Como cosa ya discuti na leccion antes de este, gendeh todo religion aceptable con Dios. Pero, puede kita adora con el diaton Creador na manera que puede hace alegre con ele. Cosa “religion” el aceptable con ele? (Santiago 1:27) Considera si cosa ta enseña el Biblia.

1. Onde debe base el diaton adoranza?

El diaton adoranza debe base na Biblia. Si Jesus ya habla con Dios: “El de Uste Palabra amo el verdad.” (Juan 17:17) El cuanto religion gendeh ta sigui con el verdad na Biblia. Ya cambia sila con ese na maga enseñanza y tradicion del gente. Pero si Jehova gendeh alegre con aquellos quien ya “deja el mandamiento del Dios.” (Le con el Marcos 7:9.) Gendeh igual kanila, puede kita hace alegre con Dios si sigui kita con el cosa ta habla el Biblia.

2. Paquemodo kita debe adora con Jehova?

Como el diaton Creador, si Jehova debe ricibi con el diaton exclusivo devocion. (Revelacion 4:11) Quierre decir, debe kita ama con ele y con ele lang adora. Gendeh kita debe usa maga idolo o imagen.—Le con el Isaias 42:8.

El diaton adoranza debe sagrao y “ta gusta” si Jehova. (Roma 12:1) Quierre decir, necesita kita vivi asegun na de suyu maga principio na moral. Por ejemplo, aquellos quien ta ama con Jehova ta sigui con el de suyu maga principio na matrimonio. Ta evita tambien sila con el maga mal practica igual na pumada, y usada de droga prohibido y sobra alcoholico tomada. a

3. Porque kita debe adora con Jehova junto na maga hermano y hermana?

El maga miting cada semana ta dale kanaton oportunidad para ‘alaba con Jehova na congregacion.’ (Salmo 111:1,2) Un manera que ta hace kita con este amo si ta canta kita maga cancion de alabanza para con Dios. (Le con el Salmo 104:33.) Quierre si Jehova que atende kita maga miting cay ta ama le kanaton y sabe le que puede este ayuda para vivi kita hasta para cuando. Na maga miting, puede tambien kita anima con uno y otro.

 APRENDE PA MAS

4. Gendeh kita debe usa maga imagen na diaton adoranza

5. Si con Jehova lang kita adora, queda kita librao na maga falso enseñanza

 6. Ta adora kita con Dios na maga miting

Ta alaba kita con Jehova y ta anima con otro si ta dale kita maga comento y ta canta na maga miting. Le con el Salmo 22:22 y despues, discuti con este maga pregunta:

• Alegre ba tu oi con el maga comento del otro na maga miting?

• Quierre ba tu prepara para dale comento?

7. Alegre si Jehova si ta habla kita con otro el cosa kita ta aprende

Tiene manada maga manera si paquemodo kita puede habla con otro el maga verdad na Biblia. Le con el Salmo 9:1 y 34:1, y despues, discuti con este pregunta:

• Cosa tu ya puede aprende na Biblia que quierre tu habla con otro?

 SUMARIO

Ta hace kita alegre con el diaton Creador si con ele lang kita ta adora, si ta alaba kita con ele na maga miting y ta habla con otro si cosa kita ta aprende.

Repaso

• Onde kita puede aprende si paquemodo kita adora con Dios na aceptable manera?

• Porque con Jehova lang kita debe adora?

• Porque debe kita adora junto con otro quien quierre hace alegre con Dios?