Ya enseña si Jesus que el maga Cristiano debe bautiza. (Le con el Mateo 28:​19, 20.) Pero cosa el bautismo? Y paquemodo el un persona queda cualificao na bautismo?

1. Cosa el bautismo?

El palabra “bautiza” estaba na un Griego termino que quierre decir “hace sumi” na agua. Cuando ya bautiza con Jesus, ya hace sumi con ele na Rio de Jordan y despues, ‘ya sale le na agua.’ (Marcos 1:​9, 10) Na igual manera, si ta bautiza con el un verdadero Cristiano, ta hace sumi con el de suyu entero cuerpo na agua.

2. Cosa el bautismo ta dale mira?

Si ta bautiza el un persona, ta dale le mira que ya dedica le el de suyu vida con Dios Jehova. Paquemodo ta hace con el dedicacion? Antes el bautismo, ta habla le con Jehova na rezo que quierre le sirvi con Ele hasta para cuando. Ta promete le que con Jehova lang le adora y el hacida del De Suyu voluntad amo el queda prioridad na de suyu vida. Ta decidi le “olvida el disuyo mismo cuerpo . . . y sigui” con el enseñanza y ejemplo de Jesus. (Mateo 16:24) Por medio na de suyu dedicacion y bautismo, puede le tene buen amistad con Jehova y con el maga siervo del Dios.

3. Paquemodo el un persona progresa para na bautismo?

Antes contigo bautiza, necesita tu conoce y tene fe con Jehova. (Le con el Maga Hebreo 11:6.) Mientras ta omenta el de tuyu saber y ta queda fuerte el de tuyu fe, hay queda tambien grande el de tuyu amor para con ele. Asigurao manda se move contigo para predica y vivi uyun na de suyu maga principio. (2 Timoteo 4:2; 1 San Juan 5:3) Si el un persona ta “vivi un vida comforme con el Señor y [ta] hace con Ele alegre na todo maga cosa-cosa,” puede ya le dedica de suyu vida con Dios y bautiza.​​—Colosa 1:​9, 10. a

 APRENDE PA MAS

4. Puede kita aprende na bautismo de Jesus

Le con el Mateo 3:​13-​17 y sabe el mas detalle acerca na bautismo de Jesus. Despues, discuti con este maga pregunta:

• Un diutay bata ba si Jesus cuando ya bautiza con ele?

• Paquemodo con ele ya bautiza? Ya hace lang ba pisik agua con ele?

Despues bautiza con Jesus, ya principia le con el de suyu trabajo aqui na tierra que ya dale el Dios. Le con el Lucas 3:​21-​23 y Juan 6:​38, y despues, discuti con este pregunta:

• Despues del bautismo, cosa trabajo ya hace prioridad si Jesus na de suyu vida?

5. Puede tu queda cualificao na bautismo

Na primero, dol imposible hace el dedicacion y queda cualificao na bautismo. Pero, puede tu progresa hasta na punto que preparao ya tu para hace con ese importante decision. Para mira con el cuanto individual quien ya hace se, man play con el VIDEO.

Le con el Juan 17:3 y Santiago 1:​5, y despues, discuti con este pregunta:

• Cosa puede ayuda con el un persona para queda preparao na bautismo?

1. Ta hace kita el dedicacion si ta habla kita con Jehova que quierre kita sirvi con ele hasta para cuando

2. Na bautismo, ta dale kita mira con aquellos presente que ya dedica kita el diaton vida con Dios

 6. Queda tu parte del familia de Jehova si bautiza tu

Despues del bautismo, hay queda tu parte del un unido familia na entero mundo. Maskin estaba kame na diferente maga lugar y background, igual el cosa kame ta creé y el principio que ta sigui kame. Le con el Salmo 25:14 y 1 Pedro 2:​17, NWT, y despues, discuti con este pregunta:

• Cosa el efecto del bautismo na relacion del un persona con Jehova y con aquellos quien ta adora con Ele?

 SUMARIO

Ya enseña si Jesus que el maga Cristiano necesita bautiza. Para queda cualificao, el un persona necesita tene fuerte fe con Jehova, vivi uyun na De Suyu maga principio y dedica el de suyu vida con Ele.

Repaso

• Cosa el bautismo y porque este importante?

• Cosa el bautismo ta dale mira?

• Cosa el necesita antes puede hace el dedicacion y bautiza?