1, 2. Cosa quierre si Jehova para na maga familia?

SI Dios Jehova el ya dale casá con el primer maridable. El Biblia ta habla kanaton que ya crea le con el primer mujer y “ya lleva le con este con el hombre.” Bien alegre si Adan poreso ya habla le: “Este ya el bukuk del de mio bukuk y laman del de mio laman.” (Genesis 2:22, 23) Este ta dale mira que quierre si Jehova que el man maridable queda alegre.

² Maka-triste cay manada familia el gendeh alegre. Pero el Biblia ta contene manada principio que puede ayudá con el todo miembro del familia para puede sila vivi junto con alegria.​—Lucas 11:28.

3, 4. (a) Paquemodo debe trata el marido con el de suyu mujer? (b) Porque importante para na man maridable que perdona con uno y otro?

³ El Biblia ta habla que el un buen marido debe trata con el de suyu mujer con amor y respeto. Pabor le con el Efeso 5:25-29. Hay trata pirmi el marido con el de suyu mujer na amable manera. Hay protege le, cuida y gendeh hace sinti duele con el de suyu mujer.

⁴ Pero cosa debe hace el marido si yan kamali el de suyu mujer? Ya manda con el maga marido: “Ama con el de ustedes maga mujer y no maltrata canila.” (Colosa 3:19) Maga marido, acorda que tan kamali tambien  ustedes. Y si quierre ustedes que perdona con ustedes el Dios, debe ustedes perdona con el de ustedes mujer. (Mateo 6:12, 14, 15) Si el man maridable ta perdona con uno y otro, ayudá se para queda alegre el diila matrimonio.

5. Porque debe honra el marido con el de suyu mujer?

⁵ Ta expecta si Jehova que honra el marido con el de suyu mujer. El marido debe pensa enbuenamente si cosa el necesidad del de suyu mujer. Un serioso cosa este. Si gendeh ta trata enbuenamente el marido con el de suyu mujer, gendeh oi si Jehova con el de suyu rezo. (1 Pedro 3:7) Valoroso con Jehova el maga gente quien ta ama con ele. Nuay le con quien tan afavor.

6. Cosa quierre decir que “un cuerpo lang” el man maridable?

⁶ Ya habla si Jesus que el man maridable ‘gendeh mas dos, sino un cuerpo lang.’ (Mateo 19:6) Leal sila y nunca hay traiciona con uno y otro. (Proverbio 5:15-21; Maga Hebreo 13:4) El man maridable debe dale el sexual necesidad del cada uno. (1 Corinto 7:3-5) Debe acorda el marido que “noay quien ta desprecia con su mismo cuerpo, sino ta dale come y ta cuida embuenamente con ese.” Poreso, debe le ama y cuida enbuenamente con el de suyu mujer. Mas pa na todo, quierre el mujer que bueno y amable el de suyu marido con ele.​—Efeso 5:29

7. Porque el familia ta necesitá un cabeza de familia?

⁷ Cada familia ta necesitá un cabeza quien hay guiá para puede mentena el unidad del familia. El Biblia ta habla na 1 Corinto 11:3: “Cay si Cristo amo el cabeza de todo maga hombre, y el marido amo el cabeza del disuyo mujer, y el Dios amo el cabeza de Cristo.”

8. Paquemodo dale mira el mujer que ta respeta le con el de suyu marido?

 ⁸ Todo marido tan kamali. Pero si suportá el mujer con el decicion del de suyu marido y coopera, el entero familia hay beneficia. (1 Pedro 3:1-6) El Biblia ta habla: “El mujer necesita respeta con el disuyo marido.” (Efeso 5:33) Paquemodo si otro el creencia del marido? Debe siempre le respeta con el de suyu marido. El Biblia ta habla: “Maga mujer, necesita somete con el de ustedes maga marido. Ansina, si tiene diila quien gendeh ta cree na Palabra, el de ustedes custumbre ay comvinci canila para cree. Gendeh mas ustedes ay necesita conversa pa ni un palabra, cay sila ay mira si paquemodo de limpio y respetoso el de ustedes custumbre.” (1 Pedro 3:1, 2) El buen ejemplo del mujer puede ayudá para entende y respeta el marido con el de suyu creencia.

9. (a) Cosa debe hace el mujer si otro el de suyu opinion na de suyu marido? (b) Cosa el consejo na Tito 2:4, 5 para na maga mujer?

⁹ Cosa puede hace el mujer si otro el de suyu opinion na de suyu marido? Debe le se habla con respeto. Por  ejemplo, tiene cosa ya habla si Sara que nuay gusta si Abraham. Pero si Jehova ya habla con Abraham: “Oi con ele.” (Genesis 21:9-12) Ralo lang hace decicion el un Cristiano marido que contra na cosa ta habla el Biblia poreso debe con ele suportá el de suyu mujer. (Maga Actividad 5:29; Efeso 5:24) El un buen mujer ta cuida con el familia. (Le con el Tito 2:4, 5.) Si puede mira el marido y maga anak si paquemodo le ta cuida kanila, hay ama y respeta gayot sila con ele.​—Proverbio 31:10, 28.

