1, 2. Porque tu puede habla que un especial regalo el rezo? Porque kita necesita sabé si cosa ta enseña el Biblia acerca con este?

BIEN diutay el mundo si compara con el universo. Si ta mira si Jehova con el tierra, el maga gente na todo nacion igual lang como un diutay tulu de agua estaba na balde. (Salmo 115:15; Isaias 40:15) Maskin pa bien diutay kita compara na universo, el Salmo 145:18, 19 ta habla: “Si Jehova cerca con aquellos quien ta llama con ele, aquellos quien ta llama con ele con sinceridad. Ta satisfecha le el deseo de aquellos quien ta tiene miedo con ele; ta oi le con el diila pidida de ayuda y ta salva le kanila.” Un grande privilegio gayot se! Si Jehova, el todopoderoso Creador, quierre queda cerca kanaton y quierre le oi con el diaton maga rezo. Si, un privilegio el rezo. Un especial regalo se que ya dale si Jehova na cada uno kanaton.

² Pero oi lang si Jehova kanaton si converza kita con ele na manera que aceptable con ele. Paquemodo kita se puede hace? Mira kita si cosa ta habla el Biblia acerca na rezo.

3. Porque tu debe reza con Jehova?

³ Quierre si Jehova que reza o man cuento tu con ele. Porque kita se sabe? Pabor le con el Filipo 4:6, 7. Pensa con ese invitacion. El quien ta rula con el universo bien interesao contigo y quierre le que habla tu con ele si cosa tu ta sinti y si cosa de tuyu maga problema.

4. Porque el regular rezo con Jehova puede hace fuerte el de tuyu amistad con ele?

 ⁴ Puede ayudá el rezo para tiene kita buen amistad con Jehova. Si pirmi tan cuento el man amigo acerca si cosa sila ta pensa, tan lingasa y ta sinti, hay queda mas fuerte el diila amistad. Ansina tambien si ta reza kita con Jehova. Por medio na Biblia, ya habla le contigo si cosa le ta pensa, ta sinti y si cosa le hace na futuro. Si man cuento tu con ele pirmi, puede tu habla con ele si cosa gayot tu ta sinti. Mientras ta hace tu se, hay queda mas fuerte el de tuyu amistad con Jehova.​—Santiago 4:8.

5. Porque kita puede habla que gendeh ta oi si Jehova con el todo rezo?

⁵ Ta oi ba si Jehova con el todo rezo? Gendeh. Na tiempo de profeta Isaias, si Jehova ya habla con el maga Israelita: “Maskin pa ta reza ustedes manada beses, gendeh yo ta oi; el de ustedes mano lleno de sangre.” (Isaias 1:15) Poreso, si gendeh kita tiene cuidao, baká puede  kita hace cosas que ta odia si Jehova y queda causa para gendeh le oi el diaton maga rezo.

6. Porque bien importante el fe? Paquemodo tu dale mira que tiene tu fe?

⁶ Si quierre kita que oi si Jehova con el diaton maga rezo, debe kita tiene fe con ele. (Marcos 11:24) Si apostol Pablo ya explica: “Pero si noay fe, noay quien ya puede hace el cosa quiere el Dios, cay quien ta atraca con el Dios necesita cree cay tiene Dios, y que Ele ta premia con aquellos quien ta busca con Ele.” (Maga Hebreo 11:6) Pero gendeh bastante que habla lang kita que tiene kita fe. Necesita kita obedece pirmi con Jehova para dale mira que tiene kita fe.​—Le con el Santiago 2:26.

7. (a) Porque kita debe queda humilde y respetoso si ta reza con Jehova? (b) Paquemodo kita dale mira que sincero kita si ta reza?

⁷ Debe kita queda humilde y respetoso si ta reza con Jehova. Porque? Si converza kita con el un rey o presidente, hay man cuento kita kanila con respeto. Gendeh ba debe kita dale mira mas respeto y humildad si ta converza con Jehova cay ele el Todopoderoso Dios? (Genesis 17:1; Salmo 138:6) Debe tambien kita queda sincero y reza con Jehova con todo corazon, gendeh que bira-bira lang el diaton rezo.​—Mateo 6:7, 8.

8. Si ta reza kita acerca na un cosa, cosa pa kita debe hace?

⁸ Y ultimo, si ta reza kita acerca na un cosa, debe kita hace el todo cosas harmonia na cosa kita ya reza. Por ejemplo, si ta reza kita con Jehova para de cada dia necesidad, gendeh kita debe queda plojo y expecta que hay dale kanaton si Jehova el todo cosas ciendo puede man kita trabaja para con ese. Debe kita trabaja enbuenamente y acepta maskin cosa trabajo que puede  kita hace. (Mateo 6:11; 2 Tesalonica 3:10) O si ta reza kita con Jehova para ayudá kanaton que gendeh mas hace maga cosas que gendeh justo, debe kita evita maga situacion que puede tenta kanaton para hace se. (Colosa 3:5) Discuti kita ahora con el cuanto maga comon pregunta acerca na rezo.

