1. Cosa el proposito del Dios para na maga gente?

TIENE bonito proposito el Dios para na maga gente. Ya crea le con el primer hombre y mujer, si Adan y Eva, para queda na un bonito jardin. Proposito de suyu que tiene sila maga anak, hace paraiso con el tierra y cuida con el maga animal.​—Genesis 1:28; 2:8, 9, 15; mira con el Endnote 6.

2. (a) Porque kita puede habla que hay cumpli el Dios con el de suyu proposito? (b) Cosa clase de gente el quierre el Dios que queda na tierra y hasta cuando?

² Para contigo, hay queda ba gayot kita na paraiso? Si Jehova ta habla kanaton: “Este el de mio proposito, y hay hace yo con este.” (Isaias 46:9-11; 55:11) Si, hay cumpli le el de suyu proposito y nuay cosa puede sangga con ele. Si Jehova ya habla que ya crea le con el tierra cay tiene le proposito. Ele “nuay crea con este por nuay nada.” (Isaias 45:18) Quierre le que vivi el maga gente aqui na tierra. Cosa clase de gente el quierre el Dios que queda qui y hasta cuando? El Biblia ta habla: “El maga recto [o obediente] hay hereda con el tierra, y hay esta sila alli hasta para cuando.”​—Salmo 37:29; Revelacion 21:3, 4.

3. Ciendo ta enferma y ta muri el maga gente, cosa tu puede preguntá?

³ Pero el maga gente ahora ta enferma y ta muri. Na manada lugar, el maga gente tan peleahan y tan matahan. Gendeh gayot se el proposito del Dios. Entonces, cosa ya pasa y porque? El Biblia lang puede contesta.

4, 5. (a) Quien el ya converza con Eva por medio de un culebra na jardin de Eden? (b) Paquemodo queda ladron el un honesto persona?

⁴ El Biblia ta habla que el Dios tiene enemigo, “el Demonio [Diablo, NW] o Satanas—como ta llama con ele.” Si Satanas ya usa un culebra para converza con Eva na jardin de Eden. (Revelacion 12:9; Genesis 3:1) Ya hace le sale que dol el culebra el ta converza.​—Mira con el Endnote 7.

⁵ El Dios ba el ya crea con Satanas Diablo? Gendeh gayot! El un angel que talla na cielo cuando ya prepara el Dios con el tierra para con Adan y Eva ya cambia y ya queda el Diablo. (Job 38:4, 7) Paquemodo se ya sucede? Paquemodo ba cambia y queda ladron el un honesto persona? Nuay le nace ladron. Pero ta desea le o quierre le el un cosa que gendeh de suyu. Pirmi le ta pensa con ese poreso ya queda mas fuerte el de suyu mal deseo. Y cuando ya tiene le oportunidad, ya ruba le con ese. Ele mismo ya hace con ele ladron.​—Le con el Santiago 1:13-15; mira con el Endnote 8.

6. Paquemodo ya queda enemigo del Dios el un angel?

⁶ Ansina el cosa ya sucede con aquel angel. Despues crea si Jehova con Adan y Eva, ya habla le kanila que tiene anak y “llena con el tierra.” (Genesis 1:27, 28) Ya pensa siguro aquel angel, ‘Todo quel maga gente puede adora conmigo en vez con Jehova!’ Mas malo le ya pensa con ese, mas malo le ya desea con el cosa de Jehova. Quierre quel angel que adora con ele el maga gente. Poreso, yan imbusterias le y ya engaña con Eva. (Le con el Genesis 3:1-5.) Na ese manera, ya queda le Satanas Diablo, un enemigo del Dios.

7. (a) Porque ya muri si Adan y Eva? (b) Porque kita ta queda viejo y ta muri?

⁷ Ya desobedece kanda Adan y Eva con Dios y ya come  con el fruta. (Genesis 2:17; 3:6) Ya comete sila pecado con Jehova y ya llega el tiempo, ya muri sila como cosa ya habla si Jehova. (Genesis 3:17-19) El maga anak de Adan y Eva ya comete tambien pecado poreso ya muri sila. (Le con el Roma 5:12.) Para puede kita entende si porque yan umit el maga anak de Adan y Eva, considera kita este ejemplo. Imagina que ta cusi tu pan na un horma que tiene pihing. El pan hay tiene tambien pihing igual del horma. Cuando ya desobedece si Adan con Dios, ya tiene le pecado. Ciendo maga anak kita de Adan, todo kita tiene pecado o “pihing” igual con ele. Y como resulta, ta queda kita viejo y ta muri.​—Roma 3:23; mira con el Endnote 9.

8, 9. (a) Cosa quierre si Satanas que pensa kanda Adan y Eva? (b) Porque nuay dayun mata si Jehova con el maga rebelde?

⁸ Ya principia un rebelion si Satanas contra con Jehova cuando ya influenciá le con Adan y Eva que desobedece con Dios. Quierre le que pensa si Adan y Eva que imbustero si Jehova y gendeh bueno el de suyu rulanza cay no quierre le si cosa el bueno para kanila. Si Satanas ta habla que gendeh necesita el maga gente con Dios para habla kanila si cosa debe hace. Y si Adan y Eva mismo el decidi si cosa el justo para kanila y si cosa el gendeh. Cosa hace si Jehova? Puede le mata con el maga rebelde para termina con el rebelion. Pero, puede ba quel dale prueba que imbustero si Satanas? Gendeh gayot.

⁹ Poreso, nuay dayun mata si Jehova con el maga rebelde. Sino ya permiti le con el maga gente que rula kanila mismo. Hay dale se prueba que imbustero si Satanas y si Jehova el sabe si cosa el bueno para na maga gente. Hay sabé kita mas acerca con ese na Capitulo 11. Pero, cosa tu ta pensa na decicion de Adan y Eva? Justo ba que ya creé sila con Satanas y ya desobedece con Dios? Ya dale si  Jehova el todo cosa que tiene si Adan y Eva. Ya dale le kanila perfecto vida, bonito lugar donde queda y buen trabajo. Pero si Satanas, nuay cosa ya hace bueno para kanila. Si talla tu, cosa gaha tu hace?

10. Cosa importante decicion debe hace el cada uno?

¹⁰ Igual kanila, cada uno kanaton debe decidi si con  quien kita iscuji y el diaton vida ta depende na diaton decicion. Puede kita iscuji el rulanza de Jehova, queda obediente con ele y dale prueba que imbustero si Satanas. O puede kita iscuji el rulanza de Satanas. (Salmo 73:28; Le con el Proverbio 27:11.) Bien poco lang el quien ta obedece con Jehova. Gane, gendeh ele el quien ta rula con el mundo. Si gendeh el Dios, quien man?

11, 12. (a) Cosa kita puede aprende na cosa ya ofrece si Satanas con Jesus? (b) Cosa maga texto el ta dale mira que si Satanas el ta rula con el mundo?

¹¹ Sabe si Jesus si quien el deverasan ta rula con el mundo. Na un ocasion, si Satanas “ya dale con ele mira todo el maga reino na mundo y el diila gloria.” Despues, ya promete si Satanas con Jesus: “Ay dale yo con Uste todo este si ay man culup [o hinca] Uste enfrente dimio y ay adora conmigo.” (Mateo 4:8, 9; Lucas 4:5, 6) Pensa tu este, ‘Si aquel maga reino gendeh de Satanas, puede ba le quel ofrece con Jesus?’ Siempre, gendeh. De Satanas el todo gobierno.

¹² Baká hay preguntá tu: ‘Paquemodo ya queda posible que si Satanas el ta rula con el mundo? Gendeh ba si Jehova, el Dios Todopoderoso, el quien ya crea con el universo?’ (Revelacion 4:11) Si, pero claro ya llama si Jesus con Satanas “el Principe de este mundo.” (Juan 12:31; 14:30; 16:11) Si apostol Pablo ya llama con Satanas Diablo “el dios de este mundo.” (2 Corinto 4:3, 4) Y ya escribi si apostol Juan que “el entero mundo talli na poder del demonio.”​—1 San Juan 5:19.

13. Porque kita necesita un nuevo mundo?

¹³ Este mundo ta queda mas peligroso. Ta mira kita guerra, corapcion, hipocresia y violencia maskin onde. Maskin cosa esfuerzo hace el maga gente, gendeh siempre sila ta puede quita con este maga problema. Pero gendeh dura, el Dios hay destroza con este mundo que lleno de maldad durante na de suyu guerra de Armagedon. Y hay cambia le con este un nuevo mundo.​—Revelacion 16:14-16; mira con el Endnote 10.

14. Con quien ya iscuji el Dios para queda Rey del de suyu Reino? Cosa ya habla el Biblia acerca con Jesus?

¹⁴ Si Jehova ya iscuji con Jesus para queda el Rey del de suyu gobierno o Reino na cielo. Miles de año el ya pasa, el Biblia ya habla que si Jesus hay rula como “Principe de Paz” y nunca tiene fin el de suyu gobierno. (Isaias 9:6, 7) Ya enseña si Jesus con el de suyu maga siguidores reza para con este gobierno cuando ya habla le: “Manda vene el de Uste Reino. Hace el de Uste voluntad aqui na mundo igual como alli na cielo.” (Mateo 6:10) Na Capitulo 8, hay aprende kita si paquemodo el Reino del Dios queda el solamente gobierno que hay rula con el mundo. (Le con el Daniel 2:44.) Y despues, el Reino del Dios hay hace con este tierra un bonito paraiso.​—Mira con el Endnote 11.

15. Cosa el ‘nuevo tierra’?

¹⁵ El Biblia ya promete: “Un Nuevo Cielo y un Nuevo Mundo [o tierra], donde el justicia ay reina.” (2 Pedro 3:13; Isaias 65:17) Tiene vez, si el Biblia ta discuti acerca na “tierra,” ta refiri este con el maga gente quien ta queda na tierra.  (Genesis 11:1) Entonces, el ‘nuevo tierra’ ta refiri con el maga gente que obediente y tiene bendicion del Dios.

16. Cosa bonito regalo dale el Dios con aquellos quien hay queda na de suyu nuevo mundo y cosa kita debe hace para ricibi este regalo?

¹⁶ Si Jesus ya promete que aquellos quien hay queda na nuevo mundo del Dios hay obtene “Vida Eterno.” (Marcos 10:30) Cosa kita debe hace para ricibi este regalo? Pabor le con el Juan 3:16 y 17:3 para sabé tu el contestacion. Discuti kita ahora si cosa ta habla el Biblia acerca na situacion del vida na paraiso tierra.

17, 18. Porque kita puede habla que hay tiene paz y seguridad na entero mundo?

¹⁷ Nuay mas maldad, guerra, crimen y violencia. Nuay mas mal gente quien hay queda na tierra. (Salmo 37:10, 11) El Dios hay ‘termina con el maga guerra na entero tierra.’ (Salmo 46:9; Isaias 2:4) El tierra hay llena de maga gente quien ta ama y ta obedece con Dios. Hay tiene paz hasta para cuando.​—Salmo 72:7.

¹⁸ Hay tiene seguridad el maga siervo de Jehova. Na tiempo del Biblia, cuando ya obedece el maga Israelita con Dios, tiene sila seguridad cay ya protege le kanila. (Levitico 25:18, 19) Na Paraiso, gendeh mas kita tiene miedo na maskin cosa o maskin con quien. Hay tiene ya kita seguridad!—Le con el Isaias 32:18; Miqueas 4:4.

19. Porque kita puede asigura que hay tiene abundancia de comida na nuevo mundo del Dios?

¹⁹ Hay tiene abundancia de comida. “Hay tiene abundancia de grano na tierra; na arriba del monte este hay sobra.” (Salmo 72:16) Si Jehova, el “diaton Dios, hay bendici kanaton,” y “el tierra hay dale el producto de este.”​—Salmo 67:6.

20. Porque kita sabe que el tierra hay queda paraiso?

²⁰ Hay queda paraiso el entero tierra. El maga gente  hay tiene bonito casa y jardin. (Le con el Isaias 65:21-24; Revelacion 11:18.) El entero tierra hay queda bonito igual con el jardin de Eden de antes. Hay dale si Jehova el todo cosa kita necesita. El Biblia ta habla acerca con ele: “Ta abri tu de tuyu mano y ta satisfecha el deseo del todo vivo.”​—Salmo 145:16.

21. Porque kita puede habla que hay tiene paz entre na maga gente y animal?

²¹ Hay tiene paz entre na maga gente y animal. Gendeh mas queda peligroso el maga animal na maga gente. Gendeh mas tiene miedo atraca el maga bata con el maga animal que peligroso ahora.​—Le con el Isaias 11:6-9; 65:25.

22. Cosa hace si Jesus con el maga enfermo?

²² Nuay quien hay enferma. Cuando taqui si Jesus na tierra, ya cura le manada gente. (Mateo 9:35; Marcos 1:40-42; Juan 5:5-9) Pero como el Rey del Reino del Dios, hay cura si Jesus con todo. Nuay mas quien hay habla: “Enfermo yo.”​—Isaias 33:24; 35:5, 6.

23. Cosa hace el Dios con el maga ya muri?

²³ Hay vivi otravez el maga muerto. Ya promete el Dios que hay resucita le con el millones de gente quien ya muri. “El maga gente bueno [o recto] y el maga pecador [gendeh recto, NW] ay resucita.”​—Le con el Juan 5:28, 29; Maga Actividad 24:15.

24. Cosa tu ta sinti acerca el vida na Paraiso?

²⁴ Todo kita puede iscuji. Puede kita iscuji aprende acerca con Jehova y sirvi con ele o hace si cosa kita quierre. Si iscuji kita sirvi con Jehova, puede kita tiene buen futuro. Cuando ya habla el un gente con Jesus que acorda con ele despues le muri, ya promete si Jesus con ele: “Ay esta tu na Paraiso junto comigo.” (Lucas 23:43) Sabé kita mas acerca con Jesucristo y si paquemodo le cumpli el maga promesa del Dios.