta pensa tu, ‘Si el todopoderoso persona na universo amo si Jehova, porque nuay le cosa ta hace para gendeh mas continua sucede este maga tragedia?’ Sabe kita que ta ama gayot kanaton el Dios poreso puede kita asigura que tiene le buen razon si porque le ta permiti continua el sufrimiento.​—1 San Juan 4:8.

10. Cosa ya acusa si Satanas con Jehova?

¹⁰ Na jardin de Eden, ya engaña el Diablo con Adan y Eva. Ya acusa le que gendeh justo el rulanza del Dios. Ya clama le que tiene cosa bueno que el Dios gendeh ta dale con Adan y Eva. Quierre si Satanas que pensa sila que hay queda mas bueno el de suyu rulanza contra con Jehova y gendeh sila necesita con Dios.​—Genesis 3:2-5; mira con el Endnote 27.

11. Cosa pregunta kita necesita contesta?

¹¹ Si Adan y Eva ya desobedece con Jehova y yan rebelde con ele. Ya pensa sila que tiene sila derecho para decidi si cosa el justo para kanila y si cosa el gendeh. Cosa  hace si Jehova para dale prueba que gendeh justo el maga rebelde y ele el sabe si cosa el bueno para kanaton?

12, 13. (a) Porque nuay dayun destroza si Jehova con el maga rebelde? (b) Porque ya permiti si Jehova que rula si Satanas na mundo y formá maga gobierno el maga gente?

¹² Nuay dayun destroza si Jehova con Adan y Eva. Sino, ya permiti le que tiene sila maga anak. Despues, ya deja si Jehova que iscuji el maga anak de Adan y Eva si de quien rulanza sila quierre. Proposito de Jehova que llena de maga perfecto gente el tierra y sucede gayot se maskin cosa pa hace el Diablo.​—Genesis 1:28; Isaias 55:10, 11.

¹³ Ya acusa si Satanas con Jehova enfrente del millones de angel. (Job 38:7; Daniel 7:10) Poreso, ya dale tiempo si Jehova con Satanas para determina si justo ba el de suyu acusacion. Ya dale tambien tiempo si Jehova con el maga gente para formá diila gobierno bajo na guia de Satanas para mira si puede ba sila rula enbuenamente sin ayuda del Dios.

14. Cosa el resulta despues el largo tiempo?

¹⁴ Por miles de año, ya rula el maga gente kanila mismo pero nuay sila tiene buen exito. Claro que imbustero si Satanas. Necesita el maga gente con el ayuda del Dios. Justo si profeta Jeremias cuando ya habla le: “Sabe gayot yo, O Jehova, que gendeh para na gente que guiá su mismo camino. Gendeh para na gente que guiá maskin el de suyu paso.”​—Jeremias 10:23.

15, 16. (a) Porque ya permiti si Jehova que continua el sufrimiento por largo tiempo? (b) Porque nuay arregla si Jehova con el maga problema que ya causá si Satanas?

¹⁵ Porque ya permiti si Jehova que continua el sufrimiento por largo tiempo? Porque ya permiti le sucede el maga mal cosas? Ya necesitá tiempo para dale mira que  el rulanza de Satanas ya falla. El maga gente ya pruba diferente clase de gobierno pero todo nuay buen resulta. Maskin pa manada cosa ya puede hace el ciencia y tecnologia, mas ta queda siempre grabe el injusticia, pobreza, crimen y guerra. Gendeh kita puede rula kanaton mismo y tiene buen resulta sin ayuda del Dios.

¹⁶ Pero nuay arregla si Jehova con el maga problema que ya causá si Satanas. Si hace le se, dol ta suportá le con el rulanza de Satanas. Nunca se ele hace. Hay pensa tambien el maga gente que puede sila rula kanila mismo con buen resulta. Pero ese un imbusterias y gendeh gayot suporta si Jehova con ese. Nunca le habla imbusterias.​—Maga Hebreo 6:18.

17, 18. Cosa hace si Jehova con el todo mal cosas que ya causá si Satanas?

¹⁷ Puede ba compone si Jehova con el maga mal cosas que ya resulta por causa na rebelion de Satanas y del maga gente? Si. Todo cosas posible con Dios. Sabe si Jehova si cuando hay contesta completamente con el acusacion de Satanas. Despues, hay hace le paraiso con el tierra como cosa gayot el de suyu proposito. Todo aquellos “na diila maga sepultura” hay resucita. (Juan 5:28, 29) Gendeh mas enferma o muri el maga gente. Quita si Jesus el todo mal cosas que ya causá si Satanas. Hay usa si Jehova con Jesus “para destroza el maga trabajo del demonio.” (1 San Juan 3:8) Rindi gayot kita gracias cay por causa na paciencia de Jehova puede kita conocé con ele y iscuji el de suyu rulanza. (Le con el 2 Pedro 3:9, 10.) Maskin ta sufri kita, ta ayudá le kanaton para puede kita aguanta.​—Juan 4:23; le con el 1 Corinto 10:13.

¹⁸ Gendeh kanaton ta forza si Jehova que iscuji el de suyu rulanza. Ya dale le con el maga gente un precioso  regalo—el libertad para hace decicion. Sabé kita si cosa este quierre decir para kanaton.

19. Cosa regalo ya dale kanaton si Jehova? Porque kita debe rindi gracias por causa con este?

¹⁹ El regalo que ya dale kanaton si Jehova amo el libertad para hace decicion. Por causa con este, diferente ta na maga animal. Ta actua lang sila asegun na diila instinct pero kita puede iscuji si cosa manera de vida kita quierre vivi y decidi si quierre ba kita hace alegre con Jehova. (Proverbio 30:24) Gendeh tambien kita igual na maquina que ta hace lang asegun na cosa kanila ya diseña para hace. Tiene kita el libertad para iscuji si cosa kita quierre queda, quien el queda diaton maga amigo y si cosa kita hace na diaton vida. Quierre si Jehova que vivi kita con alegria.

20, 21. Cosa el de con todo buen decicion que puede tu hace ahora?

²⁰ Quierre si Jehova que ama kita con ele. (Mateo 22:37, 38) Igual ele con el un tata que alegre oi con el de suyu anak ta habla “Ta ama yo contigo,” si ya habla le se con todo corazon y gendeh cay forzao lang. Ya dale kanaton libertad si Jehova para iscuji si sirvi ba kita con ele o gendeh. Ya iscuji kanda Satanas, Adan y Eva que desobedece con Jehova. Paquemodo tu usa el de tuyu libertad?

²¹ Usa el de tuyu libertad para decidi sirvi con Jehova. Tiene ya millones de gente quien ya iscuji que hace alegre con Dios y gendeh con Satanas. (Proverbio 27:11) Cosa tu puede hace ahora para puede tu vivi na nuevo mundo del Dios donde nuay mas sufrimiento? El siguiente capitulo hay contesta con ese pregunta.