10. Cosa ta habla el Biblia acerca na separtahan y divurcio?

¹⁰ Tiene vez, ta decidi dayun el man maridable que man separtahan o man divurcio. Pero el Biblia ta habla que “el mujer no puede separta con su marido” y “el marido no puede deja con su mujer.” (1 Corinto 7:10, 11) Tiene maga grabe circumstancia donde el man maridable puede man separtahan pero un serioso decicion este. Quetal si acerca na divurcio? El Biblia ta dale mira que tiene lang un valido razon que puede man divurcio, ese si el marido o mujer ya comete sexual imoralidad na otro.​—Mateo 19:9.

11. Cosa ta necesitá el maga anak?

¹¹ Maga mayores, dale grande tiempo para man junto con el de ustedes maga anak. Necesita sila con ustedes. Mas pa na todo, ta necesitá sila con ustedes para enseña kanila acerca con Jehova.​—Deuteronomio 6:4-9.

12. Cosa debe hace el maga mayores para protege con el diila maga anak?

¹² El mundo de Satanas mas ta queda malo y tiene cuanto maga gente quien quierre hace malo y molestia con el diaton maga anak. El cuanto maga mayores tan dificil man cuento acerca con ese. Pero necesita dale aviso  el maga mayores con el diila maga anak acerca con ese clase de maga gente y enseña si paquemodo evita kanila. Maga mayores, debe ustedes protege con el de ustedes maga anak. *—1 Pedro 5:8.

13. Paquemodo debe enseña el maga mayores con el diila maga anak?

¹³ Responsibilidad del maga mayores que enseña maga buen custumbre con el diila maga anak. Paquemodo tu enseña con el de tuyu maga anak? Necesita disciplina el de tuyu maga anak pero gendeh debe por  demas. (Jeremias 30:11) Poreso no disciplina kanila si rabiao tu. No quierre tu que el de tuyu maga palabra queda como “maga lanciada de espada” y puede hace sinti duele kanila. (Proverbio 12:18) Enseña kanila si porque necesita sila queda obediente.​—Efeso 6:4; Maga Hebreo 12:9-11; mira con el Endnote 30.

14, 15. Porque debe obedece el maga anak con el diila maga mayores?

¹⁴ Ya obedece pirmi si Jesus con el de suyu Tata maskin na dificil situacion. (Lucas 22:42; Juan 8:28, 29) Ta expecta tambien si Jehova que obedece el maga anak con el diila maga mayores.​—Efeso 6:1-3.

¹⁵ Maga anak, maskin pa ta sinti ustedes que dificil obedece con el de ustedes maga mayores, acorda que si obediente ustedes, alegre con ustedes si Jehova y el de ustedes maga mayores. *—Proverbio 1:8; 6:20; 23:22-25.

16. (a) Paquemodo ta pricura influenciá si Satanas con el maga jovenez para hace malo? (b) Porque importante que iscuji maga amigo aquel ta ama con Jehova?

¹⁶ El Diablo puede usa con el de tuyu maga amigo y otro jovenez para hace tu si cosa gendeh justo. Sabe le que bien dificil resisti con ese clase de tentacion. Por ejemplo, el anak mujer de Jacob, si Dina, ya tiene maga amiga quien gendeh ta ama con Jehova. Ya causá este manada problema con ele y con el de suyu familia. (Genesis 34:1, 2) Si el de tuyu maga amigo gendeh ta ama con Jehova, hay influenciá sila contigo para hace cosa  que ta odia si Jehova. Hay causá se dolor contigo, con el de tuyu familia y con Dios. (Proverbio 17:21, 25) Ese el razon si porque bien importante que busca tu amigo aquel quien ta ama con Jehova.​—1 Corinto 15:33.

17. Cosa el responsibilidad del cada miembro del familia?

¹⁷ Si ta sigui na maga instruccion del Dios el cada miembro del familia, puede sila evita manada problema. Poreso, si un marido tu, ama y trata enbuenamente con el de tuyu mujer. Si tu el mujer, respeta y somete con el de tuyu marido y imita con el ejemplo del mujer que ya menciona na Proverbio 31:10-31. Si mayores tu, enseña con el de tuyu anak que ama con Dios. (Proverbio 22:6) Si tu un tata, guiá “enbuenamente” con el de tuyu familia. (1 Timoteo 3:4, 5; 5:8) Y maga anak, obedece con el de ustedes mayores. (Colosa 3:20) Acorda que tan kamali el cada miembro del familia poreso queda humilde y pidi perdon con uno y otro. Si, el Biblia ta contene maga guia de Jehova para na todo miembro del familia.