LECCION 09
Atraca con Dios Por Medio na Rezo
Ta sinti ba tu que necesita tu guia na de tuyu vida? Tiene ba tu maga importante pregunta que quierre tu sabe el contestacion? Necesita ba tu comforta? Quierre ba tu queda mas cerca con Jehova? El rezo puede ayuda contigo na ese maga cosas. Pero cosa el justo manera para reza? Ta oi ba el Dios con el todo rezo? Cosa tu puede hace para asigura que hay oi le con el de tuyu maga rezo? Mira kita.
1. Con quien kita debe reza y acerca na cosa kita puede reza?
Ya enseña si Jesus que con el diaton Tata na cielo lang kita debe reza. Si Jesus mismo ya reza con Jehova. Ele ya habla: “Ansina ustedes reza: Tata diamon na cielo . . .” (Mateo 6:9) Si ta reza kita con Jehova, mas ta queda fuerte el diaton relacion con ele.
Puede kita reza acerca na maskin cosa. Pero para contesta el Dios con el diaton maga rezo, debe uyun este na cosa le quierre. “Maskin cosa ta pidi kita con [Dios] comforme na su querer, Ele ay oi canaton.” (1 San Juan 5:14) Si Jesus ya menciona cuanto cosas que puede kita inclui na diaton rezo. (Le con el Mateo 6:9-13.) Puera con el diaton maga personal lingasa, debe gendeh kita ulvida rindi gracias con Dios na maga cosas que ya hace le para kanaton y pidi con ele que ayuda con otro.
2. Paquemodo kita debe reza?
El Biblia ta manda kanaton que “hace sale con [Dios] el cosa [kita] ta sinti.” (Salmo 62:8) Poreso debe sincero el diaton maga rezo. Puede kita reza suena o silencio y na maskin cosa posicion que ta dale mira respeto con Jehova. Puede kita reza maskin cosa hora y maskin onde.
3. Paquemodo el Dios ta contesta con el diaton maga rezo?
Ta hace le se na manada diferente manera. Ya dale si Jehova el de suyu Palabra, el Biblia, donde puede kita incuntra con el contestacion na diaton maga pregunta. El lehida de Biblia puede ‘hace sabio con el nuay experiencia.’ (Salmo 19:7; le con el Santiago 1:5.) Puede le dale kanaton paz na pensamiento si tiene kita maga problema. Y puede le manda move con el de suyu maga siervo que ayuda kanaton si bien necesita kita.
APRENDE PA MAS
Sabe si paquemodo tu puede reza con Dios na manera que quierre le y si paquemodo tu puede beneficia na rezo.
4. Si cosa el necesita para acepta el Dios con el diaton rezo
Paquemodo queda aceptable con Dios el diaton maga rezo? Man play con el VIDEO.
Quierre si Jehova que reza kita con ele. Le con el Salmo 65:2 y despues, discuti con este maga pregunta:
-
Ta mira tu, quierre ba el Dios, “el quien ta oi con el rezo,” que reza tu con ele? Porque?
Debe kita sigui con el maga principio del Dios para oi le con el diaton maga rezo. Le con el Miqueas 3:4 y 1 Pedro 3:12, y despues, discuti con este pregunta:
-
Paquemodo kita puede asigura que hay oi si Jehova con el diaton maga rezo?
Na un guerra, posible reza el cada grupo para ganá sila. Contesta ba gaha el Dios con el diila maga rezo?
5. Debe estaba na corazon el diaton maga rezo
Ya enseña con el cuanto maga gente que debe sila repiti maga memoriao rezo. Pero ansina ba el Dios quierre que reza kita? Le con el Mateo 6:7 y despues, discuti con este pregunta:
-
Cosa tu hace para gendeh bira-bira el de tuyu maga rezo?
Cada dia, pensa un especifico bendicion na de tuyu vida que puede tu rindi gracias con Jehova. Si hace tu este adentro na un semana, como resulta, tiene ya tu siete diferente cosas que ya reza y nuay tu repiti de tuyu maga rezo.
El un buen tata quierre que habla con ele el de suyu anak si cosa le ta sinti. Quierre tambien si Jehova que habla kita con ele si cosa el na diaton corazon
6. El rezo amo un regalo del Dios
Paquemodo kanaton puede ayuda el rezo, especialmente na maga dificil situacion? Man play con el VIDEO.
El Biblia ta promete que el rezo puede ayuda kanaton para queda calmao. Le con el Filipo 4:6, 7 y despues, discuti con este maga pregunta:
-
Maskin gendeh pirmi ta perde el diaton problema por causa na rezo, paquemodo este ta puede ayuda kanaton?
-
Cosa el cuanto cosas que quierre tu inclui na de tuyu rezo?
Sabe ba tu?
El palabra “amen” quierre decir “sucede se” o “asigurao.” Desde na tiempo del Biblia, ta habla el maga gente “amen” na punta del maga rezo.—1 Cronicas 16:36.
7. Dale tiempo para reza
Tiene vez bien ocupao kita que ta ulvida kita reza. Paquemodo de importante el rezo con Jesus? Le con el Mateo 14:23 y Marcos 1:35, y despues, discuti con este maga pregunta:
-
Cosa ya hace si Jesus para puede le dale tiempo para reza?
-
Cuando tu puede dale tiempo para reza?
EL CUANTO TA HABLA: “Sayang lang el de tuyu tiempo si reza tu cay nuay quien ta oi.”
-
Cosa tu puede habla?
SUMARIO
Si sincero el diaton rezo, puede se ayuda kanaton para queda cerca con Dios, tene kita paz na pensamiento y tene kita el fuerza que necesita para hace alegre con Jehova.
Repaso
-
Con quien kita debe reza?
-
Paquemodo kita debe reza?
-
Cosa el cuanto beneficio del rezo?
SABE PA MAS
Sabe el contestacion na maga comon pregunta acerca na rezo.
“Siete Cosas que Necesita Tu Sabe Acerca na Rezo” (The Watchtower, Octubre 1, 2010)
Sabe si porque tu debe reza y paquemodo tu hace mas bonito con el de tuyu rezo.
Considera si cosa ta enseña el Biblia acerca si con quien kita debe reza.
Na este music video, nota si onde y si cuando kita puede reza.
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
