LECCION 22
Paquemodo Tu Puede Habla con Otro el Buen Noticia?
Mientras ta aprende tu el verdad na Biblia, posible pensa tu, ‘Debe este sabe el todo!’ Si, deverasan se! Pero, posible ta nervia tu habla con otro el cosa tu ya aprende. Discuti kita si paquemodo tu enfrenta con el nervios y habla con otro el buen noticia na Biblia.
1. Paquemodo tu habla con aquellos conoce tu el cosa tu ya aprende?
El maga dicipulo de Jesus ya habla: “No puede came promete que ay para came de habla el cosa came ya mira y ya oi.” (Maga Actividad 4:20) Ta ama sila con el verdad poreso quierre sila habla con ese na manada gente. Ese ba tambien el cosa tu ta sinti? Si ansina, busca oportunidad si cuando tu puede habla con respeto con el de tuyu familia y amigo el cosa tu ya aprende.—Le con el Colosa 4:6.
Cuanto manera para principia predica
-
Si tan cuento na de tuyu familia, habla este para introduci un topico na Biblia: “Tiene yo bonito cosa ya puede aprende este semana.”
-
Menciona un bonito texto na de tuyu amigo quien enfermo o tan lingasa.
-
Si yan quetal contigo el de tuyu uban na trabajo, habla si cosa tu ya aprende na de tuyu estudiada na Biblia o na miting.
-
Dale mira con el de tuyu maga amigo el jw.org website.
-
Invita con otro que man junto na de ustedes Bible study o dale mira kanila si paquemodo man request un Bible study na jw.org.
2. Porque bueno si hace tu goal que predica junto na congregacion?
Ya predica el maga dicipulo de Jesus gendeh lang con aquellos conoce sila. Si Jesus “ya imvia canila dos-dos . . . na todo maga pueblo” o ciudad para predica. (Lucas 10:1) Ese manera de predicacion ya dale oportunidad na mas manada gente para oi con el buen noticia. El maga dicipulo alegre ya predica junto con otro. (Lucas 10:17) Puede ba tambien tu hace goal que predica junto na congregacion?
APRENDE PA MAS
Considera si paquemodo tu puede menora con el nervios y experiencia el alegria si habla tu con otro el buen noticia.
3. Hay man junto contigo si Jehova
El cuanto quien quierre predica posible nervia acerca si paquemodo se sila habla o si cosa el reaccion del otro.
-
Ta nervia ba tu habla con otro el cosa tu ya aprende? Porque?
Man play con el VIDEO y despues, discuti con el pregunta.
-
Paquemodo este maga joven Witness ya puede enfrenta con el diila miedo?
Le con el Isaias 41:10 y despues, discuti con este pregunta:
-
Si tiene tu miedo predica, paquemodo el rezo ayuda contigo?
Sabe ba tu?
Manada maga Testigo de Jehova ya pensa del una que gendeh gayot sila puede predica con el buen noticia. Por ejemplo, si Sergey nuay confianza na cuerpo y tan dificil man cuento con otro. Pero despues le estudia con el Biblia, ele ya habla: “Maskin tiene yo miedo, ya principia yo habla con otro el cosa yo ta aprende. Nuay yo expecta que hay tene yo confianza na cuerpo si ta habla yo con otro acerca na Biblia y ya hace tambien se fuerte con el de mio fe.”
4. Queda respetoso
Si ta predica, considera gendeh lang si cosa habla sino si paquemodo tambien con ese habla. Le con el 2 Timoteo 2:24 y 1 Pedro 3:15, 16, y despues, discuti con este maga pregunta:
-
Paquemodo tu aplica con este maga versiculo si tan cuento tu con otro acerca na Biblia?
-
Posible el cuanto miembro del de tuyu familia o amigo gendeh man uyun contigo. Cosa tu hace? Cosa tu gendeh debe hace?
-
Porque mas bueno si con respeto pregunta en vez que forza si cosa sila debe creé?
5. El predicacion ta dale alegria
Si Jehova ya dale con Jesus el trabajo que predica con el buen noticia. Paquemodo si Jesus ya mira con ese trabajo? Le con el Juan 4:34 y despues, discuti con este maga pregunta:
-
Ta come kita sustancioso comida para continua kita vivi y ta hace se kanaton alegre. Porque si Jesus ya compara con el hacida del voluntad del Dios—incluido el predicacion—na comida?
-
Cosa el beneficio si habla tu con otro el buen noticia?
Maga sugestion
-
Durante el midweek miting, observa si paquemodo tu puede principia predica con otro.
-
Pregunta con el quien tan study contigo si paquemodo queda estudiante na midweek miting. El maga assignment puede ayuda contigo para queda tu mas preparao habla con otro el cosa tu ta aprende.
-
Usa con el seccion “El Cuanto Ta Habla” o “Posible Tiene Quien Pregunta” na este estudiada para man practice si paquemodo contesta con el maga comon pregunta y oposicion.
POSIBLE TIENE QUIEN PREGUNTA: “Quetal tu?”
-
Paquemodo tu usa con este oportunidad para habla con el persona acerca na cosa tu ya aprende na de tuyu Bible study?
SUMARIO
El predicacion ta dale alegria y posible gendeh este igual de dificil na cosa tu ta pensa.
Repaso
-
Porque tu necesita habla el buen noticia con otro?
-
Pakilaya tu se hace con respeto?
-
Cosa puede ayuda contigo si ta nervia tu predica?
SABE PA MAS
Considera con el cuatro manera que puede tu habla el buen noticia con otro usando el jw.org contact card.
Aprende acerca na cuatro calidad que puede ayuda contigo para predica con el buen noticia.
“Preparao Ba Tu Para Queda un Pescador de Gente?” (El Torre de Guardia, Septiembre 2020)
Mira si paquemodo el un ejemplo na Biblia puede dale contigo coraje para predica, maskin joven pa tu.
Sabe si paquemodo tu puede man cuento acerca na Biblia na de tuyu familia quien no conoce con Jehova.
“Ayuda con el Maga Pariente Para Sirvi con Jehova” (The Watchtower, Marzo 15, 2014)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
