Ya experiencia ya ba tu que ya muri el un persona que importante contigo? Na ese bien dificil situacion, posible ya pregunta tu: ‘Cosa ta sucede con el gente si ta muri? Tiene ba esperanza que puede kita mira otravez kanila?’ Na este leccion y na sunod, considera con el maga contestacion del Biblia.

1. Cosa ta sucede con el gente si ta muri?

Ya compara si Jesus con el muerte na hondo durmida. Si el un persona bien durmido, no sabe le si cosa ta sucede alrededor con ele. Paquemodo el muerte ta semeja na durmida? Despues muri el gente, gendeh mas le ta sinti dolor y tristeza. El Biblia ta habla: “El maga muerto no sabe ni nada.”​​—Le con el Eclesiastes 9:5.

2. Cosa el beneficio si sabe kita el verdad acerca na muerte?

Manada gente el tiene miedo na muerte​​—y maskin na maga muerto! Pero puede contigo dale comforta el cosa ta habla el Biblia acerca na muerte. Si Jesus ya habla: “El verdad hay hace con ustedes libre [o libra con ustedes].” (Juan 8:​32) El cuanto maga religion ta enseña que despues muri el un gente, tiene este alma que ta esta vivo. Pero gendeh se el cosa ta enseña el Biblia. Gendeh mas ta sufri el gente despues le muri. Mas pa, ciendo el maga muerto no sabe ni nada, gendeh sila puede hace mal cosas kanaton. Poreso, gendeh kita necesita adora con el maga muerto o hace maga cosas para gendeh sila rabia kanaton y gendeh tambien kita necesita reza para kanila.

El cuanto ta habla que ta puede sila comunica con el maga muerto. Pero imposible se. Como cosa kita ya aprende, el maga muerto “no sabe ni nada.” Aquellos quien ta pensa que ta puede sila man cuento con el diila maga pariente o amigo quien ya muri, posible ta comunica con el maga demonio quien ta pretende como el maga persona quien ya muri. Poreso, si sabe kita el verdad acerca na muerte, ta protege este kanaton na maga demonio. Ta manda kanaton si Jehova que evita comunica con el maga muerto cay sabe le que el comunicacion na maga demonio hay causa peligro kanaton.​​—Le con el Deuteronomio 18:​10-​12.

3. Sabe el deverasan condicion del maga muerto

Na entero mundo, diferente el cosa ta creé el maga gente acerca na condicion del maga muerto. Siempre, gendeh posible que todo se deverasan.

• Cosa ta creé el maga gente na de ustedes lugar acerca na condicion del maga muerto?

 4. Puede kita beneficia na verdad acerca na muerte

Si sabe kita el verdad acerca na muerte, gendeh ya kita tene miedo na maga muerto. Le con el Eclesiastes 9:​10 y despues, discuti con este pregunta:

• Puede ba hace mal cosas el maga muerto kanaton?

Si ta creé kita el verdad na Biblia, gendeh kita creé que necesita kita hace maga cosas para gendeh rabia kanaton aquellos quien ya muri ya o adora kanila. Le con el Isaias 8:​19 y Revelacion 4:​11, y despues, discuti con este pregunta:

• Cosa gaha ta sinti si Jehova si el un persona ta adora con el maga muerto o ta pidi ayuda kanila?

5. Ta dale comforta kanaton el verdad acerca na muerte

Ya enseña con el manada gente que si muri sila, hay castiga kanila por causa na maga mal cosas que ya hace sila. Pero, ta sinti kita comforta cay ya sabe kita que gendeh ta sufri el maga muerto​​—maskin aquellos quien ya hace bien mal cosas. Le con el Roma 6:7 y despues, discuti con este pregunta:

• El Biblia ta habla que si el un persona ya muri, ya libra ya con ele desde na de suyu maga pecado. Ta mira tu, ta sufri ba el gente quien ya muri por causa na de suyu maga pecado de antes?

Mientras mas ta conoce kita con Jehova, mas ta puede kita mira que gendeh gayot le permiti que sufri el maga muerto. Le con el Deuteronomio 32:4 y 1 San Juan 4:​8, y despues, discuti con este maga pregunta:

• El Dios ba que tiene maga calidad que ya menciona na ese maga texto hay aproba que hace sufri con aquellos quien ya muri?

• El verdad ba acerca na muerte ta dale contigo comforta? Porque?

 SUMARIO

Si muri el un persona, el de suyu vida hay termina. El maga muerto gendeh ta sufri y gendeh sila puede hace mal cosas na maga vivo.

Repaso

• Cosa ta sucede si ta muri el gente?

• Paquemodo kita ta beneficia si sabe kita el verdad acerca na muerte?

• Paquemodo el verdad acerca na muerte ta dale kanaton comforta?