LECCION 12
Cosa Puede Ayuda Contigo Para Continua Estudia con el Biblia?
Puede tu beneficia na estudiada del Biblia. Pero, posible gendeh se pirmi facil para hace. Tiene vez, baka pensa tu si puede ba tu continua estudia con el Biblia. Porque gendeh sayang si hace tu esfuerzo para continua? Cosa puede ayuda contigo para continua estudia con el Biblia maskin tiene maga dificultad?
1. Porque importante estudia con el Biblia?
“El Palabra del Dios vivo y efectivo.” (Maga Hebreo 4:12) Importante el Biblia cay ta dale se mira si cosa ta pensa y ta sinti el Dios para contigo. Ta ayuda este contigo gendeh lang para tene saber sino para tene tambien deverasan sabeduria y esperanza. Y mas importante, el Biblia ta ayuda contigo para queda amigo de Jehova. Si ta estudia tu con el Biblia, ta permiti tu con el poder de este para hace mas bonito con el de tuyu vida.
2. Porque importante que sabe el valor del verdad na Biblia?
Precioso el maga verdad na Biblia. Poreso el Biblia ta anima kanaton que “cumpra con el verdad y nunca con este vende.” (Proverbio 23:23) Si pirmi kita pone na pensamiento con el valor del verdad na Biblia, hay continua kita estudia con este—maskin pa tiene cosas ta sangga kanaton.—Le con el Proverbio 2:4, 5.
3. Paquemodo si Jehova puede ayuda contigo para continua estudia?
Como de tuyu Creador y Amigo, quierre si Jehova que ayuda contigo para aprende tu acerca con ele. Puede le dale contigo “el voluntad [o deseo] y el fuerza para hace todo maga cosa-cosa.” (Le con el Filipo 2:13.) Poreso, si necesita tu gana para estudia o deseo para aplica con el cosa tu ta aprende, puede le ayuda contigo. Si necesita tu omento fuerza para enfrenta maga dificultad o maga oposicion, puede le se dale contigo. Regular pidi con Jehova na rezo que ayuda contigo para continua estudia con el Biblia.—1 Tesalonica 5:17.
APRENDE PA MAS
Aprende si paquemodo tu puede continua estudia con el Biblia maskin pa busy tu o ta enfrenta maga oposicion. Despues, considera si paquemodo si Jehova puede ayuda contigo.
4. Dale importancia con el estudiada del Biblia
Tiene vez, busy gayot kita que nuay mas kita bastante tiempo para estudia con el Biblia. Cosa kanaton puede ayuda? Le con el Filipo 1:10, NWT y despues, discuti con este maga pregunta:
-
Para contigo, cosa el cuanto cosas na diaton vida “que mas importante”?
-
Paquemodo tu puede dale importancia con el de tuyu estudiada del Biblia?
-
Si pone tu una con el arena na balde, gendeh mas puede cabe el maga piedra
-
Si pone tu una con el maga piedra, puede siempre tu pone manada arena. Na igual manera, si hace tu una con “el maga cosas que mas importante,” hay puede tu cumpli con ese y tiene pa tu tiempo para na otro maga cosas
El estudiada del Biblia ta satisfecha con el diaton espiritual necesidad—el diaton necesidad para conoce y adora con Dios. Le con el Mateo 5:3, NWT y despues, discuti con este pregunta:
-
Paquemodo kita ta puede beneficia si ta dale kita importancia con el diaton estudiada del Biblia?
5. Continua maskin ta enfrenta oposicion
Posible, el otro ta pricura hace luya contigo para descanza tu estudia con el Biblia. Nota con el ejemplo de Francesco. Man play con el VIDEO y despues, discuti con este maga pregunta.
-
Na video, cosa el reaccion del maga amigo y familia de Francesco cuando ya habla le kanila el cosa le ta aprende?
-
Cosa el resulta cay ya continua le estudia?
Le con el 2 Timoteo 2:24, 25 y despues, discuti con este maga pregunta:
-
Cosa ta sinti el de tuyu familia y maga amigo acerca na cosa tu ta aprende?
-
Asegun na texto, paquemodo tu contesta con el un persona quien gendeh alegre cay ta estudia tu con el Biblia? Porque?
6. Confia con Jehova que ayuda le contigo
Mientras ta queda kita cerca con Jehova, mas ta queda fuerte el diaton deseo que hace alegre con ele. Pero, posible tan dificil kita hace maga cambio na diaton vida para hace el cosa le quierre. Si ta sinti tu ansina, no man luya. Hay ayuda contigo si Jehova. Man play con el VIDEO y despues, discuti con este maga pregunta.
-
Na video, cosa maga cambio ya hace si Jim para hace alegre con Jehova?
-
Cosa tu ya aprecia na de suyu ejemplo?
Le con el Maga Hebreo 11:6 y despues, discuti con este maga pregunta:
-
Cosa hay hace si Jehova “con aquellos quien ta busca con Ele”—aquellos quien ta pricura conoce y hace alegre con ele?
-
Base na este texto, cosa gaha ta sinti si Jehova si ta mira le contigo ta hace maga esfuerzo para estudia con el Biblia?
POSIBLE TIENE QUIEN PREGUNTA: “Porque tu ta estudia con el Biblia?”
-
Cosa tu hay contesta?
SUMARIO
Maskin pa gendeh pirmi facil estudia con el Biblia, puede este ayuda contigo para queda alegre hasta para cuando. Continua confia con Jehova y hay premia le contigo.
Repaso
-
Porque el maga verdad na Biblia precioso para contigo?
-
Paquemodo tu puede hace una “el maga cosas que mas importante”?
-
Porque tu debe pidi el ayuda de Jehova para continua estudia con el Biblia?
SABE PA MAS
Considera con el cuatro cosas que ya puede ayuda con el manada gente para usa enbuenamente con el diila tiempo.
“Si Paquemodo Usa Enbuenamente con el Tiempo” (Awake!, Febrero 2014)
Nota si paquemodo ya ayuda si Jehova con el un mujer, quien el marido gendeh ta entende con el de suyu esfuerzo para hace alegre con Dios.
Ta Hace Fuerte Kanaton si Jehova Para Carga con el Diaton Pesades (5:05)
Mira si paquemodo el un hombre ya beneficia cay ya continua el de suyu mujer estudia con el Biblia.
Ta acusa tiene vez con el maga Testigo de Jehova que ta bungca sila maga familia. Pero deverasan ba se?
“Ta Bungca Ba Familia el Maga Testigo De Jehova o Ta Hace Fuerte con Este?” (Articulo na website)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
