LECCION 37
Si Cosa Ta Habla el Biblia Acerca na Trabajo y Sen
Yan lingasa ya ba tu acerca na trabajo o sen? Posible, dificil busca sen para na diaton maga necesidad mientras ta pricura adora con Jehova na justo manera. Pero, el Biblia ta dale kanaton practical consejo.
1. Cosa el Biblia ta habla acerca na trabajo?
Quierre el Dios que queda kita alegre na diaton trabajo. El Biblia ta habla que “nuay cosa pa mas bueno para na un gente contra . . . queda alegre na de suyu trabajo.” (Eclesiastes 2:24) Bien trabajador si Jehova. Si trabaja kita igual con ele, puede kita hace alegre con ele y queda tambien kita alegre.
Importante el trabajo. Pero, gendeh kita debe permiti con ese que queda mas importante contra na diaton adoranza con Jehova. (Juan 6:27) Ya promete le que si hace kita una con ele, hay dale le el diaton maga necesidad.
2. Cosa el balance mirada na sen?
El Biblia ta habla que “el sen un proteccion,” pero ta habla tambien este que si na sen lang kita man focus, gendeh kita queda alegre. (Eclesiastes 7:12) Poreso, ta anima kanaton que no ama con el sen sino queda contento o ‘conforme con el maga cosa-cosa tiene kita.’ (Le con el Maga Hebreo 13:5.) Si esta kita contento, gendeh kita queda malingasa que gendeh bastante el cosa kita tiene. Ta evita tambien kita tene maga debe. (Proverbio 22:7) Mas pa, ta puede kita evita con el maga peligro del maga juego de sen y con el maga peligroso negocio, donde ta promete kanaton que queda kita dayun rico.
3. Paquemodo kita puede queda bondadoso na diaton usada de sen?
Si Jehova amo un bondadoso Dios y ta imita kita con ele si ‘bondadoso kita y con gana dale’ con otro. (1 Timoteo 6:18) Puede kita usa con el diaton sen para suporta con el congregacion y para ayuda con otro quien ta necesita, especialmente con el diaton maga hermano y hermana. Mas interesao si Jehova, gendeh na cuanto kita ta dale sino na diaton motivo. Si bondadoso kita y ta dale estaba na corazon, hay tene kita alegria y puede kita hace alegre con Jehova.—Le con el Maga Actividad 20:35.
APRENDE PA MAS
Mira el maga beneficio si contento kita y tiene justo mirada na diaton trabajo.
4. Honra con Jehova na manera si paquemodo tu ta trabaja
El diaton relacion con Jehova debe afecta con el manera si paquemodo kita ta trabaja. Man play con el VIDEO y despues, discuti con este maga pregunta.
-
Na video, cosa tu ya gusta na custumbre de Jason na de suyu trabajo?
-
Cosa le ya hace para pone na justo lugar con el de suyu trabajo?
Le con el Colosa 3:23, 24 y despues, discuti con este pregunta:
-
Porque importante si cosa el diaton mirada na trabajo?
Importante el trabajo. Pero, gendeh kita debe permiti que queda este mas importante contra na diaton adoranza con Jehova
5. Ta beneficia kita si contento kita
Manada gente el ta pricura tene manada sen. Pero, otro el cosa ta anima kanaton el Biblia. Le con el 1 Timoteo 6:6-8, NWT y despues, discuti con este pregunta:
-
Cosa el Biblia ta anima kanaton que hace?
Maskin poco lang el cosa kita tiene, puede kita queda alegre. Man play con el VIDEO y despues, discuti con el pregunta.
-
Maskin pobre sila na financial, cosa ta hace alegre con este maga familia?
Pero, paquemodo si manada ya kita material cosas pero quierre pa kita tene mas? Ya dale ilustracion si Jesus acerca na peligro de ese. Le con el Lucas 12:15-21 y despues, discuti con este pregunta:
-
Cosa tu ya puede aprende na ilustracion de Jesus?—Mira con el versiculo 15.
Le y compara con el Proverbio 10:22 y 1 Timoteo 6:10. Despues, discuti con este maga pregunta:
-
Para contigo, cosa el mas importante? Tene buen amistad con Jehova o tene manada sen? Porque?
-
Cosa maga problema kita tene si pricura kita tene manada sen?
6. Si Jehova hay dale el diaton maga necesidad
Si tiene kita maga problema na trabajo y sen, ta puede kita sabe si tiene ba gayot kita fe con Jehova. Man play con el VIDEO para mira si cosa kita puede hace si tiene kita ansina maga problema y despues, discuti con el maga pregunta.
-
Na video, cosa maga dificultad ya tiene el un hermano?
-
Paquemodo le ya puede enfrenta con ese?
Le con el Mateo 6:25-34 y despues, discuti con este pregunta:
-
Cosa si Jehova ta promete para con aquellos quien ta hace una con ele?
EL CUANTO TA HABLA: “Necesita gayot yo trabaja para suporta con el de mio familia. Poreso, gendeh yo puede atende con el maga miting cada semana.”
-
Cosa texto el ta convinci contigo que el de con todo buen decision amo hace una con el adoranza con Jehova?
SUMARIO
Importante el sen y secular trabajo pero gendeh se debe sangga con el diaton servicio con Jehova.
Repaso
-
Cosa puede ayuda contigo para tene balance mirada na trabajo?
-
Paquemodo tu beneficia si contento tu?
-
Paquemodo tu puede dale mira que ta confia tu con el promesa de Jehova que dale le el necesidad del de suyu maga siervo?
SABE PA MAS
Examina si ta habla ba el Biblia que malo el sen.
“El Sen Ba el Causa del Todo Cosas Malo?” (Articulo na website)
Sabe si cosa clase de dalida el ta hace alegre con Dios.
“Cosa Ta Habla el Biblia Acerca na Dalida?” (Articulo na website)
Nuay ba peligro el maga juego de sen?
Mira si cosa ya motiva con el un persona para gendeh mas ruba y juga maga juego de sen.
“Quierre-quierre Yo Maga Carrera de Caballo” (The Watchtower, Noviembre 1, 2011)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