9. Con quien kita debe reza? Cosa kanaton ta enseña el Juan 14:6 acerca na rezo?

⁹ Con quien kita debe reza? Ya enseña si Jesus con el de suyu maga siguidores reza con el ‘Tata diaton na cielo.’ (Mateo 6:9) Ya habla tambien le: “Yo amo el Camino, el Verdad y el Vida. Noay quien ay puede anda con el Tata si gendeh por medio dimio.” (Juan 14:6) Poreso, con Jehova lang kita debe reza por medio con Jesus. Cosa quierre decir que reza por medio con Jesus? Ese quierre decir que debe kita dale mira respeto con el especial trabajo que ya dale si Jehova con Jesus. Como cosa kita ya aprende, ya vene si Jesus na tierra para salva kanaton desde na pecado y muerte. (Juan 3:16; Roma 5:12) Ya iscuji si Jehova con Jesus para queda el Alto Sacerdote y Juez.​—Juan 5:22; Maga Hebreo 6:20.

10. Debe ba kita tiene especifico posicion si ta reza? Explica.

¹⁰ Debe ba kita tiene especifico posicion si ta reza? Gendeh kanaton ta manda si Jehova hinca, sinta o para si ta reza kita. Ta enseña kanaton el Biblia que puede kita converza con Jehova na maskin cosa posicion. (1 Cronicas 17:16; Nehemias 8:6; Daniel 6:10; Marcos 11:25) El mas importante con Jehova amo que converza kita con ele na manera que aceptable con ele, gendeh si cosa el diaton posicion si ta reza. Puede kita reza todas o silencio maskin onde kita y maskin cosa hora, didia  man o denoche. Si reza kita con Jehova, puede kita confia que hay oi le kanaton maskin nuay otro quien ta puede oi.​—Nehemias 2:1-6.

11. Cosa el cuanto maga cosas que puede kita pidi con Jehova?

¹¹ Cosa kita puede pidi na rezo? Puede kita pidi na rezo maskin cosa que aceptable con Jehova. El Biblia ta habla: “Maskin cosa ta pidi kita con Ele comforme na su querer, Ele ay oi canaton.” (1 San Juan 5:14) Puede ba kita reza acerca na diaton personal cosas? Si. Reza con Jehova igual como tan cuento tu con el de tuyu amigo. Puede kita habla con Jehova el todo cosa que talli na diaton pensamiento y corazon. (Salmo 62:8) Puede kita pidi na rezo con el de suyu sagrao espiritu para ayudá kanaton hace si cosa el justo. (Lucas 11:13) Puede tambien kita pidi sabeduria con Jehova para puede kita hace maga buen decicion y pidi fuerza para puede kita enfrenta con el maga dificultad. (Santiago 1:5) Debe kita pidi con Jehova que perdona con el diaton maga culpa. (Efeso 1:3, 7) Debe tambien kita inclui con otro na diaton rezo, igual el diaton familia y diaton maga hermano y hermana na congregacion.​—Maga Actividad 12:5; Colosa 4:12.

12. Cosa debe el mas importante na diaton maga rezo?

¹² Cosa debe el mas importante na diaton maga rezo? Si Jehova y el de suyu voluntad. Debe kita con ele rindi gracias con todo corazon na todo cosas que ya hace le para kanaton. (1 Cronicas 29:10-13) Sabe kita este cay cuando taqui si Jesus na tierra, ya enseña le con el de suyu maga dicipulo si paquemodo reza. (Le con el Mateo 6:9-13.) Ya habla le que debe sila una pidi na diila rezo que santifica o hace sagrao con el nombre del Dios. Despues, ya dale mira si Jesus que debe kita reza que llega el Reino del Dios y hace el voluntad de Jehova aqui na tierra. Despues pidi  con ese maga importante cosas amo pa ya habla si Jesus que pidi kita para na diaton personal necesidad. Si una si Jehova y el de suyu voluntad na diaton rezo, ta dale kita mira si cosa el mas importante kanaton.

13. Paquemodo debe de largo el diaton rezo?

¹³ Paquemodo debe de largo el diaton rezo? Nuay habla el Biblia si paquemodo de largo. El diaton rezo puede corto o largo, depende na situacion. Por ejemplo, puede kita dale corto rezo antes de come pero un largo  rezo si ta rindi kita gracias con Jehova o si ta habla kita con ele acerca na diaton maga lingasa. (1 Samuel 1:12, 15) Gendeh kita reza largo para lang saca el atencion del otro, igual como cosa ya hace el cuanto maga gente na tiempo de Jesus. (Lucas 20:46, 47) No quierre si Jehova ansina clase de rezo. El importante con Jehova amo que reza kita con todo corazon.

