LECCION 42
Cosa el Biblia Ta Habla na Pagka-single y na Matrimonio?
Na cuanto cultura, ta creé sila que gendeh queda alegre el un persona si gendeh le casao. Pero, gendeh todo del maga casao alegre y gendeh todo del maga single triste. Gane, el Biblia ta refiri con este dos como maga regalo.
1. Cosa el cuanto maga beneficio del pagka-single?
El Biblia ta habla: “Hay beneficia tambien el quien casa pero mas beneficia el quien gendeh casa.” (Le con el 1 Corinto 7:32, 33, 38, NWT.) Na cosa maga manera el single persona “mas beneficia”? Gendeh le necesita atende con el necesidad del de suyu marido o mujer. Poreso, mas manada le tiempo. Puede le hace pa mas para con Jehova. Por ejemplo, puede le anda na otro lugar para suporta con el predicacion del buen noticia. Y mas importante, tiene le mas manada tiempo para queda cerca con Jehova.
2. Cosa el cuanto maga beneficio del legal matrimonio?
Igual na pagka-single, tiene tambien beneficio el matrimonio. El Biblia ta habla que “el dos mas bueno que con el uno.” (Eclesiastes 4:9) Deverasan este especialmente na maga Cristiano quien ta aplica con el maga principio na Biblia na diila matrimonio. Aquellos quien legal ta casa ta promete que pirmi sila hay ama, respeta, y aprecia con uno y otro. Como resulta, mas ta sinti sila que tiene seguridad el diila relacion contra na otro quien ta queda lang junto. Y el diila maga anak hay sinti tambien con ese seguridad.
3. Cosa el mirada de Jehova na matrimonio?
Cuando ya crea si Jehova con el primer matrimonio, ele ya habla: “El hombre hay deja con el de suyu tata y nana y esta junto con el de suyu mujer.” (Genesis 2:24) Quierre si Jehova que el marido y mujer hay ama con uno y otro, y esta junto mientras vivo sila. Ta permiti lang le con el divurcio si tiene quien kanila dos ya comete adulterio. Na ese situacion, ta dale si Jehova el derecho con el persona quien ya esta fiel para decidi si man divurcio a ba le o gendeh. (Mateo 19:9) Gendeh si Jehova ta permiti con el maga Cristiano que comete poligamia o tene manada marido o mujer.—1 Timoteo 3:2.
APRENDE PA MAS
Aprende si paquemodo tu puede queda alegre—y si paquemodo tu hace alegre con Jehova—single man tu o casao.
4. Usa enbuenamente con el regalo de pagka-single
Ya considera si Jesus con el pagka-single como un regalo. (Mateo 19:11, 12) Le con el Mateo 4:23 y despues, discuti con este pregunta:
-
Paquemodo si Jesus ya usa con el de suyu pagka-single para sirvi con el de suyu Tata y para ayuda con otro?
El maga Cristiano puede queda alegre na diila pagka-single igual con Jesus. Man play con el VIDEO y despues, discuti con el pregunta.
-
Na cosa maga bonito manera puede usa el maga Cristiano con el diila pagka-single?
Sabe ba tu?
Nuay menciona el Biblia especifico edad si cuando puede casa el un persona. Pero, ta anima este con el maga jovenes que espera hasta ‘pasa ya sila na tiempo de pagka-joven,’ donde fuerte el sexual deseo que puede causa con el un joven persona para man dificil hace maga justo decision.—1 Corinto 7:36, NWT.
5. Iscuji enbuenamente si con quien casa
Uno este na de con todo importante decision que hay hace tu na de tuyu vida. Le con el Mateo 19:4-6, 9 y despues, discuti con este pregunta:
-
Porque el un Cristiano gendeh debe apura casa?
El Biblia puede ayuda contigo para sabe si cosa maga calidad tu busca na un persona. El de con todo importante amo busca un persona quien ta ama con Jehova. b Le con el 1 Corinto 7:39 y 2 Corinto 6:14. Despues, discuti con este maga pregunta:
-
Porque kita debe casa na un siervo lang de Jehova?
-
Cosa gaha hay sinti si Jehova si iscuji kita casa con el un persona quien gendeh ta ama con Ele?
Si pone con el dos diferente animal junto na un ayugo, hay sufri sila. Na igual manera, si casa el un Cristiano na un persona quien gendeh siervo de Jehova, hay tene sila manada problema
6. Tene igual mirada de Jehova na matrimonio
Na Israel de antes, el cuanto maga hombre yan divurcio con el diila mujer por causa na maga gendeh valido razon. Le con el Malaquias 2:13, 14, 16 y despues, discuti con este pregunta:
-
Porque si Jehova ta odia con el divurcio que gendeh asegun na Biblia?
El adulterio y divurcio ta causa sufrimiento con el marido o mujer quien ya esta fiel y con el maga anak
Man play con el VIDEO y despues, discuti con el pregunta.
-
Si casao tu na un persona quien gendeh siervo de Jehova, cosa tu puede hace para tene alegre matrimonio?
7. Sigui con el maga principio de Jehova acerca na matrimonio
Necesita hace esfuerzo el un persona para aplica con el maga principio del Dios acerca na matrimonio. c Pero, ta bendici si Jehova con aquellos quien ta hace con ese. Man play con el VIDEO.
Le con el Maga Hebreo 13:4 y despues, discuti con este maga pregunta:
-
Para contigo, justo lang ba el maga principio de Jehova acerca na matrimonio? Porque?
Ta expecta si Jehova que el maga Cristiano hay registra con el diila matrimonio y divurcio, ciendo na manada maga nacion el gobierno ta manda con el maga gente que hace se. Le con el Tito 3:1 y despues, discuti con este pregunta:
-
Si casao tu, asigurao ba tu que legal ta conoce el gobierno con el de ustedes matrimonio?
POSIBLE TIENE QUIEN PREGUNTA: “Porque pa man casa? Gendeh ba puede man junto ya lang dayun?”
-
Cosa tu hay contesta?
SUMARIO
El pagka-single y el matrimonio amo maga regalo estaba con Jehova. Este dos puede dale kanaton alegria y satisfaccion si vivi kita harmonia na voluntad de Jehova.
Repaso
-
Paquemodo el un persona puede usa enbuenamente con el de suyu pagka-single?
-
Porque el Biblia ta habla que casa na igual siervo lang de Jehova?
-
Cosa el solamente aceptable razon na Biblia para na divurcio?
SABE PA MAS
Cosa quierre decir que casa lang “na un cristiano”?
“Pregunta del Maga Quien Ta Le” (The Watchtower, Julio 1, 2004)
Mira con el dos corto video que puede ayuda contigo para hace maga buen decision acerca na dating y matrimonio.
Sabe si porque ya sinti el un hermano que el cosa ya dale con ele si Jehova mas pa na cosa ele ya deja.
Cosa debe considera el un persona antes decidi man divurcio o separta con el de suyu marido o mujer?
“Honra con el ‘Cosa Ya Uni el Dios’” (The Watchtower, Deciembre 2018)
b Na cuanto maga cultura, el mayores el ta iscuji si con quien casa el diila anak. Si ansina el situacion, el maga mayores debe considera una si ta ama ba el persona con Jehova y gendeh con el de suyu estado na vida.
c Si ta queda tu junto con el un persona con quien gendeh tu casao, personal decision de tuyu si deja tu o casa con ele.
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
