El muerte ta causa gayot dolor y tristeza. Poreso, el Biblia ya llama con ese un contrario. (1 Corinto 15:26) Na Leccion 27, ya puede tu sabe que si Jehova hay quita con el muerte. Pero, cosa hay sucede con aquellos quien ya muri ya? Na este leccion, hay aprende tu mas acerca na un bonito promesa de Jehova​​—hay resucita le con el manada para vivi hasta para cuando. Sucede ba gayot se? Hay vivi ba sila na cielo o na tierra?

1. Cosa si Jehova quierre hace con el diaton maga pariente y amigo quien ya muri?

Quierre si Jehova hace vivi otravez con el maga gente quien ya muri ya. El un siervo del Dios que si Job asigurao que gendeh ulvida con ele el Dios si muri le. Ele ya habla con Dios: “Hay llama tu y hay contesta yo contigo [estaba na Sepultura].”​​—Le con el Job 14:​13-​15.

2. Porque kita sabe que resucita con el maga muerto?

Cuando si Jesus taqui na tierra, ya dale el Dios poder con ele para resucita con el maga gente. Ya resucita le con el un 12-año mujer y con el anak del un viuda. (Marcos 5:​41, 42; Lucas 7:​12-​15) Ya pasa el tiempo, el amigo de Jesus que si Lazaro ya muri. Maskin cuatro dia ya le muerto, ya resucita con ele si Jesus. Ya reza si Jesus con Dios y despues, ya habla: “Lazaro! Sale afuera!” Y “el muerto ya sale”​​—ya vivi si Lazaro. (Juan 11:​43, 44) Imagina el alegria del familia y maga amigo de Lazaro!

3. Cosa esperanza tiene aquellos cerca kanaton quien ya muri ya?

El Biblia ya promete que “el maga gente . . . ay resucita.” (Maga Actividad 24:15) Aquellos con quien ya resucita si Jesus de antes nuay guinda na cielo. (Juan 3:​13) Alegre sila que vivi otravez aqui na tierra. Igual kanila, hay resucita si Jesus con el billones para vivi hasta para cuando na paraiso tierra. Ele ya habla que todo el maga muerto quien na memoria del Dios hay resucita maskin pa dol ya ulvida ya kanila el otro.​​—Juan 5:​28, 29.

 APRENDE PA MAS

4. Ya dale mira si Jesus que puede le resucita con el maga muerto

Sabe pa mas si cosa ya hace si Jesus na de suyu amigo que si Lazaro. Le con el Juan 11:​14, 38-​44 y despues, discuti con este maga pregunta:

• Porque kita puede habla que deverasan muerto ya si Lazaro?​—Mira con el versiculo 39.

• Si ya guinda si Lazaro na cielo, hay manda ba con ele bira si Jesus aqui na tierra?

Man play con el VIDEO.

5. Manada el quien hay resucita!

Le con el Salmo 37:29 y despues, discuti con este pregunta:

• Onde vivi el billones con quien hay resucita?

Si Jesus hay resucita gendeh lang con aquellos quien ta adora con Jehova. Le con el Maga Actividad 24:15 y despues, discuti con este pregunta:

• Con quien tu quierre mira que vivi otravez?

• Paquemodo el esperanza de resureccion ya puede dale comforta con el mayores de Phelicity?

 SUMARIO

El Biblia ta promete que billones de maga muerto hay resucita. Quierre si Jehova que vivi sila otravez y ya dale le poder con Jesus para resucita kanila.

Repaso

• Cosa si Jehova y si Jesus ta sinti acerca na resureccion?

• Onde queda el billones con quien hay resucita​​—na cielo o na tierra? Porque ese el de tuyu contestacion?

• Cosa ya convinci contigo que el de tuyu pariente o amigo puede vivi otravez?