“Porque?” Ese el normal pregunta del un persona si tiene tragedia. Maka-alegre que el Biblia tiene claro contestacion na ese pregunta!

1. Paquemodo si Satanas ya principia con el maldad na mundo?

Si Satanas Diablo ya man rebelde con Dios. Quierre le que rula con otro poreso ya influencia le con el maga primer gente, si Adan y Eva, para man rebelde tambien con Dios. Para hace se, ya habla le con Eva un imbusterias. (Genesis 3:​1-5) Ya hace le sale que dol ta esconde si Jehova un buen cosa kanila y queda sila mas alegre si gendeh sila obedece con Dios. Ya habla si Satanas con el primer imbusterias cuando ya habla le con Eva que gendeh le muri. Poreso, el Biblia ya llama con Satanas “embustero y tata del imbusterias.”​​—Juan 8:​44.

2. Cosa ya hace si Adan y Eva?

Bien bondadoso si Jehova con Adan y Eva. Ya habla le que puede sila come con el fruta del cada pono na jardin de Eden puera na uno. (Genesis 2:​15-​17) Pero, ya come lang siempre sila con el fruta de ese pono. “Ya saca [si Eva] con el fruta de este y ya come.” Despues, si Adan “ya come” tambien. (Genesis 3:6) Ya desobedece sila con Dios. Cay perfecto si Adan y Eva, natural kanila que hace si cosa el justo. Pero cuando ya iscuji sila desobedece con Dios, ya culpa sila y nuay sigui na de suyu rulanza. Ese ya causa grande sufrimiento kanila.​​—Genesis 3:​16-​19.

3. Paquemodo el decision de Adan y Eva ya afecta kanaton?

Cuando ya culpa si Adan y Eva, ya queda sila imperfecto y ya pasa sila con ese imperfeccion na todo diila descendiente. Acerca con Adan, el Biblia ya habla: “Por medio de un gente el pecado ya entra na mundo. Y, por medio del pecado, ya entra el muerte. Y el muerte ya alcanza con todo el maga gente.”​​—Roma 5:​12.

Ta sufri kita na diferente maga razon. Tiene vez por causa se na diaton mal decision, na mal decision del otro o cay talli kita na gendeh justo lugar na gendeh justo tiempo.​​—Le con el Eclesiastes 9:​11.

 APRENDE PA MAS

4. El quien responsable na diaton sufrimiento

Manada el ta creé que el Dios amo el ta controla con el entero mundo. Deverasan ba se? Man play con el VIDEO.

Le con el Santiago 1:​13 y 1 San Juan 5:​19, y despues, discuti con este pregunta:

• El Dios ba el responsable na sufrimiento y maldad?

5. Considera con el resulta del rulanza de Satanas

1. Perfecto kanda Adan y Eva, y ya queda sila na Paraiso. Pero ya oi sila con Satanas y yan rebelde con Jehova

2. Despues del rebelion, el mundo ya llena de pecado, sufrimiento y muerte

3. Hay quita si Jehova con el pecado, sufrimiento y muerte. El maga gente hay queda otravez perfecto y vivi na Paraiso

 6. Sabe si Jehova el diaton sufrimiento

Nuay ba queber el Dios na diaton maga sufrimiento? Considera si cosa ya escribi si Rey David y si apostol Pedro. Le con el Salmo 31:7 y 1 Pedro 5:​7, y despues, discuti con este pregunta:

• Cosa tu ta sinti cay si Jehova ta mira y tiene queber na diaton sufrimiento?

 SUMARIO

Si Satanas Diablo y el primer dos gente amo el responsable na maldad na mundo. Tiene gayot queber si Jehova na diaton sufrimiento y cerca ya le quita con ese.

Repaso

• Cosa imbusterias ya habla si Satanas Diablo con Eva?

• Cosa el efecto kanaton del rebelion de Adan y Eva?

• Paquemodo kita ya sabe que si Jehova tiene queber na diaton sufrimiento?