1. Quien el puede habla kanaton si paquemodo kita debe adora con Dios?

MAYORIA del maga religion ta clama que ta enseña sila el verdad acerca con Dios. Pero imposible se cay el diferente religion ta enseña diferente cosas acerca si quien el Dios y si paquemodo kita debe adora con ele. Paquemodo kita sabé el justo manera para adora con Dios? Si Jehova lang el puede habla si paquemodo kita debe adora con ele.

2. Paquemodo tu aprende el justo manera para adora con Dios?

² Ya dale kanaton si Jehova el Biblia para aprende kita el justo manera para adora con ele. Poreso estudia con el Biblia y hay ayudá contigo si Jehova para beneficia tu na de suyu maga enseñanza cay bien interesao le contigo.​—Isaias 48:17.

3. Cosa quierre el Dios que hace kita?

³ Cuanto maga gente ta habla que aceptable con Dios el todo religion pero gendeh ese el cosa kanaton ya enseña si Jesus. Ya habla le: “Gendeh todo el quien ta llama conmigo: Señor, Señor, ay entra na Reino del Cielo, sino aquellos lang quien ta hace el voluntad del dimio Tata na cielo.” Entonces, necesita kita aprende si cosa el voluntad del Dios y despues hace con ese. Un serioso cosa este cay ya compara si Jesus con el maga gente quien gendeh ta obedece con Dios como maga criminal, “maga gente malo.”​—Mateo 7:21-23.

4. Cosa ya habla si Jesus acerca na hacida del voluntad del Dios?

⁴ Ya habla si Jesus que si quierre kita hace con el voluntad  del Dios, hay enfrenta kita maga dificultad. Ele ya habla: “Entra ustedes na puerta estrecho, cay el puerta para na destruccion bien ancho y el camino facil, y bien mucho maga gente ta sigui ese camino. Pero el puerta para na vida bien estrecho y el camino malisud, y poco lang maga gente ta encontra con ese.” (Mateo 7:13, 14) El estrecho camino o el justo manera para adora con Dios ta guiá para na vida hasta para cuando. Mientras el ancho camino o el gendeh justo manera para adora con Dios ta guiá para na muerte. Pero no quierre si Jehova que tiene quien muri. Ta dale le oportunidad con todo maga gente para aprende acerca con ele.​—2 Pedro 3:9.

5. Paquemodo tu puede conocé con aquellos quien ta adora con Dios na justo manera?

⁵ Ya habla si Jesus que puede kita conocé con aquellos quien ta adora con Dios na justo manera. Puede kita se hace si examina kita si cosa sila ta creé y ta hace. Ya habla le: “Ay conoce ustedes canila na diila maga fruta.” Y despues ya omenta le: “El pono bueno ta dale maga fruta bueno.” (Mateo 7:16, 17) Gendeh este quierre decir que perfecto el maga quien ta adora con Dios. Pero el maga siervo del Dios pirmi ta pricura hace si cosa el justo. Mira kita ahora si cosa kanaton ayudá para puede conocé con aquellos quien ta adora con Dios na justo manera.

6, 7. Porque el verdadero enseñanza base na Biblia? Cosa kanaton ta enseña el ejemplo de Jesus?

⁶ Base debe na Biblia el diaton enseñanza. El Biblia ta habla: “Todo el maga Escritura inspirao de Dios y puede usa con provecho para insiña, para discuti, para guia el vida del maga gente, y insiña kanila queda santo. Ansina el maga gente consagrao para con Dios ta queda perfecto y preparao para todo clase de trabajo bueno.” (2 Timoteo  3:16, 17) Ya escribi si apostol Pablo con el maga Cristiano: “Cuando ya recibi ustedes el palabra del Dios que ya predica came, ustedes ya acepta con ese, gendeh como palabra del gente lang, sino como el cosa que amo gayot: El Palabra del Dios.” (1 Tesalonica 2:13) El verdadero adoranza yan base solamente na Palabra del Dios, el Biblia. Gendeh este base na maga idea del gente, tradicion o otro pa.

⁷ Base na Palabra del Dios el todo cosa ya enseña si Jesus. (Le con el Juan 17:17.) Ya cita le estaba na Escritura. (Mateo 4:4, 7, 10) El maga verdadero siervo del Dios ta imita con el ejemplo de Jesus y tan base diila maga enseñanza na Biblia.

