Na entero mundo, diferente el opinion del maga gente acerca na alcoholico tomada. El cuanto ta toma tiene vez si tan junto sila con el diila maga amigo. El otro gendeh gayot ta toma. Mientras el otro ta toma hasta queda sila burracho. Cosa el mirada del Biblia na alcoholico tomada?

1. Malo ba toma alcoholico tomada?

Nuay habla el Biblia que malo toma alcoholico tomada. Gane, cuando ya menciona este acerca na manada buen cosas que ya dale kanaton el Dios, el Biblia ya inclui con el “vino que ta hace alegre con el corazon del gente.” (Salmo 104:​14, 15) El cuanto fiel hombre y mujer que ya menciona na Biblia ya toma tambien alcoholico tomada.​​—1 Timoteo 5:​23.

2. Cosa consejo ta dale el Biblia para con aquellos quien ta toma?

Gendeh aceptable con Jehova el sobra tomada y el burracherias. (Galacia 5:​21) El de suyu Palabra ta habla: “No man junto con aquellos por demas ta toma vino.” (Proverbio 23:20) Poreso, si toma kita​​—maskin na privado—​gendeh kita debe sobra toma que gendeh ya kita puede pensa enbuenamente, controla con el diaton converzada y accion, o puede kita pone na peligro con el diaton salud. Si gendeh kita ta puede controla con el diaton tomada, debe preparao kita que gendeh ya lang toma.

3. Paquemodo kita puede respeta con el decision del otro acerca na alcoholico tomada?

El cada persona debe decidi si toma ba le alcoholico tomada. Gendeh kita debe juzga con aquellos quien ta toma y man pressure con aquellos quien no quierre toma. (Roma 14:10) Ta iscuji kita que gendeh toma si causa este problema con otro. (Le con el Roma 14:21.) Ta busca kita gendeh “el [diaton] interes lang, sino el interes del los demas.”​​—Le con el 1 Corinto 10:​23, 24.

 APRENDE PA MAS

4. Decidi si toma ba tu

Cosa el mirada de Jesus acerca na alcoholico tomada? Para sabe el contestacion, considera con el primer milagro que ya hace le. Le con el Juan 2:​1-​11 y despues, discuti con este maga pregunta:

• Na este milagro, cosa kita puede aprende acerca na mirada de Jesus na alcoholico tomada y con aquellos quien ta toma?

• Ciendo nuay prohibi si Jesus con el alcoholico tomada, cosa debe el mirada del un Cristiano con aquellos quien ta toma?

Maskin puede el un Cristiano toma alcoholico tomada, gendeh se quierre decir que na todo situacion ya le se puede hace. Le con el Proverbio 22:3 y despues, considera si paquemodo el siguiente puede ayuda contigo decidi si toma ba tu:

• Maneja tu vehiculo o usa maga peligroso machine.

• Priñada tu.

• El doctor ya prohibi contigo que toma.

• Gendeh tu ta puede controla con el de tuyu tomada.

• El ley gendeh contigo ta permiti que toma.

• Junto tu con el persona quien ya decidi que gendeh toma cay no puede le controla con el de suyu tomada de antes.

Debe ba tu prepara o sirvi alcoholico tomada na casamiento o na otro maga ocasion? Para mira si cosa contigo puede ayuda decidi, man play con el VIDEO.

Le con el Roma 13:13 y 1 Corinto 10:​31, 32. Despues le con el cada texto, discuti con este pregunta:

• Si aplica tu este principio, paquemodo este ayuda contigo para hace un decision que ta hace alegre con Jehova?

 5. Decidi si paquemodo de manada tu hay toma

Si decidi tu toma alcoholico tomada, acorda este: Maskin gendeh ta prohibi si Jehova que toma alcoholico tomada, ta prohibi le con el por demas de tomada. Porque? Le con el Oseas 4:​11, 18 y despues, discuti con este pregunta:

• Cosa posible sucede si por demas toma el un persona?

Cosa puede ayuda kanaton que gendeh por demas toma? Necesita kita sabe el diaton limitacion o queda modesto. Le con el Proverbio 11:2 y despues, discuti con este pregunta:

• Porque bueno si pone tu limitacion si paquemodo de manada tu hay toma?

6. Si paquemodo descanza toma por demas

 SUMARIO

Ya dale si Jehova alcoholico tomada para na diaton alegria pero ta prohibi le con el por demas de tomada y burracherias.

Repaso

• Cosa el mirada del Biblia na alcoholico tomada?

• Cosa el peligro si por demas ta toma?

• Paquemodo kita respeta con el decision del otro acerca na tomada?