LECCION 25
Cosa el Proposito del Dios Para Kanaton?
El Biblia ta habla que el vida del gente “corto lang y lleno de problema.” (Job 14:1) Este ba gayot el cosa quierre el Dios para kanaton? Si gendeh, cosa el de suyu proposito para kanaton? Hay cumpli ba se proposito? Considera con el maga contestacion del Biblia.
1. Cosa clase de vida el quierre si Jehova para kanaton?
Quierre si Jehova que tene kita el de con todo buen vida. Cuando ya crea le con el maga primer gente, kanda Adan y Eva, ya pone le kanila na un bonito paraiso, el jardin de Eden. Despues, “el Dios ya bendici kanila y ya habla: ‘Tene ustedes maga anak y queda manada, y llena con el tierra y goza con este.’” (Genesis 1:28) Quierre si Jehova que tene sila maga anak, hace sila paraiso con el entero tierra y cuida sila con el maga animal. El de suyu proposito amo que el todo gente hay tene perfecto salud y vivi hasta para cuando.
Maskin gendeh ansina el vida diaton ahora, a nuay cambia el proposito del Dios. (Isaias 46:10, 11) Quierre siempre le que el maga obediente persona hay tene perfecto vida y vivi hasta para cuando.—Le con el Revelacion 21:3, 4.
2. Paquemodo puede tene proposito el diaton vida ahora?
Ya crea kanaton si Jehova que tiene “espiritual necesidad,” quierre decir, tiene kita deseo que conoce y adora con ele. (Le con el Mateo 5:3-6, NWT.) Quierre le que queda kita cerca con ele, “camina na todo de suyu camino, ama con ele” y sirvi kita con ele “con todo corazon.” (Deuteronomio 10:12; Salmo 25:14) Si hace kita se, puede kita queda deverasan alegre maskin tiene kita maga problema. Ta tene deverasan proposito el diaton vida si ta adora kita con Jehova.
APRENDE PA MAS
Sabe acerca na grande amor que ya dale mira si Jehova cuando ta prepara le con el tierra para kanaton y si cosa ta enseña el de suyu Palabra acerca na proposito del vida.
3. Tiene bonito proposito si Jehova para na maga gente
Man play con el VIDEO y despues, discuti con este pregunta.
-
Porque el Dios ya crea con el diaton bonito planeta?
Le con el Eclesiastes 3:11 y despues, discuti con este pregunta:
-
Na este texto, cosa tu ya aprende acerca na proposito del Dios para kanaton?
4. Nuay cambia el proposito de Jehova para kanaton
Le con el Salmo 37:11, 29 y Isaias 55:11, y despues, discuti con este pregunta:
-
Porque kita puede habla que nuay cambia el proposito de Jehova para kanaton?
El un destrozao casa puede pa compone. Na igual manera, el tierra que ya destroza el maga gente hay compone el Dios para con aquellos quien ta ama con ele
5. El adoranza con Jehova ta dale deverasan proposito con el diaton vida
Si sabe kita el proposito del vida, ta dale se kanaton alegria. Man play con el VIDEO y despues, discuti con este pregunta.
-
Paquemodo si Terumi ya beneficia cuando ya sabe le el proposito del vida?
Le con el Eclesiastes 12:13 y despues, discuti con este pregunta:
-
Por causa na manada cosas que ya hace si Jehova para kanaton, paquemodo kita dale mira el diaton apresacion con ele?
POSIBLE TIENE QUIEN PREGUNTA: “Cosa el proposito del vida?”
-
Cosa tu hay contesta?
SUMARIO
Quierre si Jehova que tene kita perfecto vida y vivi hasta para cuando aqui na tierra. Si ta adora kita con ele con todo corazon, puede tene deverasan proposito el diaton vida—maskin ahora.
Repaso
-
Cosa el original proposito de Jehova para con Adan y Eva?
-
Porque kita puede habla que nuay cambia el proposito del Dios para na maga gente?
-
Paquemodo puede tene deverasan proposito el de tuyu vida?
SABE PA MAS
Considera con el evidencia que deverasan ya existi el jardin de Eden.
“Jardin de Eden—Deverasan Ba Este?” (The Watchtower, Enero 1, 2011)
Sabe si porque kita puede asigura que el tierra hay esta hasta para cuando.
Examina si cosa ta habla el Biblia acerca si paquemodo puede tene proposito el de tuyu vida.
Mira si paquemodo el un hombre, quien pensaba tiene ya ele el todo, ya puede incuntra con el cosa falta na de suyu vida.
a Na sunod leccion, hay sabe tu si porque gendeh ansina el diaton vida ahora.
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
