LECCION 11
Si Paquemodo Tu Puede Beneficia con el Biblia
Quierre ba tu principia un grande proyecto pero ta sinti tu que dificil se hace? Para queda se facil para contigo, posible hinay-hinay tu con ese hace. Ansina tambien si ta le con el Biblia. Baka pregunta tu, ‘Paquemodo yo este principia?’ Na este leccion, hay considera kita el cuanto simple cosas que puede ayuda contigo para man enjoy tu le y estudia con el Biblia.
1. Porque kita debe regular le con el Biblia?
El persona quien regular ta le con el Biblia o el “ley de Jehova” hay tene buen exito y queda alegre. (Le con el Salmo 1:1-3.) Para principia, puede tu le por cuanto minuto lang cada dia. Si queda ya tu mas familiar con el Palabra del Dios, mas man enjoy ya tu le con ese.
2. Cosa puede ayuda contigo para beneficia na de tuyu lehida de Biblia?
Para puede gayot kita beneficia, necesita kita para unrato na lehida y pensa acerca na cosa kita ta le. Debe kita le y “medita con este.” (Josue 1:8, footnote) Mientras ta le, pregunta na de tuyu mismo cuerpo: ‘Cosa este ta enseña conmigo acerca con Dios Jehova? Paquemodo yo este puede aplica na de mio vida? Paquemodo yo puede usa con este maga texto para ayuda con otro?’
3. Paquemodo tu puede dale tiempo para le con el Biblia?
Ta tormenta ba tu busca tiempo para le con el Biblia? Manada kanaton ta sinti ansina. Pricura “usa el tiempo embuenamente.” (Efeso 5:16) Puede tu se hace si dale tu especifico tiempo para le con el Biblia cada dia. El cuanto ta le con el Biblia temprano aga. El otro ta iscuji que le durante el media dia. Mientras el otro denoche ta le con el Biblia, antes sila durmi. Para contigo, cosa el buen tiempo para le tu con el Biblia?
APRENDE PA MAS
Sabe si paquemodo hace mas maka-interes con el de tuyu lehida de Biblia. Aprende si paquemodo prepara enbuenamente para puede gayot tu beneficia na de tuyu estudiada del Biblia.
Igual si paquemodo kita puede gusta con el maga diferente comida, puede tambien kita gusta con el lehida de Biblia
4. Aprende man enjoy con el lehida de Biblia
Posible gendeh facil principia le con el Biblia. Pero igual si paquemodo kita puede gusta con el un nuevo comida, puede tambien kita gusta con el lehida de Biblia. Le con el 1 Pedro 2:2 y despues, discuti con este pregunta:
-
Para contigo, si le tu con el Biblia cada dia, hay man enjoy ba tu y quierre pa mas le con este?
Man play con el VIDEO para mira si paquemodo el cuanto ya principia man enjoy le con el Biblia. Despues, discuti con el maga pregunta.
-
Na video, cosa maga dificultad ya enfrenta el maga jovenes?
-
Cosa ya ayuda kanila para regular le con el Biblia?
-
Cosa sila ya hace para queda mas maka-interes el diila lehida de Biblia?
Maga sugestion para ayuda contigo:
-
Iscuji un exacto translation na moderno lengguaje. Pruba usa con el New World Translation si tiene na de ustedes lengguaje o na otro lengguaje que ta entende tu.
-
Principia le con el maga parte que maka-interes para contigo. Para na cuanto maga idea, mira con el chart “Principia Le con el Biblia.”
-
Marca si cosa ya tu ya acaba le. Usa con el chart “El De Tuyu Lehida de Biblia” na este publicacion.
-
Usa con el JW Library®app. Por medio con este, puede tu le y oi con el Biblia maskin onde usando el gadget.
-
Usa con el maga appendix na New World Translation. Tiene este maga mapa, chart y un glossary que puede hace mas maka-interes con el de tuyu lehida.
5. Prepara para na de tuyu Bible study
Le con el Salmo 119:34 y despues, discuti con este pregunta:
-
Porque bueno que reza antes le con el Biblia o prepara para na de tuyu estudiada del Biblia?
Paquemodo tu puede mas beneficia na cada estudiada? Mientras ta prepara para na un leccion, pruba hace con el siguiente:
-
Le con el maga primer parapo del leccion.
-
Busca y le con el maga texto, y pricura entende si paquemodo este conectao na topico.
-
Marca con el contestacion del cada pregunta; este hay ayuda contigo si considera ya tu este leccion junto con el quien ta conduci Bible study contigo.
Sabe ba tu?
El maga Testigo de Jehova ya usa diferente maga translation del Biblia. Pero ta aprecia gayot kame con el New World Translation of the Holy Scriptures cay exacto y claro este, y ta usa este con el nombre del Dios.—Mira con el articulo na website “Tiene Ba Diila Mismo Biblia el Maga Testigo de Jehova?”
EL CUANTO TA HABLA: “Bien dificil estudia con el Biblia. Nuay yo tiempo y fuerza para con ese.”
-
Cosa tu puede habla?
SUMARIO
Para puede beneficia con el Biblia, busca tiempo para le con este, reza para puede tu entende con el cosa tu ta le y prepara para na de tuyu Bible study.
Repaso
-
Cosa puede ayuda contigo para puede tu mas beneficia con el Biblia?
-
Cuando tu puede dale tiempo para le y estudia con el Biblia?
-
Porque bueno si prepara tu para na de tuyu Bible study?
SABE PA MAS
Man repaso cuanto maga idea que puede ayuda contigo mas beneficia na de tuyu lehida de Biblia.
“Si Paquemodo Mas Beneficia na Lehida de Biblia” (The Watchtower Num. 1 2017)
Aprende el tres manera para le con el Biblia.
“Paquemodo Conmigo Puede Ayuda el Biblia?—Part 1: Le con el De Tuyu Biblia” (Articulo na website)
Sabe si paquemodo man enjoy con el lehida de Biblia.
Saca cuanto sugestion estaba na maga ya dura ya ta le con el Biblia.
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
