Bien importante el sangre. Si nuay se, gendeh kita puede vivi. El Dios el ya crea kanaton, poreso tiene le el derecho para habla si paquemodo kita usa con el sangre. Cosa ele ya habla acerca na sangre? Puede ba con ese come o abona? Y paquemodo tu hace buen decision acerca con este?

1. Cosa el mirada de Jehova na sangre?

Si Jehova ya habla con el de suyu maga siervo de antes: “El vida del todo clase de creatura amo el sangre de este.” (Levitico 17:14) Para con Jehova, el sangre ta representa con el vida. Ciendo el vida sagrao y regalo este estaba con Dios, el sangre sagrao tambien.

2. Cosa usada de sangre el gendeh aceptable con Dios?

Si Jehova ya manda con el de suyu maga siervo de antes que no come sangre. (Le con el Genesis 9:4 y Levitico 17:10.) Ya habla le otravez con este cuando el cuerpo gobernante ya manda con el maga Cristiano que “no come [evita, NWT] sangre.”​​—Le con el Maga Actividad 15:​28, 29.

Cosa quierre decir que evita con el sangre? Si el doctor ya habla contigo que evita con el maga alcoholico tomada, gendeh tu con este hay toma. Hay come ba tu comida que ta contene alcohol o manda clava alcoholico tomada na de tuyu cuerpo? Siempre gendeh. Na igual manera, ciendo el Dios ya manda kanaton que evita con el sangre, quierre decir gendeh kita debe toma sangre o come carne que nuay hace derrama con el sangre. Gendeh tambien kita debe come maskin cosa que ya mezcla sangre.

Quetal el usada de sangre na curada medical? Tiene cuanto manera de curada que claro ta viola con el ley del Dios. Incluido aqui el abonada de puro sangre o de cuatro importante parte del sangre​​—el colorao celula, blanco celula, platelet y plasma. Pero para na cuanto curada, posible gendeh claro si ta viola este con el ley del Dios. Por ejemplo na cuanto curada, ta usa con el maga fraction o diutay parte del uno na cuatro importante parte del sangre. Na otro maga manera de curada, ta usa con el sangre del mismo persona. Si ta considera con este maga manera de curada, cada uno kanaton debe hace personal decision. a​​—Galacia 6:5.

 APRENDE PA MAS

3. Hace decision que ta hace alegre con Jehova

Paquemodo tu hace decision acerca na curada medical que uyun na mirada del Dios? Man play con el VIDEO y despues, discuti si porque importante sigui con el maga cosa ya lista abajo.

• Reza para tene sabeduria.​​—Santiago 1:5.

• Man research maga principio na Biblia y mira si paquemodo aplica con ese.​​—Proverbio 13:16.

• Sabe si cosa maga manera de curada el tiene na de ustedes lugar.

• Identifica si cosa maga curada el gendeh aceptable contigo.

• Asigura que el de tuyu decision puede dale contigo limpio conciencia.​​—Maga Actividad 24:16. b

• Acorda que nuay quien debe decidi para contigo acerca na maga decision que ta depende na de tuyu conciencia​—​maskin el de tuyu marido o mujer, un anciano o el quien contigo tan Bible study.​​—Roma 14:12.

• Escribi el de tuyu decision para sabe este el otro.

4. El maga Testigo de Jehova ta busca el de con todo buen manera de curada

Puede kita ricibi el de con todo buen manera de curada mientras ta sigui con el ley del Dios acerca na usada de sangre. Man play con el VIDEO.

Le con el Tito 3:2 y despues, discuti con este pregunta:

• Porque kita debe queda respetoso y calmao si ta man cuento na maga doctor?

 5. Si tiene blood fraction que envuelto

Tiene cuatro importante parte el sangre​​—colorao celula, blanco celula, platelet y plasma. Este maga parte del sangre tiene maga diutay parte que ta llama blood fraction. c Ta usa con el cuanto maga fraction para cura maga enfermedad o para evita el sobra salida de sangre.

Si acerca na maga blood fraction, el cada Cristiano debe hace de suyu mismo decision base na de suyu conciencia que uyun na Biblia. El cuanto posible decidi que gendeh acepta curada o medicina que ta usa maga blood fraction. Mientras el otro, posible ta sinti que ta permiti el diila conciencia que acepta maga blood fraction.

Si ta hace tu maga decision, considera este pregunta:

• Paquemodo yo explica con el doctor si porque yo ta acepta o gendeh ta acepta con el usada de maga blood fraction?

 SUMARIO

Si Jehova quierre que trata kita con el sangre como sagrao.

Repaso

• Porque sagrao el sangre para con Jehova?

• Porque kita sabe que el mandamiento del Dios que evita con el sangre aplicable tambien na abonada de sangre?

• Paquemodo tu puede hace buen decision acerca na curada que envuelto el sangre?