14. Paquemodo de pirmi kita debe reza y cosa este ta enseña kanaton acerca con Jehova?

¹⁴ Paquemodo de pirmi kita debe reza? Ta invita kanaton si Jehova que regular con ele man cuento. El Biblia ta habla que debe kita “reza” y “reza firmi.” (Mateo 26:41; 1 Tesalonica 5:17) Pirmi preparao si Jehova para oi kanaton. Puede kita con ele rindi gracias todo el dia cay amable y bondadoso le. Puede tambien kita pidi  con ele guia, fuerza y comforta. Si valoroso gayot kanaton el privilegio que reza con Jehova, hay converza kita con ele na todo oportunidad que tiene kita.

15. Porque kita debe habla “amen” na punta del rezo?

¹⁵ Porque kita debe habla “amen” na punta del rezo? El palabra “amen” quierre decir “asigurao” o “ojala sucede se.” Ese el manera para dale mira que sincero kita na cosa kita ya habla na diaton rezo. (Salmo 41:13) Ta enseña tambien kanaton el Biblia que si ta habla kita “amen,” silencio man o todas, na punta del un de publico rezo ta dale kita mira que conforme kita na cosa ya habla.​—1 Cronicas 16:36; 1 Corinto 14:16.

16. Ta contesta ba gayot si Jehova con el diaton maga rezo? Explica.

¹⁶ Ta contesta ba gayot si Jehova con el diaton maga rezo? Si. El Biblia ta llama con ele “el quien ta oi con el rezo.” (Salmo 65:2) Ta oi y ta contesta si Jehova con el rezo del millones de gente y ta hace le se na diferente manera.

17. Paquemodo ta usa si Jehova con el maga angel y con el de suyu maga siervo na tierra para contesta con el diaton maga rezo?

¹⁷ Ta usa si Jehova con el de suyu maga angel y maga siervo aqui na tierra para dale contestacion con el diaton maga rezo. (Maga Hebreo 1:13, 14) Manada maga gente el ya reza que ayudá kanila entende con el Biblia y nuay dura, un Testigo de Jehova ya visitá kanila. El Biblia ta dale mira que envuelto el maga angel na declaracion del “buen noticia” na entero tierra. (Le con el Revelacion 14:6.) Y manada tambien kanaton ya reza con Jehova acerca na un problema o necesidad y ya ricibi el ayuda que necesita kita por medio na un Cristiano hermano o hermana.​—Proverbio 12:25; Santiago 2:16.

18. Paquemodo ta usa si Jehova con el de suyu sagrao espiritu y con el Biblia para contesta con el diaton maga rezo?

 ¹⁸ Ta usa si Jehova con el de suyu sagrao espiritu para contesta con el diaton maga rezo. Si ta reza kita para ayudá kanaton enfrenta con el maga problema, ta usa le con el de suyu sagrao espiritu para dale kanaton guia y fuerza. (2 Corinto 4:7) Ta usa tambien si Jehova con el Biblia para contesta con el diaton maga rezo y para ayudá kanaton hace maga justo decicion. Si ta le kita con el Biblia, puede kita incuntra maga texto que puede ayudá kanaton. Puede tambien usa si Jehova con el maga tan comento na miting para habla el cosa kita necesita oi o un anciano na congregacion para dale kanaton ayuda estaba na Biblia.​—Galacia 6:1.

19. Porque dol gendeh ta contesta si Jehova con el diaton maga rezo?

¹⁹ Pero tiene vez, ta pensa kita, ‘Porque gendeh pa ta contesta si Jehova con el dimio rezo?’ Acorda que sabe le si cuando y paquemodo contesta con el diaton maga rezo. Sabe le si cosa kita necesita. Necesita kita continua reza para dale mira que sincero kita na cosa kita ta habla con ele y para dale mira que tiene gayot kita fe con ele. (Lucas 11:5-10) Tiene vez ta contesta si Jehova con el diaton maga rezo na manera que gendeh kita ta expecta. Por ejemplo, ta reza kita por el dificultad que ta experienciá kita. Pero en vez de quita con el problema, ta dale le kanaton fuerza para puede kita enfrenta con ese.​—Le con el Isaias 40:29.

20. Porque kita debe pirmi reza con Jehova?

²⁰ Un grande privilegio que puede kita reza con Jehova! Puede kita asigura que hay oi le kanaton. (Salmo 145:18) Y si con todo corazon kita pirmi reza con Jehova, hay queda mas fuerte el diaton amistad con ele.