1, 2. Cosa el comon pregunta del maga gente?

MANADA pregunta el maga bata. Maskin explica ya tu kanila, preguntá lang siempre sila, ‘Porque man?’ Y despues tu contesta kanila, ta preguntá siempre sila, ‘Pero, porque?’

² Joven man o de edad ya, todo kita tiene maga pregunta. Ta preguntá kita si cosa kita come, bisti o cumpra. O baká acerca na vida y futuro el diaton maga pregunta. Pero, si gendeh kita ta incuntra contestacion que satisfechao kita, ta descanza ya kita busca contestacion.

3. Porque manada gente ta pensa que gendeh sila puede incuntra contestacion na diila maga importante pregunta?

³ Tiene ba contestacion el Biblia na diaton maga importante pregunta? Cuanto maga gente el ta pensa que tiene, pero para kanila bien dificil entende con el Biblia. Ta pensa sila que maga maestro, padre y pastor lang el puede contesta con ese. Mientras el los demas tiene huya admiti que no sabe sila el contestacion. Cosa el de tuyu opinion?

4, 5. Cosa maga importante pregunta tu tiene? Porque tu debe continua busca el contestacion?

⁴ Siguro, quierre tu sabé el contestacion na maga pregunta como: Porque yo taqui? Cosa hay pasa conmigo si muri yo? Cosa el maga calidad del Dios? Si Jesus, el conocido Maestro, ya habla: “Pidi ustedes y ay recivi; busca y ay encontra; hace tuk-tuk y ay abri con ustedes.” (Mateo 7:7) Continua busca hasta incuntra tu el justo contestacion.

 ⁵ Si continua tu “busca,” hay incuntra tu el contestacion na Biblia. (Proverbio 2:1-5) El maga contestacion gendeh dificil entende. El cosa tu aprende hay resultá na mas alegre vida ahora y bonito esperanza na futuro. Discuti kita un pregunta que ta hace libug con el maga gente.

6. Porque ta pensa el cuanto maga gente que nuay queber el Dios na diila sufrimiento?

⁶ Manada gente ta pensa que el Dios nuay queber kanaton. Para kanila, si deverasan ta ama kanaton el Dios gendeh era ansina el situacion ahora. Ta puede kita mira guerra, odio y sufrimiento maskin onde. El maga gente ta enferma, ta sufri y ta muri. Poreso ta pensa sila, ‘Si ta ama kanaton el Dios, porque man le ta deja sufri el maga gente?’

7. (a) Paquemodo ta manda sinti el maga lider del religion que nuay queber el Dios kanaton? (b) Porque kita puede asigura que gendeh el Dios el causa del maga mal cosas que ta sucede?

⁷ Tiene vez, ta manda sinti el maga lider del religion que el Dios nuay queber na maga gente. Si ta sucede el trajedia, ta habla sila que voluntad se del Dios y quierre le que sucede se. Si ta habla sila se, ta disculpa gayot sila con Dios. Pero ta enseña el Biblia que el Dios gendeh el causa del maldad. Ta habla el Santiago 1:13 que el Dios gendeh ta causá mal cosas para pruba con ningunos. Este ta habla: “Si tu ta sufri na tentacion, no habla: ‘El Dios amo ya tenta [o ya pruba] conmigo,’ cay ningunos gendeh ta puede tenta con el Dios para hace malo, ni gendeh tamen el Dios ta tenta con ningunos.” Quierre decir, maskin ta permiti el Dios que sucede el maga  mal cosas, gendeh gayot ele el causa de este. (Le con el Job 34:10-12.) Considera kita un ejemplo.

8, 9. Porque gendeh gayot justo que disculpa con Dios na diaton maga problema? Dale un ejemplo.

⁸ Imagina un joven quien ta queda junto na su mayores. Ta ama gayot con ele el de suyu tata y ya enseña con ele si paquemodo hace maga buen decicion. Despues, yan rebelde este joven con su tata y ya sale na casa. Ya hace le maga mal cosas y ya enfrenta dificultad na vida. Hay disculpa ba tu con el tata na cosa ya sucede cay ya permiti le con su anak que sale na casa? Siempre, gendeh! (Lucas 15:11-13) Igual con aquel tata, ya permiti el Dios cuando ya decidi el maga gente que man rebelde y hace si cosa el malo. Poreso si tiene cosa malo ta sucede, debe kita acorda que gendeh el Dios el causa de ese. Gendeh gayot justo que disculpa con Dios.

⁹ Tiene buen razon si porque ta permiti el Dios que sucede el maga mal cosas. Na Capitulo 11, hay aprende tu si cosa el Biblia ta habla acerca con este. Pero, puede tu asigura que ta ama kanaton el Dios y gendeh debe disculpa con ele na diaton maga problema. Gane, ele el Solamente quien puede solva con ese.​—Isaias 33:2.

10. Porque kita puede asigura que hay compone el Dios con el mal efecto que ya hace el maga mal gente?

¹⁰ El Dios sagrao. (Isaias 6:3) Puro, limpio y bueno el todo cosa le ta hace. Poreso, puede ta confia con ele. Gendeh ansina el maga gente. Tiene vez, ta hace sila cosas que gendeh justo. Y maskin el bien honesto persona que ta rula, nuay poder para compone el mal efecto que ta hace el maga mal gente. Nuay quien tiene poder igual con Dios. Puede le y hay compone gayot le el todo  mal efecto que ya hace el maga mal gente. Hay quita le con el maldad hasta para cuando.​—Le con el Salmo 37:9-11.

11. Cosa ta sinti el Dios na de tuyu sufrimiento?

¹¹ Cosa ta sinti el Dios na cosa ta sucede na mundo y na cosa tu ta experienciá? El Biblia ta enseña que el Dios “ta ama con el justicia.” (Salmo 37:28) Poreso, importante con Dios si cosa el justo y si cosa el gendeh. No quierre le que sufri el maga gente. Asegun na Biblia, “ya queda triste el de suyu corazon” cuando ya mira le que lleno de maldad el mundo del antes. (Genesis 6:5, 6) El Dios nuay cambia. (Malaquias 3:6) El Biblia ta habla que interesao gayot contigo el Dios.​—Le con el 1 Pedro 5:7.

12, 13. (a) Porque kita tiene amor y lastima con otro y cosa kita ta sinti acerca el sufrimiento na mundo? (b) Porque kita puede asigura que hay quita el Dios el todo sufrimiento y injusticia?

¹² Ta habla tambien el Biblia que ya crea kanaton el Dios na su imagen. (Genesis 1:26) Quierre decir, ya hace kanaton el Dios que tiene buen calidad igual con ele. Poreso si ta sinti tu duele si ta mira con el maga inocente gente ta sufri, mas ya el Dios! Porque kita se sabe?

¹³ El Biblia ta enseña kanaton que “el Dios amor.” (1 San Juan 4:8) Todo cosas que ta hace el Dios, ta hace le por causa na de suyu amor. Poreso, ta ama kita cay ta ama el Dios. Pensa tu este: Si tiene tu poder, hay quita ba tu el todo sufrimiento y injusticia na mundo? Siempre, cay ta ama tu con el maga gente. El Dios gaha? Tiene le poder y cay ta ama le kanaton, hay quita le el todo sufrimiento y injusticia. Puede tu asigura que  hay sucede el todo promesa del Dios que ya menciona na principio de este libro! Pero, para puede tu confia con este maga promesa, necesita tu conocé mas con Dios.

14. Cosa el nombre del Dios y porque kita sabe que debe usa con este?

¹⁴ Si quierre tu queda amigo del un persona, cosa tu una ta habla con ele? El de tuyu nombre. Tiene ba nombre el Dios? Manada religion ta habla que Dios o Señor el de suyu nombre pero gendeh este nombre. Titulo lang se igual na “rey” o “presidente.” El Dios ya habla kanaton que Jehova el de suyu nombre. El Salmo 83:18 ta habla: “Ojala sabé el maga gente que uste, el nombre Jehova, uste solamente el Bien Alto na entero mundo.” El maga escritor del Biblia miles de beses ya usa con el nombre del Dios. Quierre si Jehova que sabé tu el de suyu nombre y usa con este. Ya habla le el de suyu nombre contigo para puede tu queda de suyu amigo.

15. Cosa quierre decir del nombre Jehova?

¹⁵ Hondo el cosa quierre decir del nombre del Dios, Jehova. Este quierre decir  que puede cumpli el Dios el de suyu maga promesa y proposito. Nuay quien puede sangga con ele. Solamente si Jehova el puede tiene este nombre. *

16, 17. Cosa quierre decir del (a) “Todopoderoso”? (b) “Rey eterno”? (c) “Creador”?

¹⁶ El Revelacion 15:3 ta habla: “Señor, Dios todopoderoso, bien grande y misterioso el de Uste maga  trabajo.” Cosa quierre decir del titulo “todopoderoso”? Quierre decir este que si Jehova amo el de con todo poderoso na entero universo. Y na 1 Timoteo 1:17, ya llama con Jehova “el Rey eterno.” El titulo “Rey eterno” quierre decir que ta existi ya le desde antes pa. Asegun na Salmo 90:2 estaba ele na tiempo nuay fin hasta na tiempo nuay fin. Bien marvelloso, gendeh ba?

¹⁷ Solamente si Jehova el Creador. El Revelacion 4:11 ta habla: “El diamon Dios y Señor [Jehova], Uste lang conviene recivi el gloria, el honor y el poder, cay Uste amo el quien ya hace con el entero mundo y cay, por causa del de Uste voluntad, ya hace con todo maga cosa-cosa que tiene ahora.” Maga angel na cielo, estrellas, maga fruta y pescao na mar​—si Jehova el ya crea con el todo cosa tu puede pensa!

18. Porque ta pensa el cuanto maga gente que gendeh sila puede queda amigo del Dios? Cosa ta habla el Biblia acerca con ese?

¹⁸ Si ta le el cuanto maga gente acerca na maga calidad de Jehova, ta tiene sila miedo y ta pensa, ‘El Dios bien poderoso, bien importante y bien lejos, cosa lang man yo para queda le interesao conmigo?’ Pero, ese ba el cosa quierre el Dios que sinti ta? Gendeh gayot. Quierre si Jehova queda cerca kanaton. El Biblia ta habla que el Dios “gendeh . . . lejos canaton.” (Maga Actividad 17:27) Quierre el Dios que atraca tu con ele y ya promete le que ‘ele hay atraca contigo.’​—Santiago 4:8.

19. (a) Paquemodo tu queda amigo del Dios? (b) Cosa calidad de Jehova el bien quierre tu?

¹⁹ Paquemodo tu queda amigo del Dios? Si Jesus ya habla: “Este amo el Vida hasta para cuando: Que ay conoce sila con Uste, el unico y deverasan Dios, y que ay conoce tamen sila con Jesus, el Cristo, con quien Uste ya imvia.” (Juan 17:3) Continua aprende acerca con Jehova y con Jesus para conocé tu kanila. Y puede tu tiene vida hasta para cuando. Por ejemplo, ya puede ya kita aprende que “el Dios amor.” (1 San Juan 4:16) Pero tiene pa le otro maga bonito calidad. El Biblia ta habla kanaton que si Jehova “lastimoso y tiene compasion, gendeh pronto rabia, y abundancia de amor leal y verdad.” (Exodo 34:6) Si Jehova “bueno y preparao perdona.” (Salmo 86:5) El Dios paciencioso y leal. (Salmo 18:25; 2 Pedro 3:9) Hay sabé pa tu mas acerca na de suyu maga bonito calidad mientras ta le tu acerca con ele na Biblia.

20, 21. Paquemodo kita queda cerca con Dios maskin gendeh kita ta puede mira con ele?

²⁰ Paquemodo tu queda cerca con Dios ciendo gendeh man tu ta puede mira con ele? (Juan 1:18; 4:24) Si  ta le tu acerca con Jehova na Biblia, hay conocé tu con ele como un reál Persona. (Salmo 27:4; Roma 1:20, NW) Mientras ta aprende tu mas acerca con Jehova, hay queda mas hondo el de tuyu amor y queda tu mas cerca con ele.

²¹ Hay entende tu que si Jehova el diaton Tata. (Mateo 6:9) Ya dale le kanaton vida y quierre le tiene kita bien bonito vida. Ese el cosa quierre el un amable tata para na su maga anak. (Salmo 36:9) Si, ta enseña el Biblia que puede tu queda amigo de Jehova. (Santiago 2:23) Imagina tu. Si Jehova, el Creador del universo, quierre que queda tu de suyu amigo!

22. Cosa tu debe hace si quierre el otro que descanza tu estudia con el Biblia?

²² Posible, quierre el cuanto maga gente que descanza tu estudia con el Biblia. Tan lingasa sila baká cambia tu religion. Pero, no permiti que tiene quien hay sangga contigo para queda amigo de Jehova. Ele el de con todo buen Amigo que puede tu tiene.

23, 24. (a) Porque tu debe continua preguntá? (b) Cosa kita discuti na siguiente capitulo?

²³ Mientras ta estudia tu con el Biblia, tiene maga cosas que gendeh tu ta entende. No tiene huya preguntá o pidi ayuda. Ya habla si Jesus que debe kita queda humilde igual con el maga bata. (Mateo 18:2-4) Y bien manada pregunta el maga bata. Quierre el Dios que incuntra tu contestacion. Poreso, estudia enbuenamente con el Biblia para puede tu asigura que verdad el cosa tu ta aprende.​—Le con el Maga Actividad 17:11.

²⁴ El estudiada de Biblia amo el de con todo buen manera para conocé con Jehova. Na siguiente capitulo, hay sabé ta si porque el Biblia diferente na otro maga libro.