8. Cosa kanaton ya enseña si Jesus acerca na adoranza con Jehova?

⁸ Con Jehova lang kita debe adora. El Salmo 83:18 ta habla: “Uste, el nombre Jehova, uste solamente el Bien Alto na entero mundo.” Quierre si Jesus que sabé el maga gente si quien gayot el verdadero Dios y ya enseña le kanila el nombre del Dios. (Le con el Juan 17:6.) Ya habla si Jesus: “Adora con el Señor [Jehova, NW], el dituyo Dios y con Ele lang gayot sirvi.” (Mateo 4:10) Poreso, como maga siervo del Dios ta imita kita con el ejemplo de Jesus. Con Jehova lang kita ta adora, ta usa kita el de suyu nombre y ta enseña kita con otro si cosa el nombre del Dios y si cosa le hace para kanaton.

9, 10. Paquemodo kame ta dale mira amor con uno’y otro?

⁹ Necesita kita tiene verdadero amor na uno’y otro. Ya enseña si Jesus con el de suyu maga dicipulo que ama con uno’y otro. (Le con el Juan 13:35.) Gendeh importante si de onde kame, si cosa el diamon cultura o si rico man o pobre. El diamon amor para con uno’y otro ta hace kanamon unido como maga hermano y hermana. (Colosa 3:14) Poreso, gendeh kame ta participa na guerra y ta mata gente. El Biblia ta habla: “Ta puede kita sabe si quien ba el  maga anak del Dios y quien el maga anak del demonio. Ansina ta sabe ese: Todo aquellos quien gendeh ta hace bueno, gendeh gayot del Dios. Y gendeh tamen del Dios aquellos quien gendeh ta ama con el diila hermano o hermana.” Y ta omenta este: “Ama kita con uno y otro, y no kita hace igual como si Cain quien amo del demonio y ya mata con su hermano.”​—1 San Juan 3:10-12; 4:20, 21.

¹⁰ Ta usa kame el diamon tiempo, fuerza y material cosas para ayudá y anima con uno’y otro. (Maga Hebreo 10:24, 25) Ta hace kame si cosa el “bueno para con todo el maga gente.”​—Galacia 6:10, El Nuevo Testamento.

11. Porque kame ta creé que posible lang el salvacion por medio de Jesucristo?

¹¹ Necesita kita obedece con Jesus cay posible lang el salvacion por medio con ele. El Biblia ta habla: “Cay de todo maga nombre que ya dale con el maga gente na mundo, por medio lang de este Nombre ta puede kita recivi el salvacion.” (Maga Actividad 4:12) Na Capitulo 5 de este libro, ya aprende kita que ya imbia si Jehova con Jesus para dale el de suyu vida como un rescate para na maga obediente gente. (Mateo 20:28) Ya iscuji si Jehova con Jesus para queda Rey na entero tierra. Amo se el razon si porque ta habla kanaton el Biblia que debe kita obedece con Jesus si quierre kita vivi hasta para cuando.​—Le con el Juan 3:36.

12. Porque gendeh kame ta participa na politica?

¹² Gendeh kita debe participa na politica. Nuay participa si Jesus na politica. Cuando na presencia del un Romano gobernador que si Pilato, si Jesus ya habla con ele: “El dimio Reino gendeh de este mundo.” (Le con el Juan 18:36.) Igual con Jesus, leal kame con el Reino del Dios na cielo y por causa con ese, gendeh kame ta participa na politica maskin onde pa kame ta queda. Pero ta manda  kanamon el Biblia que “obedece con el autoridad del gobierno.” (Roma 13:1) Ta obedece kame con el maga ley del nacion onde kame ta queda. Pero si contra este na ley del Dios, ta imita kame con el maga apostoles quien ya habla: “Necesita came obedece con el Dios, y gendeh con el maga gente.”​—Maga Actividad 5:29; Marcos 12:17.

13. Cosa kame ta predica acerca na Reino del Dios?

¹³ Ta creé kita que el Reino del Dios lang el solucion na todo problema na mundo. Ya habla si Jesus que el “Buen Noticia acerca del Reino” hay predica na entero mundo. (Le con el Mateo 24:14.) Gendeh puede hace el gobierno del gente el cosa que puede hace el Reino del Dios para kanaton. (Salmo 146:3) Ya enseña kanaton reza si Jesus para na Reino del Dios cuando ya habla le: “Manda vene el de Uste Reino. Hace el de Uste voluntad aqui na mundo igual como alli na cielo.” (Mateo 6:10) Ta habla kanaton el Biblia que el Reino del Dios hay destroza con el todo gobierno del maga gente y “este solamente hay esta hasta para cuando.”​—Daniel 2:44.

14. Para contigo, quien el ta adora con Dios na justo manera?

¹⁴ Ahora que ya sabé tu este maga cosas, pensa tu este: ‘Quien el ta enseña base na Biblia? Quien el ta habla con otro acerca na nombre del Dios? Quien el tiene verdadero amor na uno’y otro y ta creé que ya imbia el Dios con Jesus para salva kanaton? Quien el gendeh ta participa na politica? Quien el ta predica que solamente el Reino del Dios el puede solva el diaton maga problema?’ El maga Testigo de Jehova lang.​—Isaias 43:10-12.

15. Cosa kita debe hace si quierre kita que acepta el Dios con el diaton adoranza?

¹⁵ Gendeh bastante que ta creé lang tu que tiene Dios.  Maskin el maga demonio ta creé que tiene Dios pero gendeh sila ta obedece con ele. (Santiago 2:19) Si quierre kita que acepta el Dios diaton adoranza, debe kita creé que ta existi le y hace si cosa le ya manda kanaton.

16. Porque kita debe desaleja na falso religion?

¹⁶ Para acepta el Dios con el diaton adoranza, debe kita desaleja na falso religion. Ya escribi si profeta Isaias: “Sale ustedes alli . . . Esta ustedes limpio.” (Isaias 52:11; 2 Corinto 6:17) Amo se el razon si porque debe kita desaleja na maskin cosa que tiene que hace na falso adoranza.

17, 18. Cosa “el Grande Babilonia” y porque debe sale dayun con ese?

¹⁷ Cosa el falso religion? Ese amo el maskin cosa religion que ta enseña kanaton adora con Dios na manera que contra na de suyu Palabra. Ta llama el Biblia con el todo falso religion como “el Grande Babilonia.” (Revelacion 17:5) Porque? Despues del Avenida na tiempo de Noe, manada falso enseñanza ya principia na ciudad de Babilonia. Yan calayat este na entero mundo. Por ejemplo, el maga gente quien ta queda na Babilonia ta adora maga grupo de tres dios. Manada tambien religion ahora el ta enseña que el Dios parte del Trinidad. Pero el Biblia claro ta enseña que uno lang el verdadero Dios, si Jehova, y si Jesus el de suyu Anak. (Juan 17:3) El maga gente na Babilonia ta creé tambien que despues muri el un persona, tiene siempre parte del de suyu cuerpo ta continua vivi y ese amo hay sufri na infierno. Gendeh se deverasan.​—Mira con el Endnote 14, 17 y 18.

¹⁸ Ya habla el Dios que cerca ya destroza con el todo falso religion. (Revelacion 18:8) Ta mira ba tu si porque bien importante que sale dayun na falso religion? Quierre si Dios Jehova que hace tu se mientras tiene pa tiempo.​—Revelacion 18:4.

19. Si decidi tu sirvi con Jehova, paquemodo le cuida contigo?

 ¹⁹ Si decidi tu sale na falso religion y sirvi con Jehova, baká gendeh entende el cuanto del de tuyu maga amigo o familia con el de tuyu decicion y posible tu experienciá dificultad por causa kanila. Pero gendeh gayot contigo deja si Jehova. Hay queda tu parte del familia del millones de gente na entero mundo quien deverasan ta ama con uno’y otro y hay tiene tu el esperanza que vivi hasta para cuando na nuevo mundo del Dios. (Marcos 10:28-30) Posible llega el tiempo, el cuanto del de tuyu maga amigo y familia quien tan contra con el de tuyu decicion que sirvi con Jehova hay decidi que estudia tambien con el Biblia.

20. Porque importante que adora con Dios na justo manera?

²⁰ Gendeh mas tarda, hay destroza el Dios con el todo maldad y el de suyu Reino hay rula na entero mundo. (2 Pedro 3:9, 13) Que bien bonito ese tiempo! Todo hay adora con Jehova na manera que quierre le. Poreso, bien importante que actua ya tu ahora y adora con Dios na justo